Müharibədən sonrakı iki il yarım ərzində də ordu quruculuğu məsələlərinə çox böyük diqqət göstərilib

Bakı:

24 °C

52 %

0 m/s

AZ RU EN

Ana səhifə / YAP xəbərləri / Müharibədən sonrakı iki il yarım ərzində də ordu quruculuğu məsələlərinə çox böyük diqqət göstərilib

Müharibədən sonrakı iki il yarım ərzində də ordu quruculuğu məsələlərinə çox böyük diqqət göstərilib

25.04.2023 [11:23]

Vüsal Hüseynov- YAP Xocavənd rayon təşkilatı sədri

Ordumuz dövlətimizin və xalqımızın qürur və şərəf mənbəyidir. Azərbaycan güclü, qüdrətli və nizam-intizamlı orduya malikdir. Müasir silahlarla təmin olunan, yüksək döyüş potensialına və qabiliyyətinə malik olan Azərbaycan Silahlı Qüvvələri dünyanın peşəkar orduları siyahısına daxil olmağı bacarıb. Ordumuz regionda hər hansı təhlükənin qarşısını almaq iqtidarındadır. Buna heç kəs şübhə edə bilməz.

Azərbaycan tarixinin ən şərəfli səhifələrdən biri – 44 günlük Vətən müharibəsində ordumuz özünü məğlubedilməz hesab edən Ermənistan ordusunu darmadağın edərək Qarabağı otuz illik işğaldan azad etdi. Hərbi əməliyyatlar zamanı ordumuz həm quru, həm də havadan erməni işğalçılarına sarsıdıcı zərbələr endirməklə onların bütün mövqelərini və hərbi ləvazimatlarını məhv etdi. Qısa müddət ərzində Ermənistan ordusunun Azərbaycan Ordusu tərəfindən məhv edilməsi dünya hərb tarixinə ən uğurlu və inanılmaz nailiyyət kimi həkk olunub.

Bizə belə bir tarixi qələbə yaşadan ordumuza minnətdar olmalıyıq. Vətən müharibəsində erməni işğalçıları üzərində qalibiyyətlə kifayətlənməyən Azərbaycan Ordusu həm canlı qüvvə, həm də hərbi texniki cəhətdən daha da möhkəmlənməkdədir. Müharibədən sonra da ordumuz daha müasir və effektli silahlarla təmin olunub, Türkiyə ilə birgə bir sıra hərbi təlimlərdə iştirak edib.

Son iki-üç ildə ordumuzda yeni effektli nizam-intizam sisteminin formalaşmasına daha çox diqqət yetirilir. Azərbaycan Respublikasının Prezidenti İlham Əliyev Azərbaycan Televiziyasına son müsahibəsində ordunun möhkəmlənməsi istiqamətində zəruri addımların atılmasını, müfəssəl tədbirlərin görülməsini vacib hesab edib:

“İkinci yerdə bizim hərbi xərclərimiz olacaq. Çünki buna da böyük ehtiyac var. Dünyada gedən prosesləri hər kəs izləyir. Dünyada təhdidlər artır, təhlükələr artır. Düzdür, biz İkinci Qarabağ müharibəsində düşmənin başını əzərək möhtəşəm Qələbə əldə etmişik. Ancaq Ermənistanda revanşist qüvvələr yenə baş qaldırır, biz istənilən vəziyyətə hazır olmalıyıq və elə bir ordu yaratmalıyıq ki, dünya miqyasında nümunəvi olsun və ən güclü ordulardan biri olsun”.

Prezidentin dediyi kimi, regionda dövlətimizin siyasi müstəqilliyinə və ərazi bütövlüyünə qarşı hər hansı təhlükənin baş verməyəcəyinə heç kəs zəmanət verə bilməz. Təhlükə hər an baş verə bilər. Azərbaycan-Ermənistan sərhəd ərazilərində, eləcə də Qarabağda hərbi-siyasi vəziyyətin həssas olması hər kəsə aydındır. Ermənistanda revanşist və radikal millətçi qüvvələrin fəaliyyəti günbəgün intensivləşməkdədir. Həmin ünsürlər sərhəd ərazilərdə kiçik silahlı qruplaşmalar yaradır, hətta yerli əhali arasında anti-Azərbaycan və anti-Türkiyə təbliğatı ilə məşğul olurlar.

Azərbaycan Ordusu bütün bunlara cavab vermək iqtidarındadır və dövlət başçısımızın çıxışındakı əminlik də məhz buna dayanır.

Paylaş:

Baxılıb: 507 dəfə