Kollektiv Qərbin müharibə “arzusu”...

Bakı:

25 °C

57 %

8 m/s

Əlaqə

AZ RU EN

Ana səhifə / Analitik / Kollektiv Qərbin müharibə “arzusu”...

Kollektiv Qərbin müharibə “arzusu”...

22.02.2024 [10:43]

Kiyevi daha aktiv şəkildə silahlandırmanın əsl məqsədi

Günel ABBAS

Son illərin ən mühüm siyasi - hərbi hadisəsi kimi xarakterizə olunan Ukrayna-Rusiya müharibəsi üçüncü ilə qədəm qoymaqdadır. Son iki ildə baş verənləri göz önünə aldıqda münaqişənin bu qədər uzanmasında bəzi məqamlarda kənar təsirlərin daha böyük rol oynadığını görməmək mümkün deyil.

Təbii ki, münaqişənin sülh və danışıqlar yolu ilə həlli istiqamətində də addımlar atıldı - xüsusilə, Türkiyənin vasitəçiliyi ilə həyata keçirilən təşəbbüslər daha mühüm uğurları ilə yadda qaldı. İlk dəfə Ataliyada bir araya gələn iki tərəfin rəsmi nümayəndələri hətta müəyyən humanitar atəşkəslə bağlı da razılığa gəlmişdilər. Yaranan situasiyanın daha yüksək səviyyədə inkişafına zəmin də vardı. Amma təəssüf ki... Bu barədə bir az sonra.

Vurğulandığı kimi, münaqişənin danışıqlar mərhələsinə keçidi baş tutmadı və Türkiyənin keçmiş xarici işlər naziri Mövlud Çavuşoğlunun da ifadə etdiyi kimi, “Bəzi NATO üzvləri müharibənin bitməsini istəmədi”. Prosesin uzanmasında maraqlı olanlar münasibətlərin danışıqlar yolu ilə deyil, hərbi yolla ayırd edilməsi üçün “səfərbər” oldular. Təəssüf ki, bu, hələ də davam edir...

Müharibə iştirakçılarını kimlər silahlandırır?

Vurğulanmalıdır ki, müharibənin başlandığı ilk günlərdən bəzi ölkələr öz “yerini” dəqiqləşdirərək münaqişə tərəfinə çevrildi. Bu sırada kollektiv Qərb daha “fəal” görünürdü. Xüsusilə, NATO ölkələri Ukraynanı silah-sursatla “təmin edərək” müharibənin uzanması üçün demək olar ki, “əllərindən gələni” edir. Məsələn, ABŞ Ukraynaya maddi yardım məsələsində müəyyən “gecikmələr” yaratsa da, silah tədarükünü “yubatmır” - ötən həftə NATO -nun Ukraynaya 2024-cü il ərzində bir milyon pilotsuz uçuş aparatı tədarük ediləcəyi bildirilmişdi. Statistikaya nəzər salsaq, mənzərə daha aydın olar:

- 2023-cü ildə ABŞ Ukraynaya 24 milyard dollar məbləğində yardım edib.

- Cari il üçün isə bu məbləğin 60 milyard dollar olacağı gözlənilir. Sadəcə olaraq, bu məbləğin tədarükünə ABŞ parlamenti hələ ki, razılıq verməyib.

Ukraynanın digər “sponsoru” Avropa İttifaqı isə Kiyevə 2023-cü il üçün 18 milyard avro ayırmışdısa, bu il üçün 50 milyard avro nəzərdə tutulub.

Bu rəqəmlər isə bir mənada həm də münaqişənin davamı üçün yaradılan şəraitdir. Başqa sözlə, müharibənin davamına ayrılan “sərmayə” Avropanın mərkəzində sülhə nail olunmasını gecikdirən ən böyük amillərdəndir.

Qərb müharibənin bitməyini istəmir

Konkret son günlərdə elan edilən hərbi yardımlara diqqət edək:

- İsveç hökuməti Ukraynaya 7,1 milyard kron (630 milyon avro) dəyərində indiyə qədər ən böyük hərbi yardım paketini təqdim edib;

- Finlandiyanın sayca 22-ci hərbi yardımı təxminən 190 milyon avro dəyərindədir;

- Kanada Ukraynaya 800-dən çox “SkyRanger R70” pilotsuz uçuş aparatı göndərəcək.

Beləliklə, müharibənin bitməmə səbəblərinin başında gələn amil özünü açıq şəkildə göstərir. Kollektiv Qərb düşünür ki, Rusiya - Ukrayna cəbhəsində müharibənin dayandırılması onların hətta digər regionlardakı maraqlarını risk altına qoyur. Bu mənada Qərb yaratdığı yeni “nizamın” hələki davam etməsini stimullaşdırır. Bu mənada, Ukraynada baş verən qan-qadanın “ssenari müəllifi” qismində həm də Qərbin çıxış etdiyini söyləmək mümkündür. Kollektiv Qərb bütövlükdə regional proseslərdə patronajlığını davam etdirmək üçün Ukraynanı güdaza verir - bu gün Ukraynanın düşdüyü vəziyyət acınacaqlıdır. Ölkə bir dövlət kimi məhv olmaq təhlükəsi ilə üz-üzədir. Niyə? Kollektiv Qərbin maraqları ucbatından. Sülh və danışıqlar yolunu birmənalı rədd edən, Ukraynaya ağlagəlməz yalan vədlər verən, onu Aİ, NATO üzvü “edəcəyinə arxayınlaşdıran”lar korporativ maraqlarının arxasınca “sürünür”.

Paylaş:

Baxılıb: 820 dəfə