Sabit və dayanıqlı gələcəyə doğru

Bakı:

24 °C

55 %

3 m/s

Əlaqə

AZ RU EN

Ana səhifə / YAP xəbərləri / Sabit və dayanıqlı gələcəyə doğru

Sabit və dayanıqlı gələcəyə doğru

07.05.2026 [11:16]

Dövlət başçısı İlham Əliyevin bu günlərdə Ermənistanın paytaxtı İrəvan şəhərində keçirilən “Avropa Siyasi Birliyi”nin 8-ci Zirvə toplantısında videbağlantı formatında çıxışı hazırda ölkə və dünya mətbuatında geniş müzakirə edilir. Ölkə Prezidentinin çıxışında əsas diqqət göstərilən məsələlərdən biri bütün Avropa təsisatlarının eyni yanaşma nümayiş etdirmədiyi oldu. Onlardan biri Avropa Parlamenti, digəri isə Avropa Şurası Parlament Assambleyasıdır (AŞPA).

Ötən ilin avqustunda Vaşinqtonda əldə edilən tarixi sülh razılaşması regionda dayanıqlı sülhün və təhlükəsizliyin təmin edilməsinə, Ermənistanla Azərbaycan arasında qarşılıqlı etimadın formalaşmasına yönələn addımların atılmasına geniş imkanlar açdı. Cənab İlham Əliyev çıxışında da bu reallıqlara diqqəti yönəldərək bildirdi ki, bizim üçün və əminəm ki, ermənistanlı həmkarlarımız üçün sülh qurulub. Sülhün əldə olunması faktı əsasında Azərbaycan 1990-cı illərin əvvəlindən Ermənistana tətbiq edilən bütün tranzit məhdudiyyətlərini birtərəfli qaydada aradan qaldırdı. İndiyə qədər Ermənistana Azərbaycan ərazisi vasitəsilə 28 min ton yük çatdırılıb. Azərbaycan hətta əlavə addımlar atdı. Biz ilk dəfə olaraq öz neft məhsullarımızı - benzin və dizeli Ermənistana təchiz etməyə başladıq. Beləliklə, ticarət münasibətləri başladı. Bu vaxta qədər 12 min ton neft məhsullarımız Ermənistana ixrac edilib.

Azərbaycanın ədalətə və beynəlxalq hüquqa söykənən siyasətinin uğurları davamlılığı ilə diqqətdədir. Lakin bu reallıq inkaredilməzdir ki, ölkəmiz hər zaman dünyanın ikili standartlara əsaslanan siyasətini özünə qarşı münasibətdə aydın şəkildə görür. İstər 30 illik işğal, istər 44 günlük İkinci Qarabağ müharibəsi, istərsə də hazırkı dövrdə bu yanaşmaların şahidiyik. Lakin belə qərəzli addımlar Azərbaycanı heç zaman ruhdan salmayıb. Ədalətin və beynəlxalq hüququn tərəfində olaraq daim hədəfə doğru inamla addımlayıb. Tarixi Zəfərimizdən sonra Azərbaycanın regionda dayanıqlı sülhü təmin etmək üçün Ermənistana etdiyi sülh təklifinin reallığa çevrilməsi istiqamətində göstərdiyi səylərə və sonda əldə etdiyi nəticələrə diqqət yetirmək kifayətdir. Lakin bəzi dövlətlər, qurumlar ikili standartlara əsaslanan siyasətlərindən əl çəkmir, ölkəmizə qarşı qeyri-ciddi fikirləri, qərəzli addımları ilə diqqətdədirlər. Dövlət başçısı İlham Əliyev qeyd etdiyimiz çıxışında vurğuladı ki, Azərbaycan 2001-ci ilin yanvarından Avropa Şurasının üzvüdür. Mən o vaxt parlament üzvü və Azərbaycanın nümayəndə heyətinin rəhbəri kimi AŞPA-nın fəal üzvlərindən biri idim. Nümayəndə heyətimizə 2024-cü ilin yanvarına qədər Avropa Şurasında heç zaman məhdudiyyətlər tətbiq edilməmişdi. 2023-cü ilin sentyabrında Azərbaycan Qarabağda separatçılığa son qoydu. Biz BMT Təhlükəsizlik Şurasının 1993-cü ildə qəbul etdiyi və 30 il kağız üzərində qalan 4 qətnaməsini özümüz icra etdik. Dörd ay sonra AŞPA nümayəndə heyətimizə sanksiyalar tətbiq etdi. Əfsuslar olsun ki, ikili standartlar bu gün sanki AŞPA-nın iş təlimatıdır. Azərbaycanın ərazi bütövlüyü istənilən digər ölkənin ərazi bütövlüyü qədər eyni dəyərə malikdir. Bu məsələdə ikili standartlar qəbuledilməzdir.

Avropa Parlamentinə gəldikdə isə bu qurum sülh prosesinə dəstək vermək əvəzinə, ona qarşı sabotajla məşğul olur. İkinci Qarabağ müharibəsi bitdikdən cəmi altı ay sonra - 2021-ci ilin mayından 2026-cı ilin aprelin 30-na qədər Avropa Parlamenti Azərbaycanla bağlı təhqir və yalanlarla dolu 14 qətnamə qəbul edib. Beş il ərzində 14 qətnamənin aludəçilik olduğunu qeyd edən cənab İlham Əliyev bildirdi ki, ən sonuncusu cəmi dörd gün əvvəl - bilərəkdən Zirvə görüşü ərəfəsində qəbul edildi. Avropa Parlamenti ksenofobiya, islamofobiya, anti-semitizm, miqrasiya, rəqabətçilik, evsiz insanların məsələsi kimi fundamental problemləri həll etmək əvəzinə, böhtan və yalan yayaraq Azərbaycanı hədəfə alır. Səbəb isə odur ki, Azərbaycan öz ərazi bütövlüyünü və suverenliyini bərpa edib, separatçılığa son qoyub və müharibə cinayətkarlarını ədalət mühakiməsinə cəlb edib: “Cavab olaraq Azərbaycan parlamenti mayın 1-də Avropa Parlamenti ilə bütün sahələrdə əməkdaşlığı dayandırmaq, Avropa İttifaqı-Azərbaycan Parlament Əməkdaşlığı Komitəsinin işində iştirakına son qoymaq və Avronest Parlament Assambleyasında üzvlüyün dayandırılmasına aid prosedurlara başlamaqla bağlı rəsmi qərar qəbul edib. Nəzərə alsaq ki, “Avropa Siyasi Birliyi”nin Zirvə görüşlərində biz öz fikirlərimizlə və narahatlıq doğuran məsələlərlə açıq şəkildə mübadilə edirik, mən, sadəcə, bu halda baş verənlər barədə həmkarlarımızı məlumatlandırmaq istədim ki, son qərarla bağlı səhv informasiya və manipulyasiya olmasın”.

Azərbaycan hər zaman bütün platformalardan dünyanın ikili standartlara əsaslanan siyasətinin yolverilməz olduğunu bildirib, bu gün də bildirir. Yeni dünya nizamının formalaşdığı hazırkı dövrdə belə yanaşmalara son qoyulmalıdır.

Anar Nəbiyev

YAP Qazax rayon təşkilatının sədri

Paylaş:

Baxılıb: 253 dəfə