Əhalinin 71.3 faizi “hə” deyir…

Bakı:

21 °C

64 %

1 m/s

Əlaqə

AZ RU EN

Ana səhifə / Analitik / Əhalinin 71.3 faizi “hə” deyir…

Əhalinin 71.3 faizi “hə” deyir…

16.09.2023 [12:10]

STM “Azərbaycan Qarabağda qanunsuz silahlı qruplaşmalara qarşı yeni hərbi əməliyyatlar keçirməlidirmi?”mövzusunda sorğu keçirib

Nardar BAYRAMLI

44 günlük müharibədən sonra imzalanmış üçtərəfli bəyanatın 4-cü bəndində sülhməramlı kontingentin erməni silahlı qüvvələrinin çıxarılmasına paralel yerləşdirilməsi öz əksini tapıb. Münaqişədən ötən müddət ərzində Ermənistanın Azərbaycanın Qarabağ bölgəsi daxil olmaqla ərazi bütövlüyünü tanımasına baxmayaraq, silahlı qruplaşmaların hələ də çıxarılmaması və davam edən təxribatlar növbəti hərbi əməliyyatların keçirilməsi mövzusunu gündəmə gətirib.

Sosial Tədqiqatlar Mərkəzi (STM) mövzunun aktuallığını nəzərə alaraq, vətəndaşlar arasında rəy sorğusu keçirib. Azərbaycanda respondentlərin 71,3 faizi “Azərbaycan Qarabağda qanunsuz silahlı qruplaşmalara qarşı yeni hərbi əməliyyatlar keçirməlidirmi?” sualına “bəli” cavabı verib. Sorğuda iştirak edənlərin 24.1%-i əks mövqedən çıxış edərək yeni hərbi əməliyyatların keçirilməsini istəmədiyini bildirib. Respondentlərin 4.6%-i bu suala cavab verməkdə çətinlik çəkib.

Vətəndaşlar eyni mövqeni əvvəlki sorğularda da təsdiqləyib

Nəticələri ötən ilin müxtəlif dövrləri üzrə müqayisə etdikdə, Sosial Tədqiqatlar Mərkəzinin 2022-ci ilin avqust ayında keçirdiyi rəy sorğusunda Qarabağda erməni silahlı qruplaşmalarına qarşı hərbi əməliyyatların keçirilməsini 80.5% respondent dəstəkləmişdi. 6.8%-i əks mövqedə qərarlaşmış, 12.7%-i bu suala cavab verməkdə çətinlik çəkmişdi. Sentyabr ayında Qarabağda erməni silahlı qruplaşmalarına qarşı hərbi əməliyyatların keçirilməsini dəstəkləyənlər 85.0% təşkil etmişdi. 9.5% respondent yeni hərbi əməliyyatları dəstəkləməmişdi. 5.5%-i bu suala cavab verməkdə çətinlik çəkmişdi.

Rəy sorğusunun dekabr ayı üzrə göstəricilərində yeni hərbi əməliyyatların keçirilməsinə respondentlərin 48.0%-i dəstəyini ifadə etmişdi. Onların 39.6%-i yeni hərbi əməliyyatların keçirilməsi ilə bağlı əks mövqeyini ifadə etmişdi. 12.4%-i bu sualla bağlı rəyini ifadə etməkdə çətinlik çəkmişdi.

Qeyd edək ki, sorğunun sahə işi (məlumatların toplanılması) 2023-cü ilin 08 – 11 sentyabr tarixləri arasında icra olunub. Sorğular telefonla müsahibə formasında keçirilib və 18 yaşından yuxarı 390 respondent iştirak edib. Sorğuda Bakı, Abşeron-Xızı, Dağlıq Şirvan, Gəncə-Daşkəsən, Qazax-Tovuz, Lənkəran-Astara, Quba-Xaçmaz, Şəki-Zaqatala, Qarabağ, Mərkəzi Aran, Mil-Muğan, Şirvan-Salyan iqtisadi rayonları əhatə edilib. Respondentlərin gender bərabərliyi qorunmaqla seçmə çərçivəsi əhali sayına proporsional müəyyən edilib.

Hərbi ekspert: Ermənilərin artan təxribarları əməliyyatları zəruri edir

Mövzu ilə bağlı qəzetimizə açıqlama verən hərbi ekspert Ədalət Verdiyev bildirib ki, son vaxtlar Ermənistanın hərbi təxribatlarını artırması bölgədə vəziyyəti gərginləşdirir. Azərbaycanla şərti sərhəddə canlı qüvvə və hərbi texnika toplayan erməni tərəfi ordumuzun mövqelərini davamlı olaraq atəşə tutur. Digər tərəfdən, Rusiya sülhməramlı kontingentinin məsuliyyət zonasında mövcud olan qanunsuz erməni silahlı dəstələri də təxribatlarını artırıblar. Ekspertin sözlərinə görə, əks-tədbirlərin, anti-terror əməliyyatlarının keçirilməsi Azərbaycanın prioriteti olmasa da, ermənilərin artan təxribatları ordumuza başqa çıxış yolu qoymur. Çünki Azərbaycan-Ermənistan şərti sərhədində, həm də rus sülhməramlılarının müvəqqəti məsuliyyət zonasında ermənilərin təxribatlarının sayı xeyli dərəcədə artıb.

Ə.Verdiyevin fikrincə, bütün bunların əsas səbəbi Ermənistanın sülhə maraqlı olmaması, eləcə də qanunsuz erməni silahlı dəstələrinin ərazimizdən çıxarılmamasıdır. Belə vəziyyət qaldıqca, bölgədə gərginlik səngimir, erməni təxribatları davam edir. Qarşı tərəf gərginliyi artırmaqda maraqlı görünür. Əgər işğalçı ölkə fəaliyyətində dəyişiklik etməzsə, silahlı toqquşmalar qaçılmaz olacaq. “Ümumiyyətlə, Azərbaycanın səbri tükənib. Xankəndi, Xocavənd və Xocalı sakinləri doğma yurd-yuvalarına qayıtmaları üçün beynəlxalq ictimaiyyətə müraciət ediblər. Azərbaycan dövləti də bu müraciəti və ərazidə baş verən prosesləri nəzərə alaraq yəqin ki, qanunsuz erməni silahlılarının təxribatlarına daha effektiv, kifayət qədər adekvat cavab verəcək. Düşünürəm ki, rus sülhməramlılarının müvəqqəti nəzarətində olan ərazilər qanunsuz erməni silahlı dəstələrindən təmizlənməlidir və belə də olacaq”.

Paylaş:

Baxılıb: 1030 dəfə