Enerji təhlükəsizliyi

Bakı:

23 °C

64 %

0 m/s

Əlaqə

AZ RU EN

Ana səhifə / YAP xəbərləri / Enerji təhlükəsizliyi

Enerji təhlükəsizliyi

02.06.2026 [12:53]

Müasir dövrdə enerji təhlükəsizliyi dövlətlərin milli təhlükəsizliyinin və iqtisadi inkişafının əsas amillərindən birinə çevrilib. Xüsusilə qlobal geosiyasi gərginliklərin artdığı, müxtəlif regionlarda münaqişələrin enerji bazarlarına təsir göstərdiyi bir şəraitdə etibarlı enerji təchizatının təmin olunması beynəlxalq gündəliyin prioritet məsələlərindəndir.

İyunun 1-də Bakı Ekspo Mərkəzində keçirilən “Bakı Enerji Həftəsi” çərçivəsində təşkil olunan 31-ci Beynəlxalq Xəzər Neft və Qaz Sərgisi “Caspian Oil and Gas”, 14-cü Xəzər Beynəlxalq Təmiz Enerji Sərgisi “Caspian Power” və 31-ci “Baku Energy Forum”un rəsmi açılış mərasimində çıxış edən Azərbaycan Respublikasının Prezidenti İlham Əliyev enerji təhlükəsizliyinin əhəmiyyətinə xüsusi diqqət çəkib. Dövlət başçısı bildirib ki, xüsusilə Yaxın Şərqdə baş verən hadisələr və regiondakı böhran bir çox ölkələrin enerji təhlükəsizliyinə ciddi təsir göstərir. Belə bir şəraitdə Azərbaycan uzun illər ərzində həyata keçirdiyi məqsədyönlü enerji siyasəti ilə etibarlı tərəfdaş kimi öz mövqeyini daha da möhkəmləndirib.

Azərbaycan enerji təhlükəsizliyinin təmin olunması istiqamətində iri həcmli investisiyalar yatıraraq mühüm infrastruktur layihələri reallaşdırıb. Bu layihələr sırasında Xəzər dənizini Aralıq dənizi ilə birləşdirən Bakı-Tbilisi-Ceyhan neft kəməri, Xəzər dənizini Qara dənizlə birləşdirən Bakı-Supsa neft kəməri xüsusi yer tutur. Həmin layihələr Azərbaycanın enerji resurslarının dünya bazarlarına təhlükəsiz və etibarlı şəkildə çatdırılmasında mühüm rol oynayıb.

Enerji əməkdaşlığının yeni mərhələsini isə Cənub Qaz Dəhlizi təşkil edir. Cənubi Qafqaz qaz kəməri, TANAP və TAP layihələrini özündə birləşdirən bu nəhəng enerji infrastrukturu 3500 kilometr uzunluğunda vahid boru kəməri sistemidir. Müxtəlif coğrafi və texniki çətinliklərə baxmayaraq, uğurla həyata keçirilən bu layihə hazırda Avropa və region ölkələrinin enerji təhlükəsizliyinin təmin edilməsində mühüm əhəmiyyət daşıyır.

Azərbaycanın təşəbbüsü ilə reallaşdırılan bu layihələr təkcə ölkəmizin iqtisadi gücünü artırmır, eyni zamanda beynəlxalq enerji təhlükəsizliyinə mühüm töhfə verir. Bu gün Azərbaycanın enerji siyasəti qarşılıqlı etimad, etibarlı tərəfdaşlıq və uzunmüddətli əməkdaşlıq prinsiplərinə əsaslanır. Məhz bunun nəticəsidir ki, ölkəmiz qlobal enerji bazarında mühüm aktorlardan biri kimi çıxış edir və enerji təhlükəsizliyinin təmin olunmasında etibarlı tərəfdaş statusunu qoruyub saxlayır.

Azərbaycanın həyata keçirdiyi uğurlu enerji strategiyası, reallaşdırdığı beynəlxalq əhəmiyyətli layihələr və tərəfdaş ölkələrlə qurduğu səmərəli əməkdaşlıq enerji təhlükəsizliyinin möhkəmləndirilməsinə xidmət edir. Bu siyasət həm ölkəmizin milli maraqlarının qorunmasına, həm də regional və qlobal enerji sabitliyinin təmin olunmasına mühüm töhfə verir.

Şamo Qasımov

Yeni Azərbaycan Partiyası Laçın rayon təşkilatının sədr müavini

Paylaş:

Baxılıb: 315 dəfə