Macarıstan hökuməti 2030-cu ilə qədər avronu qəbul etməyi hədəfləyir

Bakı:

26 °C

57 %

5 m/s

Əlaqə

AZ RU EN

Ana səhifə / Dünya / Macarıstan hökuməti 2030-cu ilə qədər avronu qəbul etməyi hədəfləyir

Macarıstan hökuməti 2030-cu ilə qədər avronu qəbul etməyi hədəfləyir

20.08.2026 [19:32]

Macarıstan hökuməti 2030-cu ilə qədər avronu qəbul etməyi hədəfləyir, bunun üçün büdcə kəsirinin və dövlət borcunun davamlı şəkildə azaldılmasını əsas şərt kimi görür.

AZƏRTAC xəbər verir ki, yeni hökumət hakimiyyətə gəldikdən sonra ölkənin fiskal vəziyyətinin əvvəlkindən daha ağır olduğunu açıqlayıb və qarşıdakı illərdə maliyyə intizamının gücləndirilməsini prioritet elan edib.

2026-cı il büdcəsi ilkin olaraq ÜDM-in 3,7 faizi həcmində kəsirlə planlaşdırılmışdı. Lakin hökumətin apardığı yenidən qiymətləndirməyə görə, düzəlişlər edilməsəydi, kəsir 8,3 faizə çata bilərdi. Maliyyə Nazirliyi hazırda bu göstəricinin təxminən 7,5 faiz olacağını gözləyir. Hökumət Avropa İttifaqı vəsaitlərinin və digər tədbirlərin vəziyyətin daha da pisləşməsinin qarşısını aldığını bildirir. Eyni zamanda, daha güclü forint (Macarıstanın rəsmi pul vahidi), aşağı istiqraz gəlirləri və Aİ maliyyəsinin bərpası fiskal perspektivi yaxşılaşdıran amillər kimi qiymətləndirilir. Hökumət avqustun sonunadək 2026-cı il büdcəsinə dəyişiklik etməyi və yeni kəsir hədəfi müəyyənləşdirməyi planlaşdırır. 2027-ci ilin büdcəsi və orta müddətli maliyyə planının isə oktyabrın sonunadək hazırlanması gözlənilir.

Analitiklər gələn il kəsirin azalması üçün bir sıra amillərin mövcud olduğunu qeyd edirlər. Bu il büdcəyə yük gətirən bəzi birdəfəlik xərclər gələn il olmayacaq, dövlət istiqrazlarının gəlirliliyinin azalması və mümkün faiz endirimləri isə borca xidmət xərclərini aşağı sala bilər. Maliyyə naziri Andraş Karman iyul ayında büdcədə 524 milyard forint, yəni 1,44 milyard avro profisit yarandığını açıqlayıb. Bununla belə, ekspertlər birdəfəlik qənaət hesabına əldə olunan nəticələrin davamlı maliyyə sabitliyi kimi qiymətləndirilməsinə qarşı xəbərdarlıq edirlər. Avronun 2030-cu ildə tətbiqi üçün Macarıstan yalnız birillik yaxşılaşma deyil, bir neçə ili əhatə edən etibarlı fiskal strategiya nümayiş etdirməlidir. Kəsirin və dövlət borcunun ardıcıl azalması investorların, biznes dairələrinin və reytinq agentliklərinin etimadının qorunması baxımından da mühüm sayılır.

Bununla yanaşı, zəif xarici tələbat, xüsusilə Almaniya sənayesindəki durğunluq, enerji idxalından asılılıq və geosiyasi gərginliklər Macarıstan iqtisadiyyatı üçün əsas risklər olaraq qalır. Buna görə də avroya keçidin siyasi hədəfdən real nəticəyə çevrilməsi uzunmüddətli və ardıcıl iqtisadi siyasətdən asılı olacaq. Analitiklərin fikrincə, hökumətin əsas vəzifələrindən biri müvəqqəti gəlirlər və xərclərin təxirə salınması hesabına deyil, struktur tədbirlər vasitəsilə dayanıqlı nəticə əldə etməkdir. Belə yanaşma iqtisadi sabitliyin qorunmasına və Avrozonaya qoşulmaq üçün tələb olunan meyarların yerinə yetirilməsinə kömək edə bilər. Eyni zamanda, vergi siyasəti və investisiya qərarları gələcək artım tempinə təsir göstərəcək.

Paylaş:

Baxılıb: 282 dəfə