MİDA-nın 4-5 saniyədə satılan mənzilləri

Bakı:

25 °C

50 %

6 m/s

Əlaqə

AZ RU EN

Ana səhifə / Xəbər lenti / MİDA-nın 4-5 saniyədə satılan mənzilləri

MİDA-nın 4-5 saniyədə satılan mənzilləri

01.04.2022 [10:17]

Mütəxəssis: MİDA sistem müdaxiləsini aşkar edə bilər

Günel ABBAS

Ötən gün Mənzil İnşaatı Dövlət Agentliyi (MİDA) güzəştli mənzillərin növbəti onlayn satışını həyata keçirib. Satışdan öncə iddiaçıların onlayn satışla bağlı proseduru test etməsi üçün bir ay müddətində DEMO versiya aktiv olub. Buna baxmayaraq onlayn satışın yekunu ilə bağlı sosial mediada müəyyən narazılıqlar müşahidə olunmaqdadır. Məlumata görə, satış 4 saniyə müddətində gerçəkləşib və bəzi iddiaçılar xüsusi proqram təminatlarından istifadə edib. “Yeni Azərbaycan” məsələni aydınlaşdırmaq üçün agentliklə əlaqə saxladı və mənzil seçimi prosesinin şəffaflığı ilə bağlı suallar ünvanladı.

MİDA-dan sorğumuza cavab olaraq bildirildi ki, mənzillərin seçimi tamamilə şəffaf formada baş tutub. Proses Agentliyin inzibati binasında yaradılmış operativ qərargahda müşahidə edilib. Müşahidə prosesində Xüsusi Rabitə və İnformasiya Təhlükəsizliyi Dövlət Xidmətinin, Rəqəmsal İnkişaf və Nəqliyyat Nazirliyinin nümayəndələri iştirak edib.

Güzəştli mənzillərdən yararlana bilməyənlərin bəziləri bu işi “mənzil hakerləri” adlanan şəxslərin həyata keçirdiyini deyirlər. Həmin şəxslər müəyyən məbləğdə ödəniş qarşılığında evləri istənilən adamlar üçün tuturlar. Hətta bu prosesdə ucuz alıb baha satmaq məqsədi güdən əmlakçıların da əlinin olduğu bildirilir.

İnformasiya texnologiyaları üzrə mütəxəssis Rəşad İbrahimov bot və digər qeyri qanuni vasitələrlə sistemə müdaxilə edərək mənzil seçə bilən şəxslərin mövcudluğunu təsdiqlədi. Onun sözlərinə görə, həmin şəxslərin kimliyini və sistemə hansı yolla müdaxilə etdiyini MİDA mütəxəssisləri aşkara çıxara bilərlər: “Dünəndən paylaşılan bir çox məlumatı oxumuşam. Bəzi vətəndaşlar bildirirlər ki, əvvəlki mənzil seçimlərində 10-15 saniyəyə normal qaydada mənzil seçimini edən bir neçə yaxın insanları tanıyırıq. Lakin dünənki seçimdə artıq sistem açıldıqdan 5 saniyə sonra mənzillərin böyük bir hissəsi satılmış kimi qeyd olunmuşdu. MİDA mütəxəssisləri vətəndaşların narazılıqlarını nəzərə alaraq seçim prosesində iştirak edən və mənzilə sahib olan şəxslərin şəxsi məlumatlarını paylaşmamaq şərti ilə digər seçim məlumatlarını paylaşarsa, bəlkə insanlar arasında bu çaşqınlıq və müxtəlif iddiaların cavabı tapılmış olar”.

Mütəxəssis bildirdi ki, seçimlərdən öncə vətəndaşların proqramçı, hətta xaker axtarışları hamımıza məlumdur: “İnanmıram ki, yaradılmış sistemdə hələ də captcha (kompüteri və insanı fərqləndirmək üçün test) hissə klassik versiyada qalsın. Həm də bu cür captchaların keçilməsi mümkündür. Lakin hazırda “Google” tərəfindən istifadəyə tamamilə pulsuz verilən captchalar bir növ pazl kimidir. Bunun da proqramlarla keçilməsi asan məsələ deyil. Əlbəttə tam təhlükəsizlik deyə bir şey yoxdur, lakin müxtəlif həllərlə müdaxilələrin qarşısını almaq olar”.

Paylaş:

Baxılıb: 797 dəfə