10 ili tamam olan Aprel döyüşləri Tarixi Zəfərə yol açan başlanğıc idi

Bakı:

20 °C

52 %

4 m/s

Əlaqə

AZ RU EN

Ana səhifə / Arxiv / 10 ili tamam olan Aprel döyüşləri Tarixi Zəfərə yol açan başlanğıc idi

10 ili tamam olan Aprel döyüşləri Tarixi Zəfərə yol açan başlanğıc idi

02.04.2026 [11:34]

Azərbaycanın hərb tarixində özünəməxsus yer tutan Aprel döyüşlərindən düz 10 il ötür. 2016-cı ilin 2-5 aprel tarixlərində baş verən döyüşlərdə Azərbaycan Respublikasının Prezidenti, Ali Baş Komandan cənab İlham Əliyevin rəhbərliyi altında Azərbaycan Ordusu düşmənə ciddi dərs verdi və doğma Qarabağın işğaldan azad ediləcəyi günün uzaqda olmadığını, Ermənistanın işğalçılıq siyasətinin iflasa uğradığını göstərdi. Döyüşlərdən sonra Azərbaycan diplomatik cəbhədə də üstünlük əldə etdi.

Aprel döyüşlərində Azərbaycan Ordusu düşmən üzərində təkcə qələbə əldə etmədi, eyni zamanda “erməni ordusu” haqqında mifi ifşa etdi. Keçirilən əks-əməliyyat zamanı əldə edilən uğurlar, 2000 hektardan çox ərazinin azad olunması Azərbaycan xalqının və dövlətinin işğalla heç vaxt barışmayacağını da sübut etdi. 4 gün davam edən döyüşlər nəticəsində Tərtər rayonunun Talış kəndi, Lələtəpə və Cəbrayıl rayonunun Cocuq Mərcanlı kəndi yaxınlığındakı yüksəkliklər və digər ərazilərimiz işğaldan azad edildi. Talış kəndi istiqamətindəki yüksəkliklərin işğaldan azad edilməsi Naftalan şəhəri üçün təhlükəni aradan qaldırmağa, xüsusilə strateji əhəmiyyət kəsb edən Lələtəpə yüksəkliyinin azad edilməsi Horadiz şəhərinin müdafiəsini gücləndirməyə və ümumilikdə Füzuli rayonu istiqamətində geniş əraziyə nəzarət etməyə imkan yaratdı, habelə Lələtəpə yüksəkliyinin işğaldan azad edilməsi ilə Cəbrayıl rayonunun Cocuq Mərcanlı kəndində də təhlükəsizlik tam təmin edildi. Azərbaycanlı məcburi köçkünlər bərpa işlərindən sonra tarixi yurd yerinə qayıtdılar və beləliklə, aprel qələbəsi Böyük Qayıdış prosesinin başlanğıcı oldu.

Aprel döyüşlərinin ən mühüm hərbi-siyasi əhəmiyyəti ondan ibarət oldu ki, əlverişsiz mövqelərdən əks-hücum əməliyyatı keçirən ordumuz strateji əhəmiyyətli əraziləri azad edərək, cəbhə xəttində konfiqurasiyanı dəyişdirdi. Ümumiyyətlə, aprel döyüşləri həmin dövrdə işğalçı rejimin siyasi vəziyyətinə ciddi təsir göstərdi. Sarkisyanın cinayətkar rejiminin girovuna çevrilən erməni xalqı Aprel döyüşlərindən sonra öz taleyi haqqında düşünməyə başladı. Belə ki, bu döyüşlərdəki məğlubiyyət Ermənistanda hakimiyyət dəyişikliyinin, siyasi böhranın başlanğıcı oldu. Bunun nəticəsi kimi 2 il sonra, 2018-ci ilin aprelində Ermənistanda yeni siyasi qüvvələr hakimiyyətə gəldi.

Aprel döyüşləri Azərbaycan tarixinə qızıl hərflərlə həkk olunmuş 44 günlük Vətən müharibəsində əldə edilən tarixi Zəfərə mühüm çağırış xarakteri daşıyırdı. Müzəffər Ali Baş Komandan İlham Əliyevin bildirdiyi kimi, “Aprel döyüşləri dövlətimizin, xalqımızın, ordumuzun gücünü göstərən qələbədir”. Təsadüfi deyil ki, Azərbaycan Respublikası öz daxili gücünə və iqtisadi imkanlarına arxalanaraq 44 günlük Vətən müharibəsində bütün dünya hərb tarixində mühüm hadisə hesab edilən möhtəşəm Zəfər qazandı.

Bu qələbənin yekunu olaraq 10 il öncə Lələtəpə yüksəkliyində dalğalanan üçrəngli bayrağımız bu gün doğma Qarabağda – Xankəndidə, Şuşada, Laçında və digər işğaldan azad olunan ərazilərimizdə ucaldılmışdır. Aprel döyüşlərində qəhrəmanlıq göstərərək, Zəfər bayrağını növbəti qələbələrə üçün igid oğullara ötürən Vətənə torpağı naminə canını fəda etməyə hazır olduğunu sübut etmiş şəhidlərimiz əbədiyyətə qovuşdular. 10 il öncə xalqımızın qəhrəmanlığının bütün dünyaya nümayiş etdirən Aprel döyüşləri Tarixi Zəfərə yol açan başlanğıc oldu.

Zamir HÜSEYNOV,

Yeni Azərbaycan Partiyası Göygöl rayon təşkilatının sədr müavini

Paylaş:

Baxılıb: 563 dəfə