Azərbaycan–Almaniya əməkdaşlığında yeni imkanlar

Bakı:

25 °C

69 %

4 m/s

Əlaqə

AZ RU EN

Ana səhifə / YAP xəbərləri / Azərbaycan–Almaniya əməkdaşlığında yeni imkanlar

Azərbaycan–Almaniya əməkdaşlığında yeni imkanlar

24.07.2026 [10:37]

Azərbaycan Respublikasının Prezidenti İlham Əliyevin Almaniya Federativ Respublikasına rəsmi səfəri çərçivəsində Federal Kansler Fridrix Mertslə keçirdiyi görüş və mətbuata verdiyi bəyanat iki ölkə arasında münasibətlərin dinamik inkişaf etdiyini bir daha nümayiş etdirdi. Dövlət başçısının çıxışında səsləndirdiyi fikirlər göstərdi ki, Azərbaycan və Almaniya qarşılıqlı maraqlara əsaslanan əməkdaşlığı daha da genişləndirmək əzmindədir.

Prezident İlham Əliyev bildirdi ki, səfər zamanı imzalanmış Birgə Bəyannamə strateji dialoqun başlanmasına zəmin yaradacaq və gələcək əməkdaşlığın əsas istiqamətlərini müəyyənləşdirəcək. Bu sənəd siyasi əlaqələrin möhkəmləndirilməsi ilə yanaşı, iqtisadi və humanitar sahələrdə də yeni təşəbbüslərin həyata keçirilməsinə imkan verəcək.

Dövlət başçısı Almaniya ilə iqtisadi münasibətlərin inkişafı üçün geniş potensialın mövcud olduğunu diqqətə çatdırdı. Azərbaycanda fəaliyyət göstərən çoxsaylı Almaniya şirkətlərinin uğurlu fəaliyyəti, qarşılıqlı investisiya imkanlarının müzakirə olunması və yeni layihələr üzrə irəli sürülən təkliflər tərəflərin uzunmüddətli tərəfdaşlığa xüsusi önəm verdiyini göstərir.

Prezident İlham Əliyev enerji sahəsində əməkdaşlığın da yeni mərhələyə qədəm qoyduğunu vurğuladı. Azərbaycanın təbii qazının artıq Almaniyaya ixrac edilməsi, neft tədarükünün davam etməsi və yaşıl enerji layihələrinin perspektivləri ölkəmizin Avropanın enerji təhlükəsizliyində oynadığı mühüm rolu daha da gücləndirir.

Çıxışda nəqliyyat və logistika sahəsində əməkdaşlıq imkanlarına da toxunulub. Prezident qeyd etdi ki, Azərbaycanın həyata keçirdiyi genişmiqyaslı infrastruktur layihələri ölkəmizi Avropa ilə Orta Asiya arasında mühüm tranzit mərkəzinə çevirib. Bu üstünlüklər Almaniya ilə yeni iqtisadi və ticari əlaqələrin inkişafı üçün əlverişli şərait yaradır.

Prezident İlham Əliyev regional sülh prosesindən bəhs edərək Azərbaycanın münaqişədən sonrakı dövrdə əməkdaşlıq və etimad mühitinin formalaşdırılması istiqamətində ardıcıl addımlar atdığını diqqətə çatdırdı. Dövlət başçısı Almaniyanın bu prosesə verdiyi dəstəyi yüksək qiymətləndirərək bildirdi ki, bölgədə davamlı sülh və sabitlik bütün tərəflərin maraqlarına xidmət edir.

Bəyanatda Avropa İttifaqı ilə münasibətlərin inkişafı da xüsusi vurğulandı. Prezident İlham Əliyevin səsləndirdiyi fikirlər göstərir ki, Azərbaycan Avropa ilə əlaqələrini qarşılıqlı hörmət və etibarlı tərəfdaşlıq prinsipləri əsasında inkişaf etdirməyə davam edir. Berlin görüşü isə bu əməkdaşlığın gələcək perspektivlərini daha da genişləndirən mühüm siyasi hadisə kimi yadda qalır.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 209 dəfə