Kağız qiymətinin artımı qəzetlərə necə təsir edəcək?

Bakı:

26 °C

55 %

2 m/s

Əlaqə

AZ RU EN

Ana səhifə / Xəbər lenti / Kağız qiymətinin artımı qəzetlərə necə təsir edəcək?

Kağız qiymətinin artımı qəzetlərə necə təsir edəcək?

09.04.2022 [11:30]

Mütəxəssis: Qəzetlər satış qiymətini qaldırmalıdır

Günel QABİLQIZI

Rusiya ilə Ukrayna arasındakı müharibə Azərbaycana təsirsiz ötüşmür. Növbəti mənfi təsir özünü kağız qıtlığında və bu məhsulun qiymət artımında göstərir. Hazırda A4 və A3 formatlı kağızların qiyməti kəskin artıb. Bir müddət əvvəl A4 formatlı kağızların bağlaması 6 manat civarında idisə, indi 10 manata çatıb. Bununla yanaşı A4 formatlı kağızı hər yerdə tapmaq da olmur.

Rusiyada qəzet kağızı istehsal edən bir sıra müəssisələrin də fəaliyyəti dayanıb. Bu, Azərbaycanın topdansatış kağız bazarında narahatlıq doğurub. Çünki ötən il Azərbaycana idxal edilən 17 min tona yaxın kağız və kartonun 97 faizi, yəni 16,2 min tonu Rusiyadan gətirilib. Qəzet kağızı idxalında isə şimal qonşumuz 100 faizlik paya malikdir.

Azərbaycanda yerli kağız istehsalı, demək olar ki, yoxdur və yalnız təkrar kağız emalı üzrə müəssisə var. Bütünlükdə, 2021-ci ildə Azərbaycana 198 milyon dollarlıq kağız və karton idxal edilib ki, yetərincə böyük rəqəmdir.

Mövcud durumu nəzərə alaraq yaxın vaxtlarda ölkəyə Türkiyədən kağız gətirilməsi gözlənilir. Bu, bizi vəziyyətdən xilas edəcəkmi?

Milli Məclisin deputatı Vüqar Bayramov “Yeni Azərbaycan”a açıqlamasında bildirdi ki, bu artım gözlənilən idi: “Region bazarında kağız ixracatı daha çox Rusiyanın hesabına formalaşırdı. Rusiyanın ixracatı məhdudlaşdırması ilə yanaşı həm də kağızın logistik olaraq bazara çıxarılmasında çətinlik var. Digər tərəfdən, Rusiyada da qiymət artımı var. Azərbaycan meşə örtüyü nisbətən az olan ölkələrdəndir. Ona görə də həmin məhsullar üzrə növbəti illər üçün də kağız idxalında xüsusi əhəmiyyətə malik olacaq. Hazırda digər mənbələrdən idxalın sürətləndirilməsi məqsədəuyğundur və bu istiqamətdə işlərin aparılması gözlənilir. Proqnoz ondan ibarətdir ki, dünya bazarında da artımlar davam edəcək. Bu da Azərbaycan üçün idxal inflyasiyasının yaranması mənasına gəlir”.

Kağızın qiymətinin artması ölkədəki ümumi vəziyyətlə yanaşı kitab və qəzet satışına da təsir edəcək. Nəşriyyatlarda vəziyyətin nə yerdə olduğunu öyrənmək üçün çap işinin mütəxəssisləri ilə əlaqə saxladıq.

Peru vilayətində yerləşən kağız fabriklərindən birinin nümayəndəsi Emin Axundov kağızın qiymətinin pandemiyadan sonra artmağa başladığını dedi: “Kağız istehsal edən fabriklər pandemiyada yarım güclə çalışırdı. Bir sıra fabriklərin də müflis olması qiymət artımına gətirdi. Çin, Hindistan, İndoneziya kağız istehsalını artırıb. Ancaq biz Rusiyadan daha ucuz gəldiyinə görə oradan alırdıq. Rusiyadakı vəziyyətə xammal qıtlığının da təsiri var. Hər ay kağızın qiyməti 80-100 dollar arası qalxır. Bu da Rusiya-Ukrayna müharibəsindən irəli gəlir. Rusiya embarqoya düşdüyünə görə kimyasal maddələrin çatışmazlığı yarandı. Nəzərə alsaq ki, Rusiyaya çox məhsul Avropadan gəlir, bu səbəbdən hələ gələn ay da artım olacaq. Yay boyu 150-200 dollar artım olması da gözlənilir”.

E.Axundovun sözlərinə görə, qəzetlər sərfiyyata görə qiyməti qaldırmalıdır: “Əks təqdirdə müflis olacaqlar. Qəzetlərdə hələ ki, qiymət dəyişimi yoxdur. Çünki düşünürlər ki, kağız qiymətləri düzələcək. Hazırda hamı kiminsə birinci artım etməsini gözləyir. Qəzetlərdə büdcə əvvəlcədən hazırlanır, buna görə də bəzi qəzetlər kağız şirkətlərinə borclanıblar”.

Qəzet mütəxəssisi qeyd etdi ki, ƏDV ləğv olunsa, vəziyyət normallaşa bilər: “Prezidentin fərmanına əsasən ƏDV ləğv olunmalıdır. Ancaq hələ ki, gömrükdə bunun ləğv olunması üçün kodlar aktiv deyil. Əgər ƏDV götürülsə, kağızın bir tonunda 100-150 dollar fərq edəcək. Hazırda fabrik və formatından asılı olaraq kağızın tonu 839 dollara qədər yüksəlib”.

“Son dəqiqə” nəşriyyatının direktoru Xəlil Kan bildirdi ki, hazırda kağızlara 18%-lik endirimin tətbiqini gözləyir: “Yalnız bu halda nəşriyyatlar və qəzetlər fəaliyyətini sərbəst şəkildə davam etdirəcək. Artıq bu qiymətləri iki aydır müşahidə edirik. Həmin dövrdən qəzetlər dövrlüyünü azaldıb. Bu, qəzet və nəşriyyatlar üçün olduqca təəssüf doğuran haldır”.

Paylaş:

Baxılıb: 747 dəfə