Axır qəminiz olmasın...

Bakı:

25 °C

44 %

5 m/s

Əlaqə

AZ RU EN

Ana səhifə / Xəbər lenti / Axır qəminiz olmasın...

Axır qəminiz olmasın...

17.10.2023 [10:40]

Azərbaycanın uğurlarını gözü götürməyən, ölkənin, xalqın sevincinə şərik olmayan, əksinə, bu ölkənin, bu xalqın maraqlarına qarşı olanların şəriki olan redikül müxalifət əsl qəm dəryasına batıb. 2020-ci ilin Vətən müharibəsindən sonra dili söz tutmayan, əli işə yatmayan Əli Kərimli, Gültəkin Hacıbəyli, Cəmil Həsənli, Qənimət Zahid, Tofiq Yaqublu kimiləri “təskinliyi” bir şeylə tapırdılar - Xankəndidə Azərbaycan bayrağı dalğalanmır. Amma indi... Azərbaycanın üçrəngli müqəddəs bayrağını Xocalıda, Xocavənddə, Ağdərədə, Xankəndidə ucaldır Azərbaycanın müzəffər Ali Baş

Komandanı. 3 il idi ki, erməni təbliğatının sınıq təkəri obrazında anti-Azərbaycan kampaniyalarında önə çıxmaq üçün can atanlar bu gün əməlli-başlı “pəjmürdədirlər”.

Azərbaycan 4 tərəfdən qələbələrlə əhatə olunub. Prezident İlham Əliyevin apardığı uğurlu siyasi kurs nəticəsində tarixi günlər, tarixi anlar yaşayırıq. Azərbaycan özünün inkişaf tarixinin əvəzolunmaz mərhələsini formalaşdırıb. Bu gün Şərq ilə Qərbin, Cənub ilə Şimalın siyasi nəbzi Cənubi Qafqazda vurur. Bu tarixi mərhələni Azərbaycan xalqı, dövləti, Lideri yaradıb. Bu uğurlarla “barışmayan” redikül müxalifət isə qəm dəryasına qərq olub...

Antimilli mahiyyətə malik internet televiziyalarında çıxışları zamanı yalnız bir “hədəfə” köklənirdilər - torpaqlar işğaldan “tam azad” edilməyib, qələbə “tam” deyil. Bu natamamlıq xəstəliyi onların əsl kimliyindən xəbər verirdi. Əli Kərimli ümumiyyətlə üzə çıxmır, vaxtilə “Ələkbər” olub, sonradan “Aleksə” çevrilən əqidəsizlərin ümidinə qalan TV-də Sevinc Osmanqızının dili topuq vurur, hələ də “nələrəsə” ümid etdiyinə açıq şəkildə işarə edir. Özlərindən “tezis” uydurub bunun təbliğatını aparmağa çalışırlar. Guya nələrsə ola bilər - ona qalsa, hər şey ola bilər. Amma hazırda olanlar tarixi nailiyyətlərdir. Azərbaycan dövlətinin, xalqının, ordusunun yaratdığı qələbə mənzərəsidir...

Danışa-danışa özünü ifşa edənlər “sinfindən” olan redikül müxalifət Ermənistanın, Fransanın dediklərini təkrarlayır. Vaxtilə xalqın qələbəsinə ürəkdən sevinməməsi üçün apardıqları çirkin təbliğatları fərqli dairələrin, ölkələrin adları ilə “bağlayırdılar”, onlara “istinadən” guya hansısa xəbərləri yayırdılar. Axı, Fransa ilə Ermənistanın niyyəti, istəyi bəllidir - sizin istəyiniz nə idi? Neftin ucuzlaşmasına sevinməkdən tutmuş ta ki, “Ermənistan kapitulyasiya imzalamayıb” kimi sərsəm “bəyanatlar”a qədər uzanan arzu və istəkləri boşa çıxıb - Azərbaycan Vətən müharibəsində əldə etdiyi tam qələbə ilə ərazi bütövluyünü bərpa etdi, antiterror tədbirləri ilə suverenliyini tam bərpa etdi.

Qələbələrimiz ard-arda düzülüb - hər gün bir tarix yazılır. Prezident

İlham Əliyevin yürütdüyü çoxşaxəli siyasət Azərbaycana siyasi, hərbi, iqtisadi sosial qələbələr qazandırmaqda davam edir. Qarşıdakı illərdə bu qələbələrin daha da artacağı, məzmun etibarı ilə genişlənəcəyi, insanların xoşbəxtliyinə hədəflənən addımların daha da sürətlənəcəyi şübhəsizdir. Bu isə müxalifətin yenidən qəmə-qüssəyə batması, dərdə “giriftar” olması anlamına gəlir. Necə deyərlər, axır qəminiz olmasın...

“Yeni Azərbaycan” qəzeti olaraq biz redikül müxalifətə diqqət ayırmaq arzusunda və məcburiyyətində deyilik, düşünməsinlər ki, onlar “vacib gündəmdirlər” - bu yazılar onların xəyanətinin, satqınlığının, xainliklərinin faktoloji sübutudur. Qoy gələcək nəsil bu tarixi oxusun...

P.İSMAYILOV

Paylaş:

Baxılıb: 585 dəfə