Prezident İlham Əliyevin qətiyyəti, dəmir iradəsi, uğurlu daxili və xarici siyasəti Vətən müharibəsində Qələbəni şərtləndirən amillərdir

Bakı:

27 °C

54 %

7 m/s

AZ RU EN

Ana səhifə / YAP xəbərləri / Prezident İlham Əliyevin qətiyyəti, dəmir iradəsi, uğurlu daxili və xarici siyasəti Vətən müharibəsində Qələbəni şərtləndirən amillərdir

Prezident İlham Əliyevin qətiyyəti, dəmir iradəsi, uğurlu daxili və xarici siyasəti Vətən müharibəsində Qələbəni şərtləndirən amillərdir

25.12.2020 [09:21]

Prezident, Müzəffər Ali Baş Komandan İlham Əliyevin yenilməz qətiyyəti, dəmir iradəsi, yürütdüyü uğurlu daxili və xarici siyasət, qəbul etdiyi qərarlar, atdığı addımlar, diplomatik manevrləri Vətən müharibəsində qazandığımız Qələbəni şərtləndirən başlıca amillərdir.
AZƏRTAC-ın bölgə müxbiri xəbər verir ki, bu fikir Yeni Azərbaycan Partiyası (YAP) Ağcabədi rayon təşkilatında “Azərbaycan tarixinə şərəf, ləyaqət, qürur səhifəsi yazan Ali Baş Komandan İlham Əliyev” mövzusunda onlayn keçirilən elmi-praktik konfransda səsləndirilib.
Konfransda məruzə edən YAP Ağcabədi rayon təşkilatının sədri Rövşən Əhmədov bildirib ki, Prezident İlham Əliyev işğal altındakı torpaqlarımızın azad olunması üçün daim çalışıb, beynəlxalq tədbirlərdə Azərbaycanın haqq sözünü dünya liderlərinə və münaqişənin danışıqlar yolu ilə həll edilməsinə cavabdeh olan ATƏT-in Minsk qrupunun həmsədrlərinə çatdırıb. Lakin münaqişənin həlli uzadılır, həmsədrlər status-kvonu qoruyub saxlamağa çalışırdılar. BMT Təhlükəsizlik Şurasının Ermənistan silahlı qüvvələrinin Azərbaycan ərazilərindən qeyd-şərtsiz çıxarılmasına dair qətnamələrinin tələbləri yerinə yetirilmirdi. Belə bir vəziyyət Prezidentimizi qane edə bilməzdi.
R.Əhmədov dövlətimizin başçısının rəhbərliyi ilə Azərbaycanın iqtisadiyyatının inkişaf etdirildiyini, ordumuzun daha da gücləndirildiyini, ən müasir silah və texnikaların alındığını diqqətə çatdırıb. Bildirib ki, həm diplomatik sahədə, həm də informasiya mübarizəsində Prezidentimiz gərgin işləyir, xalqımızın haqq səsini dünya birliyinə çatdırırdı. Ermənistan silahlı qüvvələrinin sentyabrın 27-də növbəti hərbi təxribatlarına cavab olaraq Müzəffər Ali Baş Komandan İlham Əliyevin rəhbərliyi ilə ordumuzun həyata keçirdiyi əks-hücum əməliyyatları Azərbaycanın Böyük Qələbəsi ilə nəticələndi. Vətən müharibəsindəki Qələbə xalqımızın üzərindən məğlub, torpaqları işğal altında qalan, qaçqın və məcburi köçkün sözünü götürdü. Ölkəmizdə xalq-dövlət-ordu birliyinin ən yüksək səviyyədə olduğunu bir daha göstərdi. Vətən müharibəsinin əhəmiyyəti, mahiyyəti və nəticələri hələ uzun müddət təhlil ediləcək, bu Qələbənin şəninə dastanlar, bədii və elmi əsərlər yazılacaq, filmlər çəkiləcək.
Konfransda YAP Ağcabədi rayon təşkilatı qadınlar şurasının sədri Radə Qafarova, Qarabağ müharibəsi qazisi Mehdi Mehdiyev, Ağcabədi bələdiyyəsinin sədri Solmaz Rəhimova, Azərbaycan Dövlət Pedaqoji Universitetinin Ağcabədi filialının direktor müavini Mahir Səlimov və başqaları çıxış edərək Prezident İlham Əliyevi Ulu Öndər Heydər Əliyevin siyasi kursunun uğurlu davamçısı, Azərbaycanın dövlət müstəqilliyinin, ərazi bütövlüyünün qarantı, xalqın sosial problemlərinin həllini daim diqqətdə saxlayan, güclü və modern ordu qurucusu, işğal altındakı torpaqlarımızı 44 gündə qaytarmağa nail olan qətiyyətli sərkərdə olduğunu qeyd ediblər.
Konfransda YAP Ağcabədi rayon təşkilatının aparat rəhbəri Nazim Bünyadov Vətən müharibəsi dövründə hamının bir yumruq kimi birləşərək arxa cəbhədə də orduya dəstək olduğunu bildirib.

Paylaş:

Baxılıb: 744 dəfə