Unikal idman modeli

Bakı:

29 °C

43 %

2 m/s

Əlaqə

AZ RU EN

Ana səhifə / YAP xəbərləri / Unikal idman modeli

Unikal idman modeli

04.05.2026 [16:30]

Azərbaycan güləşçilərinin Albaniyanın paytaxtı Tiranada keçirilən Avropa çempionatında qazandığı uğur ölkəmizdə idmanın inkişafını təsdiqləyən mühüm hadisələrdəndir. Dövlətimizin başçısı İlham Əliyev aprelin 30-da Albaniyanın paytaxtı Tiranada keçirilmiş Avropa çempionatında komanda hesabında Avropa çempionu olan yunan-Roma güləşi və sərbəst güləş, həmçinin qadın güləşi üzrə medal qazanmış idmançıları və onların məşqçilərini qəbul etdi. Görüşdə “Bu qələbə bizim hamımızı sevindirdi” söyləyən Prezident İlham Əliyev bildirdi ki, Azərbaycan güləşçiləri bir daha göstərdilər ki, onlar Avropada birincidirlər. Avropa çempionatında komanda hesabında birinci olmaq, əlbəttə ki, böyük nailiyyətdir.

Bu gün həm dünyada, həm Avropada güləş üzrə mübarizə daha gərgin keçir, bir çox ölkələrdən olan tanınmış güləşçilər böyük nəticələr göstərirlər və mübarizə də çox gərgin idi. İdmançılarımız öz peşəkarlığını göstərərək rəqibləri ədalətli mübarizədə məğlub etmişlər. Bu, əlbəttə, bütün xalqımızı sevindirir və bir daha göstərir ki, güləşimiz uğurla inkişaf edir: “Güləşimizin böyük ənənələri var və biz bu ənənələri yaşadırıq. Şadam ki, tanınmış güləşçilərlə bərabər gənc güləşçilərimiz də böyük nəticələr əldə edirlər. Bu onu göstərir ki, məşq prosesi, seleksiya prosesi düzgün qurulubdur. Bu münasibətlə federasiyanı təbrik edirəm, məşqçiləri təbrik edirəm və əlbəttə ki, ilk növbədə, idmançıları”.

Azərbaycan Bayrağının beynəlxalq yarışlarda ucaldılması hər bir azərbaycanlıya qürur hissi yaşadır. Beynəlxalq arenalarda qazanılan qələbələr milli həmrəyliyimizi daha da gücləndirir. Bu uğurlar Vətənə, dövlətə bağlı gənclərin formalaşması işinə də mühüm töhfələr verir. Cənab İlham Əliyev sözügedən görüşdə bu məqamı xüsusi önə çəkərək vurğuladı ki, bu qələbə sevincini idmançılarımız xalqımıza bəxş edir və bu da öz növbəsində gənc nəsli vətənpərvərlik ruhunda tərbiyə etmək üçün çox önəmli amildir. İdman, ümumiyyətlə, cəmiyyətimizin ayrılmaz hissəsidir və xüsusilə son illər ərzində idmanda gedən müsbət proseslər, əlbəttə ki, hamımızı sevindirir.

Dövlətimizin başçısı İlham Əliyev ölkəmizdə idmanın inkişafı istiqamətində atılan addımlardan geniş bəhs etdi. Reallıq budur ki, hazırda Azərbaycan beynəlxalq idman mərkəzlərindən birinə çevrilib. Ötən illərdə regionlarımızda idman infrastrukturunun qurulması, o cümlədən Olimpiya İdman komplekslərinin, idman zallarının, stadionların tikilməsi və bərpası ölkəmizin idman potensialını daha da gücləndirib. Bu infrastruktur gənc istedadların aşkar olunması və peşəkar səviyyədə hazırlanması üçün geniş imkanlar açır. Ümumiyyətlə, ölkəmizdə idmanın bütün növlərinin inkişafına xüsusi diqqət göstərilir, kütləviliyinin təmin edilməsi istiqamətində mühüm addımlar atılır. Cənab İlham Əliyev vurğuladı ki, ölkəmizdə keçirilən idman yarışları idman növlərini populyarlaşdırır. Bizim təcrübəmiz də böyükdür, çox böyük beynəlxalq yarışlar - Avropa Oyunlarını, İslam Həmrəyliyi Oyunlarını keçirmişik. Bunlar demək olar ki, Yay Olimpiya Oyunlarının səviyyəsinə çox yaxındır. Keçən il MDB Oyunlarını özü də paytaxtda yox, bölgələrdə keçirmişik. Yəni bu onu göstərir ki, çox güclü potensial var və idmana, idmançılara qayğı dövlət siyasətidir. İdmançılar da bunu görür və hiss edirlər.

Azərbaycan idmanı inkişaf dövrünü yaşayır. Bu mühüm hadisəni də xüsusi qeyd etmək istərdik ki, Avropa İdman Paytaxtları və Şəhərləri Federasiyası Bakı şəhərini 2026-cı il üçün dünyanın “İdman Paytaxtı” seçib. Azərbaycanda əhalinin sağlamlığının möhkəmləndirilməsi, yüksək standartlara uyğun mövcud idman infrastrukturu və idmanın təbliği üçün görülən nümunəvi fəaliyyət yüksək qiymətləndirilib. 2025-ci ilin idman yekunlarına həsr edilən mərasimdə dövlətimizin başçısı İlham Əliyev bu çağırışı etmişdir ki, Bakı şəhəri “Dünyanın İdman Paytaxtı” seçilmişdir və bu da çox böyük hadisədir, bizim üçün böyük şərəfdir. Eyni zamanda, Azərbaycanda idmanla bağlı görülən işlərə verilən qiymətdir. Bu əminlik ifadə edildi ki, bu şərəfli adı ləyaqətlə daşıyacağıq.

Etibar Hacıyev

YAP Ağstafa rayon təşkilatının sədri

Paylaş:

Baxılıb: 419 dəfə