Şuşa ilə qardaşlaşan şəhərlərdə bu plakatlar olsun-TƏKLİF

Bakı:

19 °C

60 %

3 m/s

Əlaqə

AZ RU EN

Ana səhifə / Xəbər lenti / Şuşa ilə qardaşlaşan şəhərlərdə bu plakatlar olsun-TƏKLİF

Şuşa ilə qardaşlaşan şəhərlərdə bu plakatlar olsun-TƏKLİF

27.08.2022 [07:17]

Yeganə BAYRAMOVA

Məlum olduğu kimi, avqustun 24-də Qazaxıstan Respublikasının Prezidenti Kasım-Jomart Tokayev Azərbaycanda rəsmi səfərdə oldu. Tokayevin Azərbaycan Respublikasının Prezidenti İlham Əliyevlə baş tutan geniş tərkibdə görüşündən sonra dövlət başçıları bir sıra mühüm sənədlərə imza atıblar. İmzalanan sənədlər arasında “Azərbaycan Respublikasının Şuşa şəhəri və Qazaxıstan Respublikasının Türküstan şəhəri arasında qardaşlaşma əlaqələrinin qurulması haqqında Protokol” da var.

Qardaşlaşmış şəhər anlayışı

Qardaşlaşmış şəhərlər coğrafi olaraq bir-birindən uzaq olan yaşayış məskənlərinin, mədəni və ticari əlaqələri ilə ortaya gətirdikləri birlikdir. Dünyada ilk qardaşlaşmış şəhərlər Böyük Britaniyanın Keighley şəhəri ilə Fransanın Poix-du Nord şəhəri olub. Bu iki şəhər arasında müqavilə 1920-ci ildə imzalanıb. Avropada bu söz müxtəlif variantlarda səslənir. Adətən əkiz, dostluq və partnyor şəhərlər deyə də adlandırılır. Şimali Amerika, Asiya və Avstraliyada “sister cities”, yəni “bacı şəhərlər”, Avropa və Amerikada isə “brothers cities”, yəni “qardaş şəhərlər” ifadəsindən də istifadə olunur.

Qardaş şəhər münasibətləri daha az formal olsa da, beynəlxalq səviyyədə əməkdaşlığı inkişaf etdirmək üçün vacib bir yoldur. Bu əlaqələr yenilənmədikcə iki ildən sonra başa çatır. Qardaşlaşmış şəhərlər arasında ən çox mədəni əlaqələrin inkişaf etdiyini söyləmək olar. Çünki mədəniyyətin sərhədi və dili yoxdur.

Qardaşlaşmış şəhərlər dedikdə böyük və kiçik şəhərlər, hətta coğrafi və siyasi ərazilərdə əyalətlər arasında mədəni - iqtisadi əlaqələrin təmin edilməsi üçün əldə edilmiş müəyyən razılığın daxili və zahiri tərəfləri nəzərdə tutulur.

Xatırladaq ki, dövlətçilik və mədəniyyət tariximizdə önəmli rola malik olan Şuşa şəhəri 2021-ci ildə Türkiyənin Kayseri şəhəri ilə qardaşlaşıb.

“Yeni Azərbaycan” mövzu ilə bağlı maraqlı bir təkliflə çıxış edir. Təklif bundan ibarətdir ki, tarixi incimiz olan Şuşa şəhərinin qardaşlaşdığı digər şəhərlərdə Azərbaycan bayrağı, həmçinin Şuşa barədə mühüm məlumatları əks etdirən bilbordlar, məlumat xarakterli xüsusi lövhələr qoyulsun. Eyni zamanda Şuşada həmin şəhərlər barədə müvafiq lövhələr, bilbordlar əks edilsin. Bu, şəhərlər arasında qardaşlaşma anlayışının yalnız kağız üzərində protokol olaraq deyil, bir-birini təbliğ etmək, tanıtmaq, məlumatlandırmaq baxımından mühüm rola malikdir.

Millət vəkili Elman Məmmədov sözügedən təkliflə bağlı təəssüratlarını “Yeni Azərbaycan”la bölüşüb. Parlament üzvü təklifi dəstəklədiyini, Şuşanın qardaşlaşdığı şəhərlərdə mədəniyyət paytaxtımıza dair məlumatverici plakat və yaxud bilbordlar qoyulmasının mütərəqqi hal olacağını düşünür: “Çox gözəl və yerində düşünülmüş bir təklifdir. Şuşa tarixi incimizdir, 270 yaşı olan möhtəşəm bir şəhərimizdir. Məlumdur ki, Şuşa qalasının bünövrəsi qoyulan dövrdən bu şəhərimizin özünəməxsus emblemləri, nişanələri olub. Həmin emblemlərdən tutmuş Xarı Bülbülə qədər, bir sözlə, Şuşaya aid olan bütün incəliklər Azərbaycan bayrağı ilə birlikdə Şuşanın qardaşlaşdığı şəhərdə əks olunmalıdır. Eyni zamanda, həmin şəhərlərə məxsus məlumatlar, nişanələr, tarixi faktlar da Şuşada müvafiq bilbordlarda, lövhələrdə qeyd edilə bilər. Hər kəsə bəllidir ki, Şuşaya həddindən artıq ziyarətçilər gəlir, bundan sonra da həmin ziyarətçilərin sayı çox olacaq. Mədəniyyət paytaxtımıza üz tutan ziyarətçilərin bu cür orijinal, qeyri-adi və düşünülmüş bilbordları görməsi çox gözəl olardı. Məsələn, həmin bilbordlarda Şuşa dünyanın hansı şəhərləri ilə qardaşlaşıbsa, o şəhərlər arasında əlaqələrin öz əksini necə tapdığı, tarixi faktlar, mühüm informasiyalar qeyd edilə bilər. Həmin bilbordlar da elə yerdə olmalıdır ki, gələn ziyarətçilər onu görə bilsin. Bu baxımdan “Yeni Azərbaycan” qəzetinin təklifini sonuna qədər alqışlayıram. Düşünürəm ki, təklifin həyata keçirilməsi üçün lazım olan bütün işlər görülməlidir. Çünki bu, çox vacib haldır”.

Paylaş:

Baxılıb: 612 dəfə