ABŞ Ukraynaya hərbi yardım paketi ayırdı

Bakı:

19 °C

88 %

2 m/s

Əlaqə

AZ RU EN

Ana səhifə / Analitik / ABŞ Ukraynaya hərbi yardım paketi ayırdı

ABŞ Ukraynaya hərbi yardım paketi ayırdı

19.09.2025 [09:41]

Məqsəd Rusiyanı hədəfinə çatmağa imkan verməməkdir

Ukrayna ordusu daha müasir ABŞ silahları ilə təmin olunacaq. Belə ki, “Reuters” agentliyi öz mənbələrinə istinadən qeyd edib ki, ABŞ Prezidenti Donald Trampın administrasiyası Ukraynaya avropalı müttəfiqlər tərəfindən ödənilən ilk hərbi yardım paketini təsdiqləyib. Agentliyin məlumatına görə, bu yardım paketi Ukrayna ordusunu həm müdafiə, həm də hücum xarakterli yeni effektiv silahlarla təzcih etmək üçün nəzərdə tutulub. Qeyd edək ki, iyul ayında Tramp bəyan etmişdi ki, ABŞ və Avropa ölkələri Ukraynaya hərbi yardımın göstərilməsi üçün yeni sxem üzrə razılığa gəliblər - o, vurğulayıb ki, Amerika silahlarının yeni tədarükü Aİ ölkələri tərəfindən ödəniləcək.

Ekspertlərin fikrincə, Tramp administrasiyasının Ukraynaya hərbi yardım paketini təsdiqləməsi onu deməyə əsas verir ki, Vaşinqton NATO-dakı avropalı müttəfiqləri ilə bərabər Rusiyaya qarşı vahid cəhbədə birləşmək qərarına gəlib - Ağ Evin əsas hədəfi dolayı yolla Ukraynanın silahlandırılmasını sürətləndirməklə cəbhədə hazırkı vəziyyəti Rusiyanın əleyhinə çevirmək, rus ordusunu daha ağır və acınacaqlı duruma salmaq - nəticə etibarı ilə Moskvanı cəzalandırmaqdır.

Məsələ ilə bağlı politoloq Məhəmməd Əsədullazadə “Yeni Azərbaycan” qəzetinə şərhində qeyd edib ki, Ağ Ev Moskvanın davranışlarından məmnun deyil.

“Bu ilin fevralından etibarən ABŞ ilə Rusiya arasında aparılan danışıqlarda, xüsusilə də avqustun 16-da Alyaskada baş tutan Tramp-Putin görüşündə heç bir müsbət nəticə əldə olunmadı. Tramp Putini bir çox məsələlərdə razı sala bilmir. Kremlin rəhbəri nə danışıqlar masasına oturmaq, nə də Ukraynada müharibəni dayandırmaq istəyir - belə demək mümkünsə, Rusiya rəhbərliyi Ukraynada öz hədəflərinə nail olmaqda israrlıdır. Moskva Ukraynanın bütün cənub-şərq ərazilərini öz nəzarəti altına almaq, rəsmi Kiyevə NATO-ya üzv olmağa imkan verməmək və Şərqi Avropada öz geosiyasi maraqlarını həyata keçirmək, ən əsası da fövqəl güc mərkəzi olmaq məqsədi güdür. Bu, Qərb üçün qətiyyən qəbuledilməzdir. Bugünlər Belarusda aparılan genişmiqyaslı “ZAPAD-2025” hərbi təlimlərinə nəzər yetirsək, başa düşərik ki, Kreml Ukraynada müharibəni öz hədəflərinə nail olana qədər davam etdirməkdə maraqlıdır,” - deyə M.Əsədullazadə bildirib ki, artıq Rusiya NATO-ya üzv olan ölkələrə də təhdid edir; “Rusiya Polşa və Ruminiyada dronlar vasitəsilə hərbi kəşfiyyat uçuşları həyata keçirir - məqsəd də NATO-nun hava hücumundan müdafiə sistemlərinin dayanıqlığını yoxlamaqdır. Həm ABŞ, həm də Avropa ölkələri bunun fərqindədirlər, yəni vəziyyət təhlükəli xarakter almağa başlayıb. Başa düşürlər ki, NATO Rusiyaya qarşı konkret addımlar atmalıdır. Hazırda ABŞ Avropadakı müttəfiqləri ilə Rusiyaya qarşı birgə tədbirlər barədə müzakirələr aparır. Doğrudur, Tramp bu yaxınlarda bəyan edib ki, ilk növbədə Avropa ölkələri bu istiqamətdə addım atmalıdır, xüsusilə də Rusiyadan neft idxalını dayandırmalıdır, ondan sonra Ağ Ev birgə sanksiyaları nəzərdən keçirə bilər. Putinin Ukraynada apardığı siyasət ABŞ və Avropanı bir-birinə daha da yaxınlaşdırır”. Ekspert əlavə edib ki, ABŞ-ın hazırki administrasiyası tərəfindən Ukraynaya hərbi yardım paketinin ayrılması bir sıra siyasi məqsədlərə söykənib. “Təbii ki, Avropa ölkələri ABŞ-dan bir milyard dollar dəyərində olan hücum xarakterli silahları alacaq, sonra isə bu silahları Ukraynaya ötürəcək. Hər ikisinin əsas məqsədi Rusiyanı daha ağır təzyiqlər altına qoymaq, rus ordusunun itkilərini çoxaltmaq və Moskvanı danışıqlar masasına oturmağa məcbur etməkdir”.

Yunis ABDULLAYEV

Paylaş:

Baxılıb: 446 dəfə