Daha 25 ailə...

Bakı:

27 °C

54 %

11 m/s

Əlaqə

AZ RU EN

Ana səhifə / Xəbər lenti / Daha 25 ailə...

Daha 25 ailə...

29.12.2023 [10:44]

Laçına köç davam edir

İşğaldan azad olunmuş ərazilərimizə qayıdış prosesi davam etməkdədir. Vaxtilə doğma yurdlarını tərk etmək məcburiyyətində qalan vətəndaşlarımız bu gün möhtəşəm iftixar hissi ilə dədə-baba torpaqlarına qovuşurlar. Dövlət başçısının müvafiq göstərişi ilə həmin ərazilərdə mühüm layihələr, proqramlar həyata keçirilir. Yeni binalar, məktəblər, bağçalar, xəstəxanalar tikilir, müxtəlif iş yerləri açılır.

Bir zamanlar doğma torpaqlarını tərk edən soydaşlarımızdan biri də Laçın sakinləri idi. Məlumdur ki, Ordumuzun şanlı Zəfəri Ermənistanı kapitulyasiyaya və əraziləri boşaltmağa məcbur etdi. Üçtərəfli Bəyanata əsasən, 2020-ci il dekabrın 1-də Laçın rayonu Ermənistan ordusu tərəfindən boşaldıldı. 2023-ci il mayın 27-də isə Laçına ilk köç baş tutmuşdu.

Laçında məskunlaşanlar 1555 nəfər oldu

Dünən Laçın şəhərinə növbəti köç karvanı yola salınıb. Bu mərhələdə Laçın şəhərinə daha 25 ailə (80 nəfər) köçürülüb. Bununla da Laçın şəhərində 408 ailənin-1555 nəfərin daimi məskunlaşması təmin olunub.

Laçında erməni vəhşiliyi...

Laçın 18 may 1992-ci ildə Ermənistan silahlı birləşmələri tərəfindən işğal olunmuşdu. Erməni işğalçıları rayonun yüzlərlə mədəni-məişət obyektini, onlarla qəsəbə, kənd və tarixi abidələrini dağıdaraq talan ediblər. İşğal nəticəsində 63 min 341 Azərbaycan vətəndaşı öz yurdundan didərgin düşüb, 300-dən artıq hərbçi, eləcə də mülki şəxs həlak olub və itkin düşüb. Rayonda 8950 bina, o cümlədən 7 sənaye və tikinti müəssisəsi, 471 xidmət idarəsi, 154 məktəb, yüzlərlə tarix-mədəniyyət abidəsi işğala məruz qalıb.

Azərbaycanın siyasi-diplomatik müstəvidə qələbəsi

28 il ərzində işğalçı dövlət beynəlxalq hüquq normalarına, zəbt olunan Azərbaycan torpaqlarından Ermənistan qoşunlarının qeyd-şərtsiz çıxarılmasına dair BMT-nin qətnamələrinə məhəl qoymayıb. Azərbaycan Ordusu sentyabrın 27-dən başlayan əks-hücum əməliyyatları nəticəsində 30 ilə yaxın işğal altında qalan torpaqlarımızı azad etməklə həm BMT Təhlükəsizlik Şurasının yerinə yetirmədiyi missiyası həyata keçirib, həm də tarixi ədaləti bərpa edib.

Laçının işğaldan azad edilməsi Azərbaycanın həm hərbi, həm də siyasi-diplomatik müstəvidə qələbəsidir. Vətən müharibəsində əldə etdiyimiz Qələbə nəticəsində imzalanmış üçtərəfli Bəyanata əsasən, 2020-ci ilin 1 dekabr tarixində Laçın rayonu Azərbaycana təhvil verildi.

Laçının yeni inkişaf dövrü...

Azad edilmiş digər ərazilərimizdə olduğu kimi, Laçın rayonuna da həyat yenidən qayıdır. Dövlət başçısının tapşırığı ilə Laçında müxtəlif infrastruktur layihələrinin icrası uğurla davam etdirilir. Bir zamanlar məcburi köçkün həyatı yaşamış soydaşlarımız bu gün sevincli və qürurlu şəkildə doğma torpaqlarına qovuşurlar.

Prezident İlham Əliyevin rəhbərliyi ilə bütün işğaldan azad olunmuş ərazilərdə o cümlədən Laçın rayonunda geniş miqyaslı tikinti quruculuq işləri görülür. Rayonun yol-nəqliyyat infrastrukturu yenidən qurulur. Prezidentin sərəncamına əsasən tikilən Kəlbəcər-Laçın avtomobil yolunun uzunluğu 72,8 kilometrdir. Yol üzərində 3 tunelin tikintisi aparılacaq. Tunellərin ümumi uzunluğu 9450 metr olacaq. 2025-ci ildə Laçında Beynəlxalq Hava Limanının istifadəyə verilməsi planlaşdırılır. İşğaldan azad olunmuş ərazilərdə, o cümlədən Laçında hava limanının inşası bölgənin beynəlxalq statusunu artıracaq. Burada aeroportun tikilməsi, ümumilikdə, bölgənin sosial-iqtisadi inkişafına təkan verəcək və turizm potensialının artırılmasına səbəb olacaq. Laçın hava limanının inşası həm də işğaldan azad edilmiş tarixi torpaqlarımızda aparılan abadlıq-quruculuq işlərinin miqyasını göstərir.

Əminik ki, doğma Laçınımız tezliklə öz əvvəlki şöhrətini bərpa edəcək və yenə də cənnət məkana çevriləcək...

Yeganə BAYRAMOVA

Paylaş:

Baxılıb: 576 dəfə