Azərbaycan və Çexiya arasında əməkdaşlıq genişlənir

Bakı:

24 °C

52 %

3 m/s

Əlaqə

AZ RU EN

Ana səhifə / YAP xəbərləri / Azərbaycan və Çexiya arasında əməkdaşlıq genişlənir

Azərbaycan və Çexiya arasında əməkdaşlıq genişlənir

30.04.2026 [10:46]

Aprelin 27-də Qəbələdə Azərbaycan Respublikasının Prezidenti İlham Əliyev və Çex Respublikasının Baş naziri Andrey Babiş mətbuata bəyanatlarla çıxış ediblər.

Dövlətimizin başçısı öz bəyanatında vurğuladı ki, Azərbaycan ilə Çexiya arasında siyasi dialoq yüksək səviyyədədir və qarşılıqlı etimada əsaslanır. Prezident İlham Əliyev qeyd etdi ki, son illər ərzində qarşılıqlı səfərlərin intensivləşməsi münasibətlərin dinamik inkişafının göstəricisidir. Bu əlaqələr yalnız ikitərəfli çərçivə ilə məhdudlaşmır, eyni zamanda beynəlxalq təşkilatlar çərçivəsində də uğurla davam etdirilir.

Azərbaycanın beynəlxalq platformalarda fəal mövqeyi və Çexiya ilə qarşılıqlı dəstəyi iki ölkə arasında etibarlı tərəfdaşlıq mühitinin formalaşdığını göstərir. Ölkə başçısınin sözlərinə görə, bu əməkdaşlıq gələcəkdə daha da dərinləşəcək.

Prezident İlham Əliyevin bəyanatında xüsusi yer tutan məsələlərdən biri enerji sahəsində əməkdaşlıq oldu. Dövlət başçısı Azərbaycanın Avropanın enerji təhlükəsizliyində oynadığı rolu vurğulayaraq bildirdi ki, ölkə etibarlı enerji tərəfdaşı kimi çıxış edir.

Çexiyanın da enerji resurslarının şaxələndirilməsində maraqlı olması bu sahədə əməkdaşlıq üçün geniş imkanlar yaradır. Prezident İlham Əliyev qeyd etdi ki, enerji layihələri yalnız iqtisadi deyil, həm də geosiyasi baxımdan mühüm əhəmiyyət daşıyır və Avropa ilə Azərbaycan arasında strateji körpü rolunu oynayır.

Bəyanatda iqtisadi əməkdaşlığın genişləndirilməsi məsələsi də ön plana çəkildi. Prezident İlham Əliyev bildirdi ki, ticarət dövriyyəsinin artırılması üçün böyük potensial mövcuddur. Sənaye, investisiya, nəqliyyat və logistika sahələrində əməkdaşlığın inkişaf etdirilməsi əsas prioritetlər sırasındadır.

Qeyri-neft sektorunun inkişafı kontekstində Çexiya şirkətlərinin Azərbaycanda fəaliyyət imkanlarının genişləndirilməsi də diqqət mərkəzində olub. Bu isə iqtisadi münasibətlərin daha şaxəli və dayanıqlı olmasına zəmin yaradır.

Prezident İlham Əliyev öz çıxışında Azərbaycanın regionda mühüm nəqliyyat qovşağına çevrildiyini də vurğuladı. Ölkənin yerləşdiyi strateji coğrafi mövqe Avropa ilə Asiya arasında yükdaşımaların həyata keçirilməsində mühüm rol oynayır.

Bu baxımdan Azərbaycan–Çexiya əməkdaşlığı nəqliyyat-logistika sahəsində də yeni perspektivlər açır. Orta Dəhliz kimi beynəlxalq layihələr çərçivəsində əməkdaşlığın genişləndirilməsi hər iki tərəf üçün faydalıdır.

Keçirilən görüş və səsləndirilən mesajlar gələcək əməkdaşlığın istiqamətlərini müəyyənləşdirməklə yanaşı, Azərbaycan–Çexiya münasibətlərinin daha da inkişaf edəcəyinə dair güclü siqnal verdi.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 233 dəfə