YAP Qaradağ rayon təşkilatında ərazi ilk partiya təşkilatları sədrlərinin iclası keçirilib

Bakı:

21 °C

64 %

4 m/s

Əlaqə

AZ RU EN

Ana səhifə / YAP xəbərləri / YAP Qaradağ rayon təşkilatında ərazi ilk partiya təşkilatları sədrlərinin iclası keçirilib

YAP Qaradağ rayon təşkilatında ərazi ilk partiya təşkilatları sədrlərinin iclası keçirilib

07.09.2019 [09:50]

Dünən Yeni Azərbaycan Partiyası (YAP) Qaradağ rayon təşkilatında ərazi ilk partiya təşkilatları sədrlərinin iclası keçirilib. Tədbirdə YAP Qaradağ rayon təşkilatında görülən işlər və qarşıda duran vəzifələr geniş müzakirə olunub. Yığıncaqda çıxış edən YAP Qaradağ rayon təşkilatının sədri, Milli Məclisin deputatı Aydın Hüseynov əvvəlcə YAP-ın fəaliyyəti, ölkəmizdəki dinamik inkişaf proseslərində mühüm rolu və töhfələri barədə geniş məlumat verib. A.Hüseynov daha sonra YAP-ın təşəbbüsü və təşkilatçılığı ilə həyata keçirilən mühüm layihələr barədə də danışaraq vurğulayıb ki, Yeni Azərbaycan Partiyası ekoloji mühitin və yaşıllığın qorunması istiqamətində ağacəkmə aksiyası, Azərbaycan Ordusuna dəstək məqsədilə Silahlı Qüvvələrə Yardım Fonduna dəstək, son olaraq isə qanvermə aksiyası keçirərək bir daha özünün missiyasına sadiq qaldığını sübuta yetirib.
Millət vəkili YAP-ın Azərbaycanın və regionun ən güclü və nüfuzlu siyasi təşkilatı olduğunu diqqədə çatdıraraq partiyamızın ötən illərdə çox böyük inkişaf yolu keçdiyini qeyd edib. O, Yeni Azərbaycan Partiyasının xalqı öz ətrafında birləşdirərək ümumxalq partiyasına çevrildiyini, eyni zamanda, ölkədə demokratiyanın inkişafında aparıcı qüvvə kimi özünü təsdiqlədiyini bildirib. Vurğulayıb ki, YAP-ın amalı xalqa, Vətənə, dövlətə sədaqətlə xidmət etməkdən ibarətdir. “Yeni Azərbaycan Partiyası xalqın mənafelərinə xidmət etmək, ölkəmizin qarşısında duran məsələləri həll etmək üçün zamanın tələblərinə uyğun olaraq zərurətdən yaranmış bir partiyadır. Qısa müddət ərzində Yeni Azərbaycan Partiyası xalqın böyük əksəriyyətinin etimadını qazanıb və güclü təşkilati struktur yaradaraq avanqard siyasi qüvvəyə çevrilib. Bu isə dünənin, bu günün, gələcəyin partiyasının təməlində yalnız xalqın sevgisinin, etimadının dayandığını bir daha sübut edir”, - deyə Aydın Hüseynov qeyd edib.
Millət vəkili vurğulayıb ki, Prezident İlham Əliyevin müstəqil ölkəmizin inkişafı, ölkə əhalisinin sosial rifahının yaxşılaşdırılması istiqamətində həyata keçirdiyi genişmiqyaslı tədbirlər, onun real nəticələri partiyanın hər bir üzvü qarşısında məsul vəzifələr qoyur. Aydın Hüseynov həmçinin qarşıda duran digər vəzifələr barədə də danışaraq müvafiq tövsiyə və tapşırıqlarını verib.
Digər çıxış edənlər də gündəmdəki mövzularla bağlı fikirlərini, qarşıdakı dövrdə partiya üzvlərinin daha da fəal olacaqlarını bildiriblər.

Paylaş:

Baxılıb: 802 dəfə