Şuşadan verilən mühüm mesajlar: Azərbaycan–Slovakiya münasibətləri yeni inkişaf mərhələsində

Bakı:

31 °C

48 %

5 m/s

Əlaqə

AZ RU EN

Ana səhifə / Arxiv / Şuşadan verilən mühüm mesajlar: Azərbaycan–Slovakiya münasibətləri yeni inkişaf mərhələsində

Şuşadan verilən mühüm mesajlar: Azərbaycan–Slovakiya münasibətləri yeni inkişaf mərhələsində

16.07.2026 [09:59]

Sevda Quluyeva

YAP Kəngərli rayon təşkilatının sədri

İyulun 14-də Azərbaycanın mədəniyyət paytaxtı Şuşada Azərbaycan Respublikasının Prezidenti cənab İlham Əliyev və Slovakiya Respublikasının Prezidenti Peter Pelleqrini mətbuata bəyanatlarla çıxış etdilər. Dövlətimizin başçısının səsləndirdiyi fikirlər Azərbaycan–Slovakiya münasibətlərinin bugünkü vəziyyətini və gələcək inkişaf istiqamətlərini aydın şəkildə ortaya qoydu. Şuşadan verilən mesajlar bir daha göstərdi ki, iki ölkə arasında formalaşan strateji tərəfdaşlıq möhkəm siyasi iradəyə və qarşılıqlı etimada əsaslanır.

Prezident İlham Əliyev bəyanatında məmnunluqla qeyd etdi ki, Slovakiya–Azərbaycan əlaqələrinin inkişafı uğurla davam edir və siyasi təmaslar artıq müntəzəm xarakter alıb. Dövlətimizin başçısı ötən ilin sonunda Slovakiyaya etdiyi rəsmi səfəri xatırladaraq göstərilən qonaqpərvərliyə görə təşəkkürünü bildirdi və vurğuladı ki, bu gün mövcud olan dinamik münasibətlər hər iki tərəfin əməkdaşlığın inkişafına verdiyi önəmin göstəricisidir.

Prezident İlham Əliyev bildirdi ki, bu gün Slovakiya–Azərbaycan siyasi əlaqələri çox yüksək səviyyədədir. Qarşılıqlı səfərlər, aparılan siyasi dialoq və həyata keçirilən birgə layihələr bunu əyani şəkildə nümayiş etdirir. Dövlətimizin başçısı xatırlatdı ki, 2024-cü ildə iki ölkə arasında Strateji Tərəfdaşlığa dair Birgə Bəyannamə imzalanıb və artıq həmin sənədin uğurla icra olunduğu göz önündədir. Bu isə güclü siyasi iradənin və qarşılıqlı etimadın nəticəsidir.

Prezident İlham Əliyev çıxışında vurğuladı ki, yüksək səviyyəli qarşılıqlı səfərlər ölkələr arasında münasibətlərin inkişafında mühüm rol oynayır. Slovakiya Prezidentinin geniş nümayəndə heyəti ilə Azərbaycana səfəri, Şuşada keçirilən görüşlər və aparılan müzakirələr ikitərəfli əməkdaşlığın əhatə dairəsinin getdikcə genişləndiyini göstərir.

Dövlətimizin başçısı qeyd etdi ki, nümayəndə heyətlərinin tərkibi belə gündəliyin nə qədər geniş olduğunu göstərir. Bu gün iki ölkə arasında yalnız dialoq aparılmır, eyni zamanda konkret layihələr üzərində praktiki işlər görülür.

Prezident İlham Əliyevin bəyanatında xüsusi yer tutan məsələlərdən biri də işğaldan azad edilmiş ərazilərdə həyata keçirilən bərpa-quruculuq işləri oldu. Dövlətimizin başçısı Slovakiya şirkətlərinin Qarabağın bərpası prosesində iştirak etdiyini məmnunluqla qeyd edərək bildirdi ki, bu əməkdaşlığın gələcəkdə daha da genişləndirilməsi üçün yaxşı imkanlar mövcuddur.

Bu gün Qarabağ və Şərqi Zəngəzurda həyata keçirilən irimiqyaslı layihələr beynəlxalq tərəfdaşlar üçün də yeni əməkdaşlıq imkanları yaradır. Slovakiya şirkətlərinin bu prosesə qoşulması iki ölkə arasında iqtisadi əməkdaşlığın real nəticələrindən biridir.

Prezident İlham Əliyev bəyanatında enerji məsələlərinə də toxunaraq Azərbaycanın Avropanın enerji təhlükəsizliyinin təmin edilməsində mühüm rol oynadığını vurğuladı. Dövlətimizin başçısı qeyd etdi ki, Azərbaycan bu gün bir çox Avropa ölkələrinin etibarlı enerji tərəfdaşıdır və Slovakiya ilə də bu sahədə əməkdaşlığın inkişafı üçün geniş imkanlar mövcuddur.

Eyni zamanda nəqliyyat, logistika, sənaye, investisiya, yaşıl enerji və digər istiqamətlərdə də əməkdaşlığın genişləndirilməsi üçün böyük potensialın olduğu bildirildi.

Prezident İlham Əliyev vurğuladı ki, aparılan danışıqlar bir daha göstərdi ki, iki ölkənin gündəliyi kifayət qədər genişdir və əməkdaşlığın inkişafı üçün yeni istiqamətlər mövcuddur. Həm siyasi, həm iqtisadi, həm də humanitar sahələrdə əlaqələrin genişləndirilməsi üçün qarşılıqlı iradə mövcuddur.

Şuşada səsləndirilən fikirlər onu göstərir ki, Azərbaycan və Slovakiya qarşılıqlı hörmətə, etibara və strateji tərəfdaşlığa əsaslanan münasibətləri bundan sonra da uğurla inkişaf etdirəcək. Bu münasibətlər yalnız iki ölkənin maraqlarına deyil, həm də Avropanın enerji təhlükəsizliyinə, regional əməkdaşlığın genişlənməsinə və beynəlxalq tərəfdaşlığın möhkəmlənməsinə mühüm töhfə verəcəkdir.

Şuşadan verilən bu mühüm mesajlar bir daha təsdiqlədi ki, Azərbaycan–Slovakiya münasibətləri yeni inkişaf mərhələsinə qədəm qoyur və bu əməkdaşlığın gələcəyi üçün möhkəm siyasi əsas formalaşıb.

Paylaş:

Baxılıb: 275 dəfə