Azərbaycan tranzit-nəqliyyat sahəsində etibarlı tərəfdaşdır

Bakı:

21 °C

78 %

3 m/s

Əlaqə

AZ RU EN

Ana səhifə / Xəbər lenti / Azərbaycan tranzit-nəqliyyat sahəsində etibarlı tərəfdaşdır

Azərbaycan tranzit-nəqliyyat sahəsində etibarlı tərəfdaşdır

18.10.2023 [16:22]

Günel ABBAS
“Bişkekdə Müstəqil Dövlətlər Birliyi Dövlət Başçıları Şurasının iclasında çıxışı zamanı Prezident İlham Əliyev bildirdi ki, Qırğızıstan və Azərbaycan arasında dostluq və qardaşlıq münasibətləri uğurla inkişaf edir. Dövlət başçılarının qarşılıqlı səfərləri zamanı əldə olunmuş razılaşmalar yerinə yetirilir. Azərbaycan Qırğızıstanda investisiya layihələrini həyata keçirməyə başlayıb. Əməkdaşlığı dərinləşdirmək məqsədilə Azərbaycan-Qırğızıstan İnvestisiya Fondu yaradılıb. Qırğızıstan sabit inkişaf edir. Qırğızıstanın son dövrdəki sosial-iqtisadi inkişafı bütün dost ölkələri sevindirir”.
Bu fikirləri yeniazerbaycan.com-a açıqlamasında Milli Məclisin üzvü Cavid Osmanov deyib.
Deputat qeyd edib ki, Prezident İlham Əliyev görüşdə Özbəkistanın da Müstəqil Dövlətlər Birliyi məkanında uğurlara imza atmasına diqqət çəkdi: “Səmərqənd şəhəri 2024-cü ildə “Birliyin mədəniyyət paytaxtı” elan edilməsi qardaş Özbəkistanla bağlı olan digər mühüm hadisədir. Müstəqil Dövlətlər Birliyi Dövlət Başçıları Şurasının nəticələri gələcəkdə Müstəqil Dövlətlər Birliyinə daxil olan ölkələr arasında əməkdaşlıq əlaqələrinin möhkəmlənməsinə xidmət edəcək”, deyə vurğulayan Prezident İlham Əliyev Rusiya Federasiyasının növbəti ildə Müstəqil Dövlətlər Birliyində sədrlik edəcəyini qeyd etdi.
Ölkəmizin Müstəqil Dövlətlər Birliyi çərçivəsində fəaliyyətindən danışarkən isə Prezident İlham Əliyev bildirdi ki, humanitar sahə əsas istiqamətlərdən biridir və Azərbaycan bu sahədə əməkdaşlığın inkişafına böyük töhfə verir. Ölkəmizin 2025-ci ildə üçüncü Müstəqil Dövlətlər Birliyi Oyunlarının keçirilməsi üzrə namizədliyi dəstəklənib və Azərbaycan növbəti dəfə nüfuzlu beynəlxalq tədbirə ev sahibliyi edəcəkdir. Üçüncü Müstəqil Dövlətlər Birliyi Oyunları idman sahəsində əməkdaşlığımızı möhkəmləndirməklə yanaşı, Birlik məkanında uğurlu qarşılıqlı fəaliyyətimizin daha bir nümayişi olacaq.
Müstəqil Dövlətlər Birliyi Dövlət Başçıları Şurasının iclasında çıxışı zamanı Prezident İlham Əliyev xatırlatdı ki, iqtisadi əməkdaşlıq da müsbət dinamika ilə inkişaf edir. İqtisadi əlaqələrimizin möhkəmlənməsi müsbət nəticə verir. Keçən il Azərbaycan ilə Müstəqil Dövlətlər Birliyi ölkələri arasında əmtəə dövriyyəsinin həcmi təxminən 30 faiz artıb. Bu il artım 20 faizdən də çoxdur. Azərbaycan Müstəqil Dövlətlər Birliyinin bir çox ölkələri üçün tranzit-nəqliyyat sahəsində etibarlı tərəfdaşdır. Müstəqil Dövlətlər Birliyinin bir çox üzv ölkələri Şərq-Qərb və Şimal-Cənub nəqliyyat dəhlizləri üzrə Azərbaycanın tranzit imkanlarından fəal istifadə edirlər. Şərq-Qərb və Şimal-Cənub nəqliyyat dəhlizlərinin ötürmə qabiliyyətinin genişləndirilməsi üzrə həyata keçirilən və perspektiv layihələr ölkələrimizin nəqliyyat təhlükəsizliyinin möhkəmlənməsi işinə və əmtəə dövriyyəsinin artırılmasına xidmət edəcək.
Ümumiyətlə, Azərbaycan Respublikası Müstəqil Dövlətlər Birliyi iştirakçı-dövlətləri ilə əməkdaşlığın ikitərəfli əsasda davam etdirilməsinə üstünlük verir. Bununla yanaşı, Azərbaycan Respublikası Müstəqil Dövlətlər Birliyi çərçivəsində siyasi, iqtisadi və humanitar sahələrdə ölkəmiz üçün maraq kəsb edən məsələlər üzrə əməkdaşlığın davam etdirilərək, bu təşkilatın iştirakçı-dövlətlər arasında dialoq müstəvisi kimi saxlanılmasında maraqlıdır”.

Paylaş:

Baxılıb: 606 dəfə