Bakı və Praqa arasında strateji tərəfdaşlığın güclənməsi

Bakı:

18 °C

88 %

1 m/s

Əlaqə

AZ RU EN

Ana səhifə / YAP xəbərləri / Bakı və Praqa arasında strateji tərəfdaşlığın güclənməsi

Bakı və Praqa arasında strateji tərəfdaşlığın güclənməsi

01.05.2026 [11:29]

Azərbaycan ilə Çexiya arasında diplomatik münasibətlər 1993-cü ilin yanvar ayında qurulmuş və sonrakı illərdə mərhələli şəkildə inkişaf etmişdir. İki ölkə arasında əlaqələrin yeni mərhələyə qədəm qoyması isə 2015-ci ilin sentyabrında Bakıda imzalanmış Strateji Tərəfdaşlıq haqqında Birgə Bəyannamə ilə mümkün olmuşdur. Bu sənəd siyasi dialoqun genişlənməsi ilə yanaşı, iqtisadi, humanitar və digər sahələrdə əməkdaşlığın dərinləşdirilməsi üçün mühüm zəmin yaratmışdır.

Aprel ayında Çexiyanın Baş naziri Andrey Babiš Azərbaycana rəsmi səfər etmiş və bu səfər çərçivəsində yüksək səviyyəli görüşlər keçirilmişdir. Qəbələ şəhərində Azərbaycan Prezidenti İlham Əliyev ilə baş tutan həm təkbətək, həm də geniş tərkibli danışıqlar iki ölkə arasında münasibətlərin hazırkı vəziyyətini və gələcək inkişaf istiqamətlərini əhatə etmişdir. Görüşlər zamanı tərəflər siyasi dialoqun davamlı xarakter aldığını və qarşılıqlı maraq doğuran məsələlər üzrə əməkdaşlığın genişləndiyini xüsusi vurğulamışlar.

Liderlərin mətbuata verdikləri bəyanatlar göstərdi ki, Bakı və Praqa yalnız mövcud əlaqələri qorumaq deyil, həm də onları daha da genişləndirmək niyyətindədir. Xüsusilə iqtisadi və enerji sahələri əməkdaşlığın əsas istiqamətləri kimi ön plana çıxır. Bununla yanaşı, tərəflər iqtisadi münasibətlərin daha balanslı qurulmasına da önəm verirlər. Hazırda ticarət dövriyyəsində əsas pay enerji resurslarının payına düşsə də, qeyri-neft sektorunun inkişafı prioritet məsələlərdən biri kimi müəyyənləşdirilmişdir.

Qəbələdə təşkil olunan Azərbaycan-Çexiya biznes-forumu iqtisadi əlaqələrin möhkəmləndirilməsi baxımından mühüm rol oynadı. Forum çərçivəsində Azərbaycanın iqtisadi potensialı, nəqliyyat imkanları və enerji layihələri geniş şəkildə təqdim olundu. Dövlət başçısı çıxışında işgüzar dairələrə açıq mesaj verərək bildirdi ki, artıq konkret layihələrə investisiya yatırmaq və qarşılıqlı əməkdaşlıq imkanlarını reallaşdırmaq vaxtıdır. Bu cür yüksək səviyyəli siyasi əlaqələr biznes mühiti üçün də güclü stimul yaradır.

Məlumata görə, iki ölkə arasında ticarət dövriyyəsi artıq yüz milyonlarla dollar həddini keçmişdir və bu göstəricinin artırılması üçün yeni addımlar planlaşdırılır. Əsas məqsəd iqtisadi əməkdaşlığı şaxələndirmək, qarşılıqlı sərmayələri artırmaq və yeni sahələr üzrə birgə layihələri həyata keçirməkdir. Bu baxımdan sənaye, nəqliyyat, texnologiya və elmi tədqiqat istiqamətləri xüsusi əhəmiyyət daşıyır.

Enerji sahəsində əməkdaşlıq isə münasibətlərin əsas sütunlarından biri olaraq qalır. Azərbaycan Çexiya üçün mühüm enerji təchizatçılarından biridir və bu istiqamətdə uzunmüddətli əməkdaşlıq perspektivləri mövcuddur. Qlobal enerji bazarında baş verən dəyişikliklər fonunda bu tərəfdaşlıq daha da aktuallaşır və strateji əhəmiyyət kəsb edir.

Azərbaycan ilə Çexiya arasında münasibətlər yüksələn xətt üzrə inkişaf edir. Siyasi əlaqələrin sabitliyi, iqtisadi əməkdaşlığın genişlənməsi və enerji sahəsində möhkəm tərəfdaşlıq gələcək üçün etibarlı əsas yaradır. Hər iki ölkə qarşılıqlı maraqlara əsaslanan əməkdaşlığı daha da gücləndirməkdə maraqlıdır və bu istiqamətdə atılan addımlar münasibətlərin davamlı inkişafını təmin edir.

İsa Məmmədov

YAP Babək rayon təşkilatının sədri

Paylaş:

Baxılıb: 534 dəfə