Azərbaycan qadınının ölkənin tərəqqisində mühüm payı

Bakı:

15 °C

72 %

8 m/s

Əlaqə

AZ RU EN

Ana səhifə / Arxiv / Azərbaycan qadınının ölkənin tərəqqisində mühüm payı

Azərbaycan qadınının ölkənin tərəqqisində mühüm payı

06.03.2026 [13:20]

Azərbaycan qadını tarix boyu xalqımızın mənəvi dayağı, ailənin qoruyucusu və cəmiyyətin inkişafında fəal qüvvə olmuşdur. Onun zəhməti, fədakarlığı və bilik-bacarıqları ölkəmizin tərəqqisində əvəzsiz rol oynamış, hər il qeyd olunan Beynəlxalq Qadınlar Günü qadınların cəmiyyət həyatındakı rolunun yüksək qiymətləndirilməsini bir daha göstərir.

Müstəqil Azərbaycanda qadınların cəmiyyətdəki yeri və rolu həm xalqımızın öz mental ənənələrinə bəslədiyi hörmət, həm də dövlətimizin yeritdiyi siyasət sayəsində yüksək qiymətləndirilir. Çağdaş Azərbaycan qadını ana olmaqla yanaşı, həm də bacarıqlı siyasətçi, iş adamı, dövlət məmuru, xalqın inanıb səs verdiyi deputatdır. Bu fəallıq Azərbaycan qadınının malik olduğu tarixi ənənələrlə yanaşı, ölkəmizdə həyata keçirilən gender siyasətinin mahiyyətindən, qadınlara cəmiyyətin tamhüquqlu üzvü kimi bütün imkanlardan bərabər istifadə üçün zəruri şəraitin yaradılmasından irəli gəlir. Ulu öndər Heydər Əliyevin qətiyyətli addımları nəticəsində 1993-cü ildən qadınların ictimai-siyasi həyata transformasiyası, onların dövlət idarəçiliyində təmsilçiliyi, bütün sahələrdə kişilərlə bərabər hüquqlara malik olması dövlət idarəçiliyi kursunun prioritet istiqamətlərindən birinə çevrilib.

XX əsrdə və müasir dövrdə qadınlarımızın fəaliyyəti daha da genişlənmişdir. Görkəmli alim Zərifə Əliyeva tibb sahəsində, Azərbaycan Respublikasının Birinci vitse-prezidenti Mehriban xanım Əliyeva isə humanitar və sosial layihələrdə ölkənin inkişafına mühüm töhfələr vermişlər. Onların fəaliyyəti qadınlarımızın həm elmi, həm də ictimai sahələrdə ölkənin tərəqqisinə xidmət etdiyini göstərir. Mehriban xanım Əliyevanın ölkənin ictimai-siyasi həyatındakı uğurlu fəaliyyəti, dövlətimiz, dövlətçiliyimiz naminə, xalqın rifahı üçün gördüyü işlər, xeyirxah əməllər bu gün Azərbaycan qadınının nə qədər fəal olduğunu təsdiq edir. Azərbaycanın birinci xanımının hərtərəfli parlaq fəaliyyəti, xeyirxahlıq missiyası, mədəniyyətimizin bütün dünyada təbliği sahəsində gördüyü işlər əsl örnəkdir.

Prezident İlham Əliyevin hər il 8 Mart - Beynəlxalq Qadınlar Günü münasibətilə Azərbaycan qadınlarına ünvanladığı təbrik dövlətimizin başçısının zərif cinsin nümayəndələrinə diqqətinin və ehtiramının təcəssümüdür. Dövlətimizin başçısı 8 Mart- Beynəlxalq Qadınlar Günü münasibətilə Azərbaycan qadınlarına budəfəki təbrikində respublikamızın qazandığı uğurlarda, 44 günlük Vətən müharibəsindəki şanlı Qələbəmizdə qadınların rolunu yüksək qiymətləndirib: “Azərbaycan qadını milli dövlət quruculuğu işinin fəal iştirakçısı kimi müstəqillik illərindəki nailiyyətlərimizin zirvə nöqtəsinə yüksəlməyimiz və parlaq Qələbə sevinci yaşamağımız naminə var qüvvəsini səfərbər etmişdir. Göz açıb azad gördüyü yurdunu ana qədər müqəddəs bilən, milli ideallara sadiq gənc nəsli də o, məhz öz mənəvi gücü, polad iradəsi hesabına yetişdirmiş, tarixin hökmü ilə ədalətin zəfər çalacağına və haqq işimizin qalib gələcəyinə həmin nəslin qəlbində sarsılmaz inam duyğusu aşılamışdır. Azərbaycan qadınının müasir dövlətçiliyimizə ən dəyərli töhfəsi olan bu nəsil 44 günlük Vətən müharibəsində rəşadəti ilə xalqımızın mübarizlik rəmzinə dönərək ümidləri tam doğrultmuşdur”.

Vətən müharibəsi zamanı Azərbaycan anaları isə əsl qəhrəmanlıq nümunəsi göstərmiş, övladlarını Vətən uğrunda mübarizəyə göndərərək cəmiyyətə böyük mənəvi dayaq olmuşlar. Şəhid analarının iradəsi və fədakarlığı xalqımızın qürur mənbəyidir və gələcək nəsillər üçün örnək təşkil edir.

Bu gün Azərbaycan qadınları elm, təhsil, səhiyyə, mədəniyyət və digər sahələrdə əldə etdikləri uğurlarla ölkəmizin tərəqqisinə töhfə verməyə davam edirlər. Onların zəngin tarixi irsi, yüksək mənəvi keyfiyyətləri və cəmiyyətə verdikləri dəyər Azərbaycan dövlətinin sosial və mədəni inkişafının möhkəm dayaqlarından biridir.

İsa İsayev

YAP Naftalan şəhər təşkilatının fəalı, Vətən müharibəsi veteranı

Paylaş:

Baxılıb: 270 dəfə