Elmar Məmmədov: Dağlıq Qarabağ münaqişəsi artıq tarixə qovuşub

Bakı:

27 °C

54 %

5 m/s

Əlaqə

AZ RU EN

Ana səhifə / YAP xəbərləri / Elmar Məmmədov: Dağlıq Qarabağ münaqişəsi artıq tarixə qovuşub

Elmar Məmmədov: Dağlıq Qarabağ münaqişəsi artıq tarixə qovuşub

29.01.2021 [09:22]

“Yanvarın 11-də Moskvada Rusiya Prezidenti Vladimir Putin, Azərbaycan Prezidenti İlham Əliyev və Ermənistanın baş naziri Nikol Paşinyan arasında keçirilən üçtərəfli görüş hərbi əməliyyatlar Azərbaycanın tam qələbəsi ilə başa çatdıqdan sonra qalib ölkənin tarixi zəfərinin möhkəmləndirilməsi üçün növbəti mərhələ oldu”. Bu fikirləri qəzetimizə açıqlamasında Yeni Azərbaycan Partiyası (YAP) İcra Katibliyinin Gənclərlə iş qrupunun rəhbəri Elmar Məmmədov deyib.
E.Məmmədov bildirib ki, Moskva görüşündə müzakirələrin əsas mövzusu 10 noyabr Bəyanatının 9-cu bəndində nəzərdə tutulan nəqliyyat kommunikasiyaları və iqtisadi əlaqələrin bərpası ilə bağlı idi. Bu, faktiki olaraq “Mehri dəhlizi” - Naxçıvana, daha sonra Türkiyəyə dəmir yolunun açılması üzrə işlərin başlanması deməkdir. Açılacaq kommunikasiya xətləri “Şərq-Qərb” nəqliyyat dəhlizinin tərkib hissəsi olacaq. Nəticədə Azərbaycanın Naxçıvan Muxtar Respublikası, həmçinin Türkiyə ilə əlaqələri güclənəcək, ölkəmizin geoiqtisadi əhəmiyyəti artacaq. Yaxın zamanlarda Ermənistan vasitəsilə Azərbaycan-Naxçıvan-Türkiyə və Ermənistan-Azərbaycan-Rusiya, eləcə də Ermənistan-Azərbaycan-İran marşrutları üzrə nəqliyyat dəhlizlərinin işə salınacağı barədə Azərbaycan və Rusiya rəhbərlərinin verdiyi açıqlamalar onu göstərir ki, danışıqlarda mövqe üstünlüyü birmənalı olaraq Azərbaycanın tərəfində olub. Azərbaycan tərəfinin görüşdən əvvəl irəli sürdüyü və yeni bəyanatla təsbit olunmuş tələblər regional sabitliyi və təhlükəsizliyi möhkəmləndirməyə xidmət edir.
Onun sözlərinə görə, Moskva görüşü zamanı, eləcə də imzalanmış bəyanatda bircə dəfə də olsun “Dağlıq Qarabağ münaqişəsi” ifadəsi işlədilmədi. Bu da o deməkdir ki, artıq bu münaqişə tarixə qovuşub. İmzalanan bəyanatdan da görünür ki, görüş Azərbaycanın maraqları çərçivəsindən kənara çıxmayıb. Bu isə bir daha Azərbaycanın hərb meydanında olduğu kimi, diplomatiya arenasında da, müzakirələrdə də qalibiyyəti güzəştə getmək niyyətinin olmayacağını göstərir. Azərbaycan diplomatiya sahəsində daha bir üstünlük qazandı və danışıqların məcrasını öz istədiyi istiqamətə yönəltdi.
E.Məmmədov diqqətə çatdırıb ki, Prezident İlham Əliyev nəyi nə zaman və necə etmək lazım olduğunu çox yaxşı bilir. Bununla da Azərbaycan tərəfi qapalı görüşdə istədiyinə nail oldu. Ortaq bəyanatın mətni - humanitar və kommunikasiya məsələləri ilə bağlı İşçi Qrupun yaradılması da bunu təsdiqləyir. Bakının şərtləri qəbul edilməsəydi, üçtərəfli əməkdaşlıq formatı olmayacaqdı. “Bütövlükdə, noyabrın 10-da Müzəffər Ali Baş Komandan İlham Əliyevin rəhbərliyi ilə rəşadətli Ordumuzun qazandığı şanlı Qələbə diplomatik müstəvidə də davam etdirilir. Bu gün qürurla qeyd edirik ki, 44 günlük hərbi əməliyyatlar və Bəyanatın imzalanması ilə Müzəffər Ali Baş Komandanımız, Ordumuz xalqımızın arzularını reallığa çevirdi, düşməni torpaqlarımızdan qovdu”, - deyə E.Məmmədov söyləyib.

Paylaş:

Baxılıb: 736 dəfə