28 May – Müstəqillik Günü: Milli iradəmizin və dövlətçiliyimizin təntənəsi

Bakı:

16 °C

82 %

2 m/s

Əlaqə

AZ RU EN

Ana səhifə / Arxiv / 28 May – Müstəqillik Günü: Milli iradəmizin və dövlətçiliyimizin təntənəsi

28 May – Müstəqillik Günü: Milli iradəmizin və dövlətçiliyimizin təntənəsi

26.05.2026 [12:06]

Azərbaycan xalqının tarixi yüz illərlə davam edən azadlıq və müstəqillik uğrunda mübarizə səhifələri ilə zəngindir. Bu mübarizənin ən parlaq zirvələrindən biri 1918-ci ilin 28 may tarixində Azərbaycan Xalq Cümhuriyyətinin yaranmasıdır. Məhz həmin gün xalqımız əsrlər boyu arzuladığı azadlığa qovuşdu və ilk dəfə olaraq müsəlman Şərqində demokratik, hüquqi respublika qurdu.

1918-ci ilin çətin geosiyasi şəraitində yaradılan Azərbaycan Xalq Cümhuriyyəti çox qısa – cəmi 23 ay yaşasa da, milli dövlətçilik ənənələrinin təməlini qoydu. Yeni dövlətin parlamenti formalaşdırıldı, dövlət atributları qəbul edildi, milli ordu yaradıldı, təhsil və mədəniyyət sahəsində islahatlar həyata keçirildi. Bu dövr xalqın dövlətçilik iradəsinin, azad düşüncəsinin və milli birliyinin rəmzi kimi tarixə həkk olundu. Sovet imperiyası dövründə xalqımız yenidən öz müstəqilliyindən məhrum olsa da, milli ruh sönmədi. Nəhayət, 1991-ci ildə müstəqilliyimiz bərpa edildi. Lakin 1990-cı illərin əvvəllərində ölkə ciddi siyasi və iqtisadi böhran içərisində idi. Məhz bu gərgin dövrdə xalqın çağırışı ilə Ulu Öndər Heydər Əliyev hakimiyyətə qayıtdı və dövlətçiliyimizi xilas etdi.

Heydər Əliyevin dərin zəkası, siyasi müdrikliyi və uzaqgörənliyi sayəsində Azərbaycan müstəqil dövlət kimi möhkəmləndi. Onun əsas hədəfi sabitliyin bərpası, milli birliyin təmin edilməsi və ölkənin inkişaf yoluna çıxarılması idi. Ulu Öndərin məşhur sözləri bu gün də hər bir azərbaycanlının yaddaşındadır:

“Müstəqilliyi qorumaq onu əldə etməkdən daha çətindir.”
“Azərbaycanın dövlət müstəqilliyi əbədidir, dönməzdir və sarsılmazdır!”

Heydər Əliyev müstəqilliyimizi yalnız siyasi hadisə kimi deyil, həm də milli şüurun, vətəndaş məsuliyyətinin və tarixi yaddaşın ifadəsi kimi dəyərləndirirdi. Onun rəhbərliyi ilə qəbul edilən 1995-ci il Konstitusiyası, neft strategiyası və beynəlxalq əlaqələrin qurulması müasir Azərbaycanın dayanıqlı inkişafının bünövrəsini qoydu.

Bu gün Prezident İlham Əliyev Ulu Öndərin siyasi kursunu ardıcıl şəkildə davam etdirir. Onun rəhbərliyi ilə Azərbaycan beynəlxalq aləmdə nüfuzlu bir dövlətə çevrilib, iqtisadiyyat dinamik şəkildə inkişaf edir, sosial rifah güclənir. Uğurlu xarici siyasət nəticəsində ölkəmiz regional təhlükəsizliyin, enerji sabitliyinin və beynəlxalq əməkdaşlığın aparıcı iştirakçısına çevrilib.

2020-ci ildə qazandığımız Vətən müharibəsində Qələbə müstəqil dövlət kimi gücümüzün və birliyimizin bariz təzahürü oldu. Bu qələbə həm də Ulu Öndərin əsas vəsiyyətinin – “Güclü dövlət, qalib xalq” idealının gerçəkləşməsidir. İlham Əliyevin uzaqgörən siyasəti nəticəsində müstəqilliyimiz bu gün daha möhkəm, dövlətimiz isə daha güclüdür.

28 May – təkcə bir tarixi gün deyil, millətimizin kimliyini və əzmini ifadə edən Müstəqillik Günüdür. Bu bayram, Ulu Öndər Heydər Əliyevin yaratdığı sabitlik və Prezident İlham Əliyevin inkişaf strategiyası sayəsində daha dərin məna qazanıb.

Bu gün hər bir azərbaycanlı qürurla deyə bilər: "Bizim müstəqilliyimiz əbədi, dövlətçiliyimiz sarsılmazdır!"

Səltənət Möhsünlü

YAP Tərtər rayon təşkilatının məsləhətçisi

Paylaş:

Baxılıb: 46 dəfə