Son 4 ilin ən qızmar günləri gəlir

Bakı:

10 °C

81 %

6 m/s

Əlaqə

AZ RU EN

Ana səhifə / Xəbər lenti / Son 4 ilin ən qızmar günləri gəlir

Son 4 ilin ən qızmar günləri gəlir

19.07.2022 [10:41]

Xəbərdarlıq: Anomal istilər olacaq

MÜŞFİQƏ

Son zamanlar dünyanın əksər ölkələrində, eləcə də ölkəmizdə şiddətli istilər müşahidə edilir. Getdikcə intensiv xarakter alan vəziyyət özü ilə birlikdə fəlakətləri də gətirir. Hava temperaturunun kəskin artması Avropanın əksər ölkələrində ciddi fəsadlar törədib, hətta insan ölümünə səbəb olub. Bir sözlə, anomal istilər həyatı iflic edib.

İspaniyada son 40 ilin ən yüksək isti hava dalğası hökm sürür. III Karlos İnstitutunun yaydığı məlumata görə, İspaniyada ötən həftə isti hava 360 nəfərin həyatına son qoyub. Qeyd olunur ki, cümə günü temperatur 45 dərəcə Selsini keçdiyi üçün 123 nəfər dünyasını dəyişib. Əlverişsiz havaya görə ölənlərin əksəriyyəti yaşlı və xəstələrdir. Bəzi ərazilərində temperatur 45 dərəcə Selsini keçən Portuqaliyada da oxşar vəziyyət hökm sürür. Bu ölkədə 238 nəfər istidən ölüb. Ölkədə isti dalğanın Sahara səhrasından daşınan qum və toz səbəbindən daha da artacağı ehtimal olunur.

İtaliyada da həddindən artıq istilər səbəbindən paytaxt Roma, eləcə də Milan və Florensiya daxil olmaqla, 10 şəhərdə “narıncı” həyəcan siqnalı verilib. Havanın temperaturunun gələn həftənin ortasında 40-42 dərəcəyə çatacağı qeyd edilib. Yüksək hava temperaturu ilə əlaqədar yanğın riskinin də yüksək olduğu bildirilib. Müşahidə edilən anomal istilər səbəbindən ölkənin ən böyük çayı olan Poda suyun səviyyəsi bəzi yerlərdə 10 faiz enib.

“Euronews” telekanalının verdiyi xəbərə görə, güclü quraqlıq səbəbindən Avropanın bir çox yerlərində meşə yanğınları öncəki illərlə müqayisədə daha tez başlayıb. Şiddətli istilərin yaxıb-yandırdığı ölkələrdən biri də Fransadır. Güclü külək və isti səbəbindən Fransada 5 gündür Bordo regionunda yanğını söndürmək mümkün olmur, 11 min insan evakuasiya edilib.

Qeyd edək ki, Avropada son temperatur rekordu 1977-ci ildə qeydə alınıb. O zaman Yunanıstanın paytaxtı Afinada havanın hərarəti müsbət 48 dərəcə təşkil edib.

Meteoroloqların proqnozlarına görə, yaxın 4 il ərzində dünyada ekstremal istilər müşahidə ediləcək.

Azərbaycanda yandırıcı istilər neçə gün davam edəcək?

Azərbaycanda da demək olar ki, vəziyyət eynidir. Ümumiyyətlə, iyul-avqust ən isti aylar hesab olunur. Bu ay ölkəmizdə anomal istilərin olacağı istisna edilmir. Ölkə ərazisində anomal istilərin müşahidə ediləcəyi proqnozlaşdırılır.

Statistik məlumatlar da onu göstərir ki, əvvəllər davamlı anomal isti günlər 1-2 gün davam edirdisə, artıq son illərdə belə günlər davamlı olaraq, 1 həftəyədək müşahidə edilir. Bu da ilbəil istiləşmə olduğunu göstərir. Məsələn, son 30 ildə ölkə ərazisində ən isti iyul ayı 2018-ci ildə müşahidə edilib. Həmin il iyulun 1-də havanın temperaturu 43 dərəcə olub. Bu ayın ilk ongünlüyündə isə cənub və cənub-qərbdən isti hava cərəyanlarının təsiri nəticəsində temperatur 40-44 dərəcəyədək yüksəlib.

ETSN-nin Milli Hidrometeorologiya Xidmətinin Hidrologiya Mərkəzinin direktoru Asif Verdiyev qəzetimizə açıqlamasında bildirib ki, hazırda paytaxtımızda müşahidə olunan temperatur iqlim normasından 4 dərəcə yuxarıdır. Mütəxəssis bunun iqlim dəyişikliyi ilə əlaqədar olduğunu söyləyib. Lakin yaxın 3 gün ərzində sərin hava şəraiti müşahidə olunacaq: “Artıq bir neçə gündür ki, ölkə ərazisində isti hava şəraiti müşahidə olunur. Bölgələrdə bu isti hava şəraiti yaxın iki-üç gün ərzində davam edəcək. Qərb küləyi əsəcək. Yaxın üç gün ərzində Bakıda və Abşeron yarımadasında küləkli hava şəraiti müşahidə olunacaq. Şimal-qərb küləyi yarımadanın bəzi yerlərində arabir güclənəcək. Küləkli hava şəraiti ilə əlaqədar havanın temperaturu bir qədər aşağı enərək 30-35 dərəcə isti olacaq. İyulun son günləri və avqust ayında anomal istilərin olacağı istisna edilmir”.

Paylaş:

Baxılıb: 599 dəfə