Uşaqlar gülərsə...

Bakı:

21 °C

78 %

5 m/s

Əlaqə

AZ RU EN

Ana səhifə / Xəbər lenti / Uşaqlar gülərsə...

Uşaqlar gülərsə...

01.06.2024 [10:59]

Onların Beynəlxalq Müdafiəsi Günüdür

Həqiqi saflığı, təmizliyi görmək istəyiriksə, körpələrin gözlərinə baxmaq yetərlidir. Kiçik “mələklər”- məsum körpələr sanki insanlığı xilas etmək üçün yer üzünə gəliblər. Gəliblər ki, çöhrələrindən süzülən saflıqla dünyanın günahlarını əridib yox etsinlər, saflaşdırsınlar. Şirin kəlmələri ilə qəlbimizi sevindirib, üzümüzü güldürsünlər. Ona görə də uşaqların səsini ən gözəl nəğmə adlandıranlar heç bir pafosa yol verməyiblər.

Saxsıdakı bir çiçək belə yaşamaq üçün diqqət və sevgiyə ehtiyac duyduğu halda, bir uşağın sadəcə qarnının tox olması, isti bir evinin olması onun sağlam şəkildə böyüməsi üçün yetərlimidir? Təbii ki, yox. Uzun illərdən bəri uşaqların məhəbbətə, diqqət və qayğıya hava, su qədər ehtiyacı olması barədə fikirlər səsləndirilib. Lakin elə məqamlar var ki, onların qarşısında acizik. Bir sıra xoşagəlməz hadisələr körpə fidanların sevincini əlindən alır, onları valideyn nəvazişindən ayrı salır. Bəzən də nadanlıq ucbatından uşaqlar öz doğma valideynlərinin himayəsindən məhrum olurlar. Bu günə kimi qəbul edə bilmədiyimiz və milli adət-ənənələrimizə, mentalitetimizə uyğun bilmədiyimiz uşaq evlərinin mövcudluğu ürəyimizi ağrıdır.

Artıq 70 ildən çoxdur ki, dünyanın əksər ölkələrində Uşaqların Beynəlxalq Müdafiəsi Günü qeyd olunur. 1950-ci il iyunun 1-də BMT Baş Assambleyası tərəfindən bu günün qeyd olunması qərara alınıb.

Dövlətimiz hər zaman öz qayğısını uşaqlardan əsirgəməyib, körpələrin azad, firavan yaşaması üçün həmişə zəruri addımlar atılıb. Respublikamız uşaq hüquqlarının müdafiəsi sahəsində bir sıra beynəlxalq təşkilatlarla, xüsusilə də BMT-nin Uşaq Fondu UNİCEF ilə sıx əməkdaşlıq edir.

Uşaqların Beynəlxalq Müdafiəsi Günü münasibətilə bu gün Heydər Əliyev Fondu, Heydər Əliyev Mərkəzi və Elm və Təhsil Nazirliyinin təşkilatçılığı ilə Heydər Əliyev Mərkəzinin parkında Uşaq festivalı keçiriləcək. Festivalda müxtəlif yaş kateqoriyalarındakı uşaqlar maraq dairələrinə uyğun əyləncə seçib asudə vaxtlarını səmərəli keçirə və istedadlarını nümayiş etdirəcəklər. Festival zamanı Mərkəzin parkı mövzular və əyləncə növləri üzrə zonalara bölünəcək. Burada günün əsas qəhrəmanları olan uşaqlara bir-birindən maraqlı və fərqli əyləncələr, maarifləndirici proqramlar təqdim olunacaq.

Uşaq festivalında Vətən uğrunda şəhid olan qəhrəmanlarımızın övladları, Bakıdakı uşaq evlərinin sakinləri, daun sindromlu uşaqlar da iştirak edəcəklər.

Belə bir gündə gələcəyimiz olan uşaqların hər zaman diqqət və qayğı ilə əhatə olunması barədə müxtəlif tədbirlərin keçilməsinə xüsusi diqqət yetirilir. Təbii ki, uşaqların yalnız bir gün deyil, hər gün diqqətə ehtiyacı var. Bu mənada xüsusi qayğıya ehtiyacı olan azyaşlıların müdafiəsi, təhsili, sağlamlığı, bir sözlə, onların cəmiyyətə inteqrasiyası da aktuallıq kəsb edir.

Müxtəlif xəstəliklərdən əziyyət çəkən uşaqlara qayğı isə ikiqat olmalıdır. Bu sırada autizmdən əziyyət çəkən uşaqları xüsusilə qeyd edə bilərik. Məlumdur ki, autizm fərqlilikdir. Bu sindromdan əziyyət çəkən azyaşlıların sağlam həyata cəlb olunması, onların digər yaşıdlarından geri qalmaması olduqca vacibdir. Uşaqlarla işləyən hər kəs bunu bilməli və əməl etməlidir. Nəticədə həm özümüz, həm də cəmiyyətimiz qazanar.

Yeri gəlmişkən, autizmli uşaqların sosial mühitə uyğunlaşdırılmasında “Birgə və Sağlam” İctimai Birliyinin xüsusi xidmətləri var. 2013-cü ildə təsis edilən İctimai Birliyin məqsədi autizm spektr pozuntusu olan şəxslər və onların ailələrinə dəstək olmaqdır. Birlik bugünədək

Heydər Əliyev Fondu və Birinci vitse-prezident möhtərəm Mehriban Əliyevanın nəcib dəstəyi ilə autizmli şəxslərin təhsili, cəmiyyətə inteqrasiyası, əmək məşğulluğu və sosial rifahı üçün çoxsaylı layihə və tədbirlər həyata keçirib.

Yeganə BAYRAMOVA

Paylaş:

Baxılıb: 695 dəfə