G7-nin onlayn sammiti

Bakı:

25 °C

47 %

6 m/s

Əlaqə

AZ RU EN

Ana səhifə / Analitik / G7-nin onlayn sammiti

G7-nin onlayn sammiti

08.12.2023 [11:10]

Rusiyaya qarşı embarqo tətbiq edilməsi ilə əlaqədar qərar qəbul edilib

Nardar BAYRAMLI

“Böyük Yeddilik” (G7) ölkələrinin liderləri dekabrın 6-da videobağlantı vasitəsilə məsləhətləşmələr aparıblar. Tədbirin gündəliyi və bununla bağlı hər hansı təfərrüat əvvəlcədən açıqlanmayıb. ABŞ tərəfi məsləhətləşmələrin bağlı qapılar arxasında keçirildiyini təsdiqləyib. Qeyd edək ki, bu il Yaponiya G7-yə sədrlik edir.

Son vaxtlar Avropa İttifaqı və Birləşmiş Ştatlarda Ukraynaya yardım məsələləri ilə bağlı aktiv müzakirələr davam edir. “Financial Times” nəşrinin yazdığına görə, dekabrın 14-15-də Brüsseldə keçiriləcək sammit ərəfəsində Avropa İttifaqına üzv dövlətlər büdcənin doldurulması və Ukraynaya 50 milyard avronun ayrılmasına dair müzakirələr aparacaq.

Dünən isə ABŞ Konqresində respublikaçılar və demokratların sərhəd məsələsi və Ukraynaya yardım barədə razılığa gəlmək cəhdləri uğursuz alınıb. Respublikaçılar Cozef Baydenin bir paketdə 106 milyard dollarlıq “milli təhlükəsizlik” tələbini təsdiqləmək üçün sərhəddə immiqrasiya nəzarətinin gücləndirilməsini tələb edirlər. Bütün bunların fonunda G7 liderlərinin onlayn keçirilən görüşündə mühüm məsələlərin müzakirəsi gözlənilən idi. Görüşün qapalı olması bu ehtimalı daha da gücləndirmiş oldu.

Yeri gəlmişkən, G7 ölkələri 2024-cü ilin 1 yanvarından etibarən Rusiya brilyantlarına qarşı embarqo tətbiq edilməsi ilə əlaqədar qərar qəbul ediblər. Bu barədə G7 nazirlərinin görüşündə qəbul edilmiş yekun bəyannaməyə istinadən Reuters məlumat yayıb. Bəyannamədə qeyd olunur ki, 2024-cü ilin 1 martından başlayaraq həmçinin Rusiya brilyantlarının üçüncü ölkələrdən idxalına da mərhələli şəkildə qadağa tətbiq olunacaq. Sentyabrın 1-dək Rusiyanın emal olunmamış brilyantlarının digər ölkələrin məhsulu kimi idxalını önləyəcək effektiv yoxlama və sertifikatlaşdırma mexanizmi hazırlanaraq tətbiq ediləcək. Qadağa sənaye almazlarını əhatə etməyəcək.

Onu da qeyd edək ki, bu qadağa Ermənistan üçün böyük problemə səbəb ola bilər. Çünki İrəvan Rusiyadan emal olunmamış brilyantları alaraq emal edib satmaqla külli miqdarda gəlir əldə edir. Bu ilin 9 ayında Ermənistan yalnız Birləşmiş Ərəb Əmirliklərinə 600 milyon dollara yaxın dəyərdə brilyant və zinət əşyaları ixrac edib. Ona görə də, Ermənistanın gəlirləri əhəmiyyətli dərəcədə azalacaq. Nəzərə alaq ki, Rusiyaya qarşı tətbiq olunan sanksiyalardan istifadə edən erməni hökuməti sanksiyalardan yayınmaqla xeyli gəlir əldə edir. G7 yaxın gələcəkdə bu məsələyə də baxarsa, Ermənistan daha da çətin vəziyyətə düşəcək.

Paylaş:

Baxılıb: 917 dəfə