Azərbaycan–Almaniya münasibətlərinin inkişafında yüksək səviyyəli siyasi dialoq da mühüm rol oynayır

Bakı:

30 °C

39 %

0 m/s

AZ RU EN

Ana səhifə / YAP xəbərləri / Azərbaycan–Almaniya münasibətlərinin inkişafında yüksək səviyyəli siyasi dialoq da mühüm rol oynayır

Azərbaycan–Almaniya münasibətlərinin inkişafında yüksək səviyyəli siyasi dialoq da mühüm rol oynayır

24.07.2026 [14:35]

Azərbaycan və Almaniya arasında iqtisadi əməkdaşlıq son illərdə davamlı şəkildə inkişaf edərək ikitərəfli münasibətlərin əsas istiqamətlərindən birinə çevrilib. Hər iki ölkə iqtisadi əlaqələrin genişləndirilməsində maraqlıdır və bu əməkdaşlıq qarşılıqlı fayda prinsipi əsasında inkişaf edir. Almaniyanın dünyanın aparıcı sənaye və texnologiya mərkəzlərindən biri olması, Azərbaycanın isə əlverişli coğrafi mövqeyi, zəngin enerji ehtiyatları və əlverişli investisiya mühiti iki ölkə arasında iqtisadi tərəfdaşlığın daha da möhkəmlənməsinə şərait yaradır. Məhz bu amillər Almaniya şirkətlərinin Azərbaycanda fəaliyyətini genişləndirməsinə və yeni layihələrə maraq göstərməsinə səbəb olub.

Hazırda Almaniya kapitalına malik 200-dən çox şirkət Azərbaycanda uğurla fəaliyyət göstərir. Bu şirkətlər sənaye, enerji, tikinti, logistika, kənd təsərrüfatı, informasiya texnologiyaları, nəqliyyat, xidmət və digər sahələrdə müxtəlif layihələr həyata keçirirlər. Onların fəaliyyəti ölkəyə xarici investisiyaların cəlb olunması ilə yanaşı, müasir texnologiyaların tətbiqinə, istehsal proseslərinin təkmilləşdirilməsinə və beynəlxalq təcrübənin yerli müəssisələrdə tətbiqinə də mühüm töhfə verir. Bundan başqa, Almaniya şirkətlərinin fəaliyyəti minlərlə insanın məşğulluğunun təmin edilməsinə, peşəkar kadr hazırlığının gücləndirilməsinə və yerli mütəxəssislərin beynəlxalq standartlara uyğun təcrübə qazanmasına şərait yaradır. Bu isə ölkənin qeyri-neft sektorunun inkişafına və iqtisadiyyatın şaxələndirilməsi siyasətinə mühüm dəstək verir.

Azərbaycan–Almaniya münasibətlərinin inkişafında yüksək səviyyəli siyasi dialoq da mühüm rol oynayır. Prezident İlham Əliyev mətbuata bəyanatında bildirib ki, imzalanmış yeni sənədlər iki ölkə arasında əməkdaşlığın daha da dərinləşməsinə və münasibətlərin yeni mərhələyə yüksəlməsinə xidmət edəcək. Dövlət başçısının sözlərinə görə, uzun müddətdir nəzərdə tutulan strateji dialoqun reallaşması mühüm nailiyyət hesab olunur. Strateji tərəfdaşlığın inkişafına dair qəbul edilmiş Birgə Bəyannamə gələcək əməkdaşlığın əsas istiqamətlərini müəyyənləşdirən mühüm siyasi sənəd kimi qiymətləndirilir. Bu sənəd siyasi məsləhətləşmələrin daha intensiv aparılması, iqtisadi əlaqələrin genişləndirilməsi, eləcə də sənaye, yüksək texnologiyalar, rəqəmsallaşma, elm, təhsil və innovasiya sahələrində yeni birgə layihələrin həyata keçirilməsi üçün geniş imkanlar yaradır.

Prezident İlham Əliyev çıxışında Almaniya şirkətlərinin Azərbaycandakı fəaliyyətini iki ölkə arasında iqtisadi tərəfdaşlığın uğurlu nümunəsi kimi qiymətləndirib. O bildirib ki, Almaniya şirkətləri ölkəmizdə müxtəlif sahələrdə fəal iştirak edir və həyata keçirdikləri layihələr Azərbaycanın iqtisadi inkişafına mühüm töhfə verir. Dövlət başçısı vurğulayıb ki, Almaniya nümayəndə heyətinin Azərbaycana səfəri, keçirilən biznes forumları və işgüzar görüşlər gələcəkdə yeni investisiya layihələrinin həyata keçirilməsinə, qarşılıqlı sərmayələrin artmasına və biznes əlaqələrinin daha da möhkəmlənməsinə müsbət təsir göstərəcək. Bu cür əməkdaşlıq hər iki ölkənin sahibkarları üçün yeni imkanlar yaradır və iqtisadi münasibətlərin davamlı inkişafına xidmət edir.

İkitərəfli əməkdaşlığın əsas istiqamətlərindən biri enerji sektorudur. Azərbaycan uzun illərdir Avropanın etibarlı enerji tərəfdaşı kimi tanınır və Almaniya da Azərbaycan təbii qazını idxal edən ölkələr sırasında yer alır. Enerji sahəsində əməkdaşlıq yalnız təbii qaz ixracı ilə məhdudlaşmır. Son illərdə bərpa olunan enerji mənbələrinin inkişafı, xüsusilə külək və günəş enerjisi layihələrinin həyata keçirilməsi istiqamətində də yeni əməkdaşlıq imkanları yaranıb. Azərbaycanın yaşıl enerji strategiyası Almaniyanın bu sahədə malik olduğu qabaqcıl texnologiyalar və təcrübə ilə uyğunluq təşkil edir. Bu əməkdaşlıq həm Azərbaycanın enerji potensialının daha səmərəli istifadəsinə, həm də Avropanın enerji təhlükəsizliyinin möhkəmləndirilməsinə əhəmiyyətli töhfə verə bilər.

Bununla yanaşı, nəqliyyat və logistika sahəsində əməkdaşlıq da xüsusi əhəmiyyət daşıyır. Azərbaycanın Şərq-Qərb və Şimal-Cənub beynəlxalq nəqliyyat dəhlizlərində yerləşməsi Almaniya şirkətləri üçün yeni logistika və ticarət imkanları yaradır. Orta Dəhliz boyunca yükdaşımaların artması Azərbaycanın regional nəqliyyat mərkəzi kimi mövqeyini gücləndirir və Almaniya ilə iqtisadi əlaqələrin inkişafına əlavə stimul verir. Rəqəmsal iqtisadiyyat, süni intellekt, ağıllı şəhər layihələri və ekoloji texnologiyalar kimi yeni istiqamətlər də gələcək əməkdaşlığın perspektivli sahələri hesab olunur.

Azərbaycan və Almaniya arasında iqtisadi əməkdaşlığın gələcəkdə daha da genişlənəcəyi gözlənilir. Yeni investisiyalar, texnologiya transferi, innovativ layihələrin həyata keçirilməsi və biznes tərəfdaşlığının inkişafı hər iki ölkənin iqtisadi maraqlarına xidmət edir. Almaniya şirkətlərinin Azərbaycandakı uğurlu fəaliyyəti göstərir ki, qarşılıqlı etimada və uzunmüddətli tərəfdaşlığa əsaslanan əməkdaşlıq davamlı iqtisadi inkişaf üçün möhkəm zəmin yaradır. Bu münasibətlərin daha da dərinləşməsi həm Azərbaycan, həm də Almaniya üçün yeni iqtisadi imkanlar açacaq və qarşılıqlı faydalı tərəfdaşlığın gələcək illərdə də uğurla davam etməsinə şərait yaradacaq.

İlkin Bağırov

Yap Babək rayon təşkilatının əməkdaşı

Paylaş:

Baxılıb: 46 dəfə