Azərbaycan-Türkmənistan strateji tərəfdaşlığı

Bakı:

26 °C

48 %

2 m/s

Əlaqə

AZ RU EN

Ana səhifə / YAP xəbərləri / Azərbaycan-Türkmənistan strateji tərəfdaşlığı

Azərbaycan-Türkmənistan strateji tərəfdaşlığı

25.06.2026 [11:13]

Azərbaycan və Türkmənistan arasında qurulan müasir dövlətlərarası münasibətlər fundamental əsaslara - qədim tarixi köklərə, ortaq mədəni dəyərlərə və sarsılmaz qardaşlıq bağlarına söykənir. Hər iki xalqı əsrlər boyu formalaşmış eyni dil qrupu, oxşar adət-ənənələr və dərin mənəvi yaxınlıq birləşdirir. Bu gün müstəqil dövlətlər olaraq Azərbaycan və Türkmənistan öz siyasi kurslarında məhz bu tarixi irsi rəhbər tutur. Hazırda formalaşan ikitərəfli əlaqələr qarşılıqlı hörmət, səmimi etimad və bərabərhüquqlu dostluq prinsipləri üzərində uğurla inkişaf etməkdədir. Dövlət rəhbərlərinin mütəmadi xarakter daşıyan qarşılıqlı səfərləri, eləcə də ali səviyyəli siyasi dialoq bu münasibətlərin dinamik surətdə möhkəmlənməsinə birbaşa xidmət edir.

İki ölkə arasında mövcud olan tərəfdaşlıq bu gün demək olar ki, bütün strateji sahələri əhatə edir. Siyasi müstəvidə əldə olunan tam anlaşma iqtisadi, ticarət, enerji və nəqliyyat-loqistika sahələrində sıx inteqrasiyaya rəvac verir. Xüsusilə regional təhlükəsizlik və iqtisadi layihələrin icrası baxımından Xəzər dənizi mühüm əhəmiyyət kəsb edir. Azərbaycan rəhbərinin qeyd etdiyi kimi, Xəzər dənizi iki qardaş xalq arasında coğrafi maneə deyil, əksinə, dostluq, sülh və tərəfdaşlıq körpüsü rolunu oynayır. Hər iki dövlətin tranzit potensialı Şərq-Qərb nəqliyyat dəhlizinin effektiv fəaliyyətini təmin edir və regionun logistik xəritəsini zənginləşdirir.

Eyni zamanda, Azərbaycan və Türkmənistan qlobal və regional müstəvidə də vahid mövqedən çıxış edirlər. Beynəlxalq təşkilatlar-Birləşmiş Millətlər Təşkilatı, İslam Əməkdaşlıq Təşkilatı, Türk Dövlətləri Təşkilatı və digər nüfuzlu platformalar çərçivəsində iki ölkə bir-birinin suverenliyini və maraqlarını qətiyyətlə dəstəkləyir, ortaq maraqlar naminə birgə diplomatik səylər göstərirlər.

Dövlətlərarası münasibətlərin humanitar ölçüsü də diqqət mərkəzindədir. Qarşılıqlı olaraq mədəniyyət günlərinin təşkili, yaradıcı gənclərin sərgiləri və rəngarəng konsert proqramlarının keçirilməsi xalqlarımızın bir-birini daha yaxından tanımasına, ortaq irsin gənc nəslə ötürülməsinə geniş imkanlar yaradır. Elm və təhsil sahəsində əlaqələrin genişləndirilməsi, ali təhsil müəssisələri arasında tələbə və tədqiqatçı mübadiləsinin aparılması gələcək nəsillər arasında formalaşacaq dostluq münasibətlərinin intellektual təməlini qoyur.

Türkmənistan Prezidenti Sərdar Berdiməhəmmədovun ölkəmizə səfəri çərçivəsində dövlət başçılarının mətbuata bəyanatları zamanı Prezident İlham Əliyev öz çıxışında Türkmənistan tərəfinin Azərbaycanın işğaldan azad edilmiş ərazilərinin – Qarabağın bərpasına və yenidən qurulmasına göstərdiyi dəstəyi xüsusi olaraq qeyd etmişdir. Azad olunmuş torpaqlarda həyata keçirilən humanitar layihələr və göstərilən diqqət real qardaşlığın və çətin gündə bir yerdə olmağın bariz nümayişidir. Bu addım münasibətlərin təkcə rəsmi kabinetlərdə deyil, həm də xalqların qəlbində səmimi və sarsılmaz duyğulara əsaslandığını sübut edir.

Azərbaycan və Türkmənistan ortaq tarixdən, ortaq zəfərlərdən və çətinliklərdən güc alaraq gələcəyə doğru inamla və birlikdə addımlayır. Hər iki müstəqil dövlət regionda davamlı sülhün, dayanıqlı sabitliyin və hərtərəfli iqtisadi inkişafın möhkəmlənməsinə öz real töhfələrini verməkdədir. Qardaşlıq əlaqələrinin həm ikitərəfli, həm də çoxtərəfli formatda daha da genişlənməsi regional geosiyasətə müsbət təsir göstərir, yeni-yeni iqtisadi imkanlar və böyük uğurlar vəd edir. Dövlət başçısının əminliklə bildirdiyi kimi, Azərbaycan-Türkmənistan dostluğu və strateji tərəfdaşlığı bundan sonra da artan xətlə möhkəmlənəcək, zamanın sınaqlarından uğurla keçərək gələcək nəsillər üçün real bir örnək və əvəzsiz miras olacaqdır.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 50 dəfə