Böyük arzuların kiçik addımlardan başladığı dövr

Bakı:

29 °C

54 %

6 m/s

Əlaqə

AZ RU EN

Ana səhifə / Arxiv / Böyük arzuların kiçik addımlardan başladığı dövr

Böyük arzuların kiçik addımlardan başladığı dövr

12.08.2026 [11:45]

Gənclik varsa, gələcəyə ümid var...

Gənclik insan ömrünün ən dinamik, enerjili və ümidli dövrüdür. Bu illər insanın yalnız yaşadığı bir mərhələ deyil, həm də gələcəyini qurduğu, arzularını gerçəkliyə çevirməyə çalışdığı xüsusi bir zaman kəsiyidir. Gənclik həm də öyrənmək üçün böyük imkanlar dövrüdür. İnsan bu yaşlarda səhvlərindən nəticə çıxarmağı, uğursuzluqlardan sonra yenidən ayağa qalxmağı öyrənir. Ən əsası isə özünə inanmağın əhəmiyyətini anlayır.

Artıq 28 ildir ki, avqustun 12-si dünyada Beynəlxalq Gənclər Günü kimi qeyd olunur. Belə bir qərar 1998-ci il avqustun 8-dən 12-dək Lissabonda gənclərlə iş üzrə nazirlərin iştirakı ilə keçirilən beynəlxalq konfransda qəbul olunub. Gənclərə lazımi diqqət göstərmək məqsədilə qeyd olunan bu tarix gənclərin nailiyyətlərini geniş təbliğ etmək, cəmiyyətin bütün sahələrində onların iştirakını təmin etmək üçün yaradılıb.

Gələcəyə qoyulan sərmayə

Bu gün dünyanın sürətlə dəyişdiyi bir vaxtda gənclərin rolu daha da artır. Texnologiya, elm, süni intellekt, sahibkarlıq və yaradıcılıq sahələrində yeni ideyaların böyük hissəsi gənclər tərəfindən irəli sürülür. Onlar rəqəmsal dünyanın imkanlarından daha çevik istifadə edirlər. Gənclər həm də cəmiyyətin gələcək simasını formalaşdırırlar. Bu gün məktəbdə, universitetdə, iş həyatında və ictimai fəaliyyətdə olan gənc sabah ölkənin müxtəlif sahələrində qərar verən şəxslərdən biri olacaq. Ona görə də gənclərə yaradılan imkan əslində gələcəyə qoyulan sərmayədir.

Amma gənclik yalnız uğur və imkanlardan ibarət deyil. Bu dövrdə seçimlərin çoxluğu bəzən insanı çətin vəziyyətdə də qoya bilər. Peşə seçimi, gələcəklə bağlı qərarlar, sosial münasibətlər və həyatın digər sınaqları gənclər üçün ciddi məsuliyyət yaradır. Belə məqamda ailənin, təhsilin və cəmiyyətin dəstəyi mühüm rol oynayır. Gənclərə yalnız yol göstərmək kifayət etmir. Onlara öz yolunu seçmək üçün imkan da vermək lazımdır. Çünki gənclik azad düşüncənin, təşəbbüsün və yaradıcılığın ən güclü çağlarından biridir.

Dövlət siyasətinin mühüm istiqamətlərindən biri

Ölkəmizdə həyata keçirilən siyasətlərdən biri də gənclərin hərtərəfli inkişafına şərait yaratmaqdır. Məqsəd onların təhsil alması, peşə qazanması və ictimai həyatda fəal iştirak etməsi üçün imkanları genişləndirməkdir. Gənclərin hüquqlarının qorunması da dövlət siyasətimizin əsas istiqamətlərindəndir. Onların təşəbbüslərinin dəstəklənməsi, yaradıcılıq imkanlarının artırılması və ictimai fəallığının stimullaşdırılması xüsusi əhəmiyyət daşıyır.

Təhsildən əmək bazarına uzanan yol

Gənclərin gələcəyinin qurulmasında təhsilin rolu danılmazdır. Müasir dövrdə yalnız diplom kifayət etmir. Gənclər həm də əmək bazarının tələblərinə uyğun bilik və bacarıqlara sahib olmalıdır.

Bu baxımdan müxtəlif təhsil və inkişaf proqramları gənclər üçün yeni imkanlar yaradır. Peşə hazırlığı, könüllülük, təcrübə proqramları və müxtəlif layihələr gənclərin praktiki bacarıqlarının formalaşmasına kömək edir. Əmək bazarına yeni daxil olan gənc üçün ilk addım xüsusilə vacibdir. Bu mərhələdə yaradılan hər bir imkan onun gələcək karyerasına təsir göstərə bilər.

Gənc sahibkarlara yeni imkanlar...

Son illərdə gənclər arasında sahibkarlığa maraq da artır. Öz biznesini qurmaq istəyən gənclərin ideyalarının dəstəklənməsi bu baxımdan mühüm əhəmiyyət daşıyır. Startaplar və innovativ layihələr üçün yaradılan imkanlar gənclərə öz ideyalarını reallaşdırmaq şansı verir. Bəzən böyük bir biznes ideyası məhz kiçik bir təşəbbüsdən başlayır.

Gənclərin öz işini qurması yalnız onların şəxsi uğuru deyil. Bu, həm də yeni iş yerlərinin yaranmasına və ölkəmizdə iqtisadi fəallığın artmasına töhfə verir.

Könüllülük: Gənclərin həyat məktəbi

Azərbaycanda könüllülük hərəkatının genişlənməsi də gənclərin ictimai fəallığı baxımından diqqətçəkən məqamlardandır. Könüllülük gənclərimizə yalnız təcrübə qazandırmır, həm də komanda ilə işləməyi, məsuliyyət daşımağı və insanlarla düzgün ünsiyyət qurmağı öyrədir.

Bu fəaliyyət gənclərin cəmiyyətə bağlılığını da gücləndirir. Onlar öz əməyinin kiməsə fayda verdiyini gördükcə, ictimai proseslərdə daha fəal iştirak etməyə başlayırlar. Bu gün Azərbaycan gəncləri müxtəlif sahələrdə özlərini göstərirlər. Elm, təhsil, idman, mədəniyyət, texnologiya, media və sahibkarlıq sahələrində uğur qazanan gənclərin sayı artır.

Onların beynəlxalq yarışlarda, forumlarda və müxtəlif layihələrdə ölkəni təmsil etməsi də mühüm məqamdır. Hər bir uğur Azərbaycanın gənclər potensialının göstəricisinə çevrilir.

Qarabağ və Zəngəzurda gənclər üçün yeni üfüqlər

İşğaldan azad edilmiş ərazilərimizin bərpası da gənclərimiz üçün yeni imkanlar yaradır. Burada qurulan şəhər və kəndlər, yaradılan infrastruktur və yeni layihələr gələcəkdə gənclərin təhsil, əmək və sosial fəaliyyətləri üçün geniş perspektivlər vəd edir. Gənc nəslin bu prosesdə iştirakı xüsusi əhəmiyyət daşıyır. Çünki Qarabağın və Şərqi Zəngəzurun gələcəyi həm də orada yaşayacaq, işləyəcək və yeni həyat quracaq gənclərin fəallığından asılıdır.

Yeganə BAYRAMOVA

Paylaş:

Baxılıb: 112 dəfə