43 ildir...

Bakı:

10 °C

93 %

1 m/s

Əlaqə

AZ RU EN

Ana səhifə / Xəbər lenti / 43 ildir...

43 ildir...

27.09.2022 [10:45]

Dünya Turizm Günü səyahətsevərləri bir araya toplayır

MÜŞFİQƏ

Hər il sentyabrın 27-də planetimizin hər yerində Dünya Turizm Günü qeyd edilir. 1979-cu ildə BMT-nin Dünya Turizm Təşkilatının Baş Assambleyası tərəfindən 27 sentyabr - Dünya Turizm Günü kimi təsis olunub. Bayramın məqsədi turizmin təbliği, onun dünya iqtisadiyyatının inkişafına təsiri barədə maarifləndirmə, müxtəlif ölkələr arasında əlaqələrin inkişaf etdirilməsidir. 1980-ci ildən başlayaraq bu bayram Dünya Turizm Təşkilatına üzv ölkələr tərəfindən mütəmadi qeyd olunur. Dünya Turizm Gününün rəngi mavidir. Ümumdünya Turizm Təşkilatının məlumatına görə, turizm dünyanın ən böyük iqtisadi sektorudur və dünyada hər 10 işdən 1-nə təsir edir. Turizm sektoru çökərsə, təxminən 100 milyon iş risk altında olar. Bəs nə üçün turizm gününü qeyd edirik? Heç bu barədə düşünmüsünüz? Dünya Turizm Gününün qeyd olunmasını ilk dəfə Nigeriyalı İqnatius Amaduva Atiqbi təklif edib. Builki Ümumdünya Turizm Günü “Turizmi yenidən düşünmək” mövzusunda keçirilir. İndoneziya Turizm Gününə ev sahibliyi edir.

Bəzən səyahət əvəzinə turizm kəlməsi də işlədilir. Bu deyim ilk dəfə 1772-ci ildə istifadə edilib. Termin kimi 18-ci əsrdən elmə daxil edilsə də, insan oğlu yaradılışdan bəri gəzib kəşf etməyin nə olduğunu bilir.

Heç bir yelkənli gəmi kitab qədər uzaqlara apara bilmir, deyirlər. Zaman-zaman bu mövzu dünya klassiklərinin, eləcə də müasir yazıçıların diqqətini çəkib. Elə Jül Vernin “Dünya Ətrafında 80 Gün” əsəri buna ən bariz nümunədir. Çətin ki, hər müəllif sərgüzəştlərini bu yazar kimi cəlbedici təsvir edə bilsin. Onun “Yerin mərkəzinə səyahət”, “Kapitan Qrantın uşaqları”, “Hava şarında 5 həhtə”, “20 000 lye su altında” əsərləri də bir növ bu fikri təsdiqləmiş olur. Oxuduqca sizi həyəcanlandırır və ilhamlandırır, eyni zamanda, gerçəkliyə qaytarır.

Dünyanın ən çox səyahət edilən turistik yerləri sırasında Eyfel qülləsi, Roma Kolizeyi, ABŞ-ın Nyu-York şəhərindəki Azadlıq heykəli, Machu Picchu, Misir piramidaları, Böyük Çin səddi, Afina şəhərindəki Akropol, Tac Mahal və s. yer alır.

Eləcə də ölkəmizdə və dünyada istər yerli, istərsə də xarici turistlərin diqqətini çəkən turizm növləri sırasında sağlamlıq turizmi, dini turizm, dəniz turizmi, təhsil turizmi, qış turizmi, mədəniyyət turizmi, idman turizmi, ovçuluq turizmi və s. başçılıq edir. Azərbaycan da bir sıra mötəbər tədbir və yarışlara ev sahibliyi edir. Nəticədə ölkəmizə çoxlu sayda turist axını ilə müşahidə olunur. Məsələn, sonuncu Formula 1 Azərbaycan Qran-Prisi çərçivəsində Bakıya rekord sayda - 10 mindən çox turist gəlib. Bu barədə Bakı Şəhər Halqası Əməliyyat Şirkətinin (BŞH) icraçı direktoru Arif Rəhimov deyib. Onun sözlərinə görə, Böyük Britaniya, ABŞ, Türkiyə, Skandinaviya ölkələri və s. kimi digər ölkələrdən turist axını artıb.

Şübhəsiz ki, kimisi dünya səyahətinə çıxmağın xəyalı ilə yaşayır, kimisi də artıq bu xəyalı gerçəyə çevirməyi bacarıb. Dünyanın ən həyəcan verici və zənginləşdirən fəaliyyəti sayəsində insanın həyat eşqi getdikcə artır. Yeni yerlər kəşf etdikcə daha çox öyrənir, həyatın nemətlərinə daha çox şükranlıq etməyə başlayırsan. Sözsüz ki, həyatımıza daxil olan COVİD-19-dan sonra səyahətin önəmini daha çox hiss etməyə başladıq. Son üç il ərzində ümidlərini itirmədən mübarizə aparan və çalışan bütün turizm işçilərinin Dünya Turizm Gününü təbrik edirik.

Paylaş:

Baxılıb: 557 dəfə