Toplaşa bilmədilər

Bakı:

28 °C

59 %

12 m/s

Əlaqə

AZ RU EN

Ana səhifə / Xəbər lenti / Toplaşa bilmədilər

Toplaşa bilmədilər

07.03.2024 [10:30]

Nardar BAYRAMLI

Azərbaycanın 44 günlük Vətən müharibəsi nəticəsində öz torpaqlarını erməni işğalından azad etməsi müəyyən beynəlxalq dairələrdə ciddi narahatlığa səbəb oldu. Həmin dairələr müxtəlif bəhanələrlə ölkəmizin dünyada imicinə zərbə vurmaq üçün qərəzli kampaniyalar həyata keçirirlər. Ötən ilin sentyabrında isə ordumuzun keçirdiyi antiterror tədbirləri nəticəsində Qarabağda erməni separatizminə son qoyulması, suverenliyimizin tam bərpası isə sözügedən dairələrin əsl simasını tam çılpaqlığı ilə üzə çıxardı. Fransa başda olmaqla bəzi Qərb ölkələri əsassız olaraq Azərbaycanı etnik təmizləmədə ittiham etməyə çalışdılar. Lakin real faktlar onların bu iddialarını ifşa etmiş olur. Lakin buna baxmayaraq, Qərbdə müxtəlif qeyri-hökumət təşkilatlarının vasitəsilə qondarma “artsax” məsələsinin gündəmə gətirilməsi üçün cəhdlər davam edir.

Dövlət Komitəsi: Tədbirin istənilən səviyyədə baş tutmaması diasporumuzun fəallığının nəticəsidir.

Belə cəhdlərdən biri də Almaniyada edilib. Xarici Əlaqələr üzrə Alman Şurasının və Konrad Adenauer Fondunun təşkilatçılığı ilə martın 6-da Berlində “Artsaxın mədəni irsi” tədbirin keçirilməsi nəzərdə tutulurdu. Məsələ ilə bağlı Azərbaycan QHT-ləri Xarici Əlaqələr üzrə Alman Şurasının direktoru Quntram Volfa və Konrad Adenauer Fondunun sədri Norbert Lammertə açıq məktub ünvanlayaraq qərəzli və ermənipərəst təbliğat tədbirini ləğv etməyə çağırmışdılar. Müraciətdə qeyd olunurdu ki, 2020-ci ilin 44 günlük müharibəsi və 2023-cü ilin sentyabrında baş verən antiterror tədbirləri nəticəsində Azərbaycanın ərazi bütövlüyü və suverenliyi tam təmin olunub. Bu gün Azərbaycan dövləti öz gücünə Qarabağ və Şərqi Zəngəzurda Ermənistandan miras qalan 1,5 milyondan çox mina və partlamamış hərbi sursatdan ərazinin təmizlənməsi, genişmiqyaslı quruculuq və bərpa işləri ilə məşğuldur. “İndi sual edirik: yalan, saxtakarlıq və riyakarlıq üzərində qurulmuş “Arsaxın mədəni irsi” nəşri üzərində birtərəfli, qərəzli müzakirələr təşkil etməkdə məqsədiniz nədir? Berlində Azərbaycan və Ermənistanın xarici işlər nazirlərinin görüşündən dərhal sonra bu tədbirin təşkili qarşılıqlı etnik nifrəti artırmağa və sülh danışıqlarına zərbə vurmağa yönəlmiş addımların bir hissəsidir”,-deyə müraciətdə vurğulanırdı.

Qeyd edək ki, Almaniyadakı diasporumuz sözügedən tədbirin ləğvi üçün fəallıq göstərib. Diasporla İş üzrə Dövlət Komitəsindən verilən məlumata görə, martın 5-də tədbirin onlayn keçiriləcəyi barədə məlumat yayılıb. Məqsəd guya təqdimatın təhlükəsizlik şəraitində keçirilməsini təmin etməkdir. “Ermənilər martın 6-da Berlində “Artsaxın mədəni irsi” adlı kitabın təqdimatı məqsədilə geniş tədbir keçirməyi planlaşdırırdılar. Qeyd edək ki, Avropada yaşayan azərbaycanlılar və diaspor təşkilatları təqdimat mərasimində iştirak etmək üçün qeydiyyata düşmək məqsədilə davamlı olaraq müraciətlər edib və tədbirin qarşısının alınması üçün ciddi cəhd göstəriblər. Berlində “Artsaxın mədəni irsi” adlı kitabın təqdimat mərasiminin istənilən səviyyədə baş tutmaması Azərbaycan diasporunun fəallığının nəticəsidir”,-deyə Dövlət Komitəsindən vurğulanıb.

İcma: Ermənistandan azərbaycanlıların qovulması və onların mədəni irsinin dağıdılması mövzusunda tədbirlər keçirilməlidir

Yeri gəlmişkən, Qərbi Azərbaycan İcması da Berlində “Artsax mədəni irsi” haqqında tədbirin keçirilməsi cəhdlərinə münasibət bildirib. Qeyd olunub ki, öz dini təəssübkeşlik baxışlarını gizlətməyən Daqmar Heller adlı şəxsin Azərbaycanın ərazi bütövlüyünə qəsd edən başlığa malik və iftiralarla dolu kitabının təqdimatına həsr edilmiş bu tədbir anti-Azərbaycan xarakteri daşıyır. “Xatırlatmaq istərdik ki, özünü peşəkar və bitərəf qurum kimi qələmə verən Almaniya Xarici Əlaqələr Şurası Azərbaycan mədəni irsinin dağıdılması, bir milyon azərbaycanlının etnik təmizləməyə məruz qalması mövzularında bir dəfə də olsun tədbir keçirməyib və öz nəşrlərində, hesabatlarında bu məsələni görməzdən gəlib. Ermənistanın öz ərazisində və işğal etdiyi Azərbaycan ərazilərində ölkəmizin mədəni irsini kütləvi şəkildə dağıtması faktına göz yummuş bir elmi qurumun, indi bir ovuc qərəzli, radikal ünsürləri yığıb Qarabağda erməni abidələrinə təhlükə olması “ehtimalı” barədə tədbir keçirməsi dini və etnik əsasda ayrı-seçkilikdir və elm adına böyük utancdır”,-deyə açıqlamada vurğulanıb.

Qərbi Azərbaycan İcması, həmçinin Almaniya Xarici Əlaqələr Şurasından həmin tədbirdən imtina etməyi, əsas diqqətini Ermənistandan azərbaycanlıların qovulması və onların mədəni irsinin tamamilə dağıdılması kimi baş vermiş haqsızlıqlara yönəltməyi, məhz bu mövzularda tədbir keçirməyi tələb edib.

Paylaş:

Baxılıb: 575 dəfə