Media anlayışından kənar olan qəzet adları

Bakı:

26 °C

46 %

6 m/s

Əlaqə

AZ RU EN

Ana səhifə / Xəbər lenti / Media anlayışından kənar olan qəzet adları

Media anlayışından kənar olan qəzet adları

10.08.2022 [10:37]

Qeyri-dəqiq, gülünc və mənasız ...

Yeganə BAYRAMOVA

Azərbaycanda xeyli sayda qəzetlər rəsmi olaraq dövlət qeydiyyatından keçib. Ancaq təəssüflə qeyd etməliyik ki, həmin qəzetlərin hamısı konkret və qeyri-ciddi ada sahib olmayıblar. Halbuki qəzet adı ən azı bitmiş bir fikir ifadə etməlidir.

Bu gün mətbu orqanların sürətli artımı davam edir. KİV haqqında Azərbaycan Respublikasının Qanununun 14-cü maddəsində qeyd olunur ki, mətbu nəşrlərin təsis edilməsi üçün dövlət orqanlarından xüsusi icazə tələb olunmur. Məhz bu durum xeyli sayda, ancaq qəribə adda qəzetlərin çoxalmasına şərait yaratmışdı. Mətbu nəşr təsis etmək istəyən hüquqi və ya fiziki şəxs nəşrin çapından 7 gün əvvəl müvafiq icra hakimiyyəti orqanına rəsmi müraciət etməlidir. Müraciətdən sonra qəzetlər Ədliyyə Nazirliyində qeydiyyatdan keçir. Qəzetlər nazirlikdə qeydiyyatdan keçərkən onlara qoyulan adlar nəzarətdən kənar qalır. Məsələn, bir zamanlar “Şapalaq”, “Şeş-beş”, “Sehrli xələt “, “Şparqalka” kimi qəzetlər məhz Ədliyyə Nazirliyində qeydiyyatdan keçərək fəaliyyət göstərirdi. Eyni zamanda, səhifənin yarısını tutan qəzet adlarına da rast gəlmək mümkündür. Buna “Müasir Azərbaycanın müəllimi”, “Azərbaycanın mənəvi dayağı”, “Millətin tribunasından çıxış”, “Millətin tribunası və sözü”, “Vətən uğrunda könüllülər”, “Qabaqcıl texnika uğrunda”, “Azad Azərbaycanın səsi”, “Müstəqil Azərbaycan uğrunda”, “Fundamental elmlərin yenilikləri”, “Tarix və onun problemləri”, “Azərbaycanın inkişaf problemləri”, “Azərbaycan reklamının tarixi”, “Dövlətin idarə edilməsi” və s. misal gətirmək olar.

Mövzu barədə fikirlərini “Yeni Azərbaycan”la bölüşən media üzrə ekspert, professor Qulu Məhərrəmli bildirib ki, əvvəlki illərdə hər hansı bir mənaya malik olmayan və qeyri-dəqiq ada sahib qəzetlər daha çox idi: “Xüsusilə, Azərbaycanda reketçiliyə yol açan qəzetlərin adları belə idi. Məsələn, qəzetin adı korrupsiya ilə bağlı olsa da, məhz bu şəxslər korrupsiyaya, reketçiliyə daha çox meyil edirdilər. Eyni zamanda, dövlətçiliklə bağlı müxtəlif pafosulu qəzet adlarına rast gəlinir. Oxucu 3 və daha artıq sözdən ibarət olan qəzet adından nə başa düşsün? Ümumiyyətlə, qəzetçilikdə müəyyən bir ənənə var: Qəzetlərin adı bir, ya da iki sözdən ibarət olmalıdır”.

Q.Məhərrəmlinin sözlərinə görə, dünya təcrübəsinə nəzər saldıqda görürük ki, qəzet adları yalnız bir sözdən ibarətdir: “Ədliyyə Nazirliyində qəzetlərin adı ilə məşğul olan xüsusi bir komissiyanın yaradılmasına ehtiyac yoxdur, ancaq bu sahədəki qeydiyyat işinə baxan şəxs uzun və heç bir məna kəsb etməyən adların qəzet adı kimi qeydiyyatdan keçməsinə yol verməməlidir. Məsələn, ola bilər ki, hansısa qəzet qeydiyyatdan keçmək istəsə, bu sahə üzrə mütəxəssis də qəzetin adı ilə fikirlərini bildirə bilər. Düzdür, nazirliyin adla bağlı məsələyə qarışmağa hüquqi ixtiyarı yoxdur, amma koordinasiya məqsədi ilə bu işə ciddi yanaşmaqları lazımdır. Konkret olmayan, uzun və mənasız qəzet adları olmamalıdır. Əvvəlki illərdə qəribə qəzet adları daha çox rastıma çıxırdı, indi isə eyni ənənəni müxtəlif saytlar davam etdirir. Məsələn, xüsusi məna kəsb etməyən sayt adları var. Bir zamanlar “Yeni Azərbaycan naminə” adlı qəzet var idi, bu nə deməkdir? Belə adlar qəzet üçün uyğun deyil və sadəcə şüar xarakteri daşıya bilər”.

Professorun qənaətincə, nə indiki, nə də əvvəlki illərdə bu qəbildən olan qəzetlər populyar olublar: “Qəzetlərin elə adlanmasının arxasında hansı niyyətlərin dayandığı bəlli deyil. Hər bir halda hüquqi məqamların pozulmaması şərti ilə Ədliyyə Nazirliyi və ya ora dəvət edilən media eksperti qəzet adlarına dair təkliflərini irəli sürməlidir. Bu, o qədər də çətin bir iş deyil. Qıcıq yaradan, hansısa mənası olmayan və gülünc qəzet adları ilə bağlı mütəxəssis öz rəyini bildirə bilər. Amma qəzeti təsis edən şəxs də bilməlidir ki, mətbu orqana normal ad verməlidir və qəzetin adı açıq şəkildə ifadə edilməlidir ki, nəşrin nə üçün yarandığı bəlli olsun. Yoxsa gülüş yaradan və qeyri-ciddi qəzet adları media anlayışına uyğun gəlmir”.

Paylaş:

Baxılıb: 700 dəfə