Azərbaycan–Ukrayna Strateji Dialoqunun Dərinləşməsi

Bakı:

15 °C

94 %

0 m/s

Əlaqə

AZ RU EN

Ana səhifə / YAP xəbərləri / Azərbaycan–Ukrayna Strateji Dialoqunun Dərinləşməsi

Azərbaycan–Ukrayna Strateji Dialoqunun Dərinləşməsi

27.04.2026 [20:20]

Ukrayna Prezidenti Volodimir Zelenskinin Azərbaycana rəsmi səfəri iki ölkə arasında mövcud olan münasibətlərin keyfiyyətcə yeni mərhələyə qədəm qoyduğunu nümayiş etdirən mühüm siyasi hadisə kimi qiymətləndirilir. Bu səfər həm regional, həm də beynəlxalq kontekstdə diqqət çəkərək, Azərbaycan ilə Ukrayna arasında əməkdaşlığın çoxşaxəli istiqamətlər üzrə inkişaf perspektivlərini müəyyənləşdirir. Azərbaycan Prezidenti İlham Əliyevin səfər çərçivəsində etdiyi çıxışlar, bəyanat isə bu münasibətlərin strateji mahiyyətini və gələcək inkişaf xəttini aydın şəkildə ortaya qoyur, hərtərəfli əməkdaşlığa yeni üfüqlər açır.

Səfər zamanı keçirilən geniş tərkibli görüşlərdə Prezident İlham Əliyev vurğulamışdır ki, Azərbaycan ilə Ukrayna arasında əlaqələr tarixi dostluq, qarşılıqlı hörmət və beynəlxalq hüquq prinsiplərinə əsaslanır. Azərbaycan hər zaman Ukraynanın suverenliyini və ərazi bütövlüyünü dəstəkləmişdir və bu prinsipial mövqe ölkənin xarici siyasət kursunun mühüm tərkib hissəsidir.

Ölkə başçısı cənab İlham Əliyev çıxışlarında xüsusilə enerji təhlükəsizliyi məsələsinə geniş yer ayırmışdır. O vurğulamışdır ki, Azərbaycan Avropanın enerji təminatında mühüm rol oynayır və bu rol getdikcə daha da güclənir. Azərbaycanın təşəbbüsü ilə həyata keçirilən beynəlxalq enerji layihələri Ukrayna ilə əməkdaşlıq üçün yeni imkanlar yaradır.

Səfər çərçivəsində iki ölkə arasında bir sıra mühüm sənədlər imzalanmışdır. Bu sənədlər iqtisadiyyatın müxtəlif sahələrini əhatə edir və əməkdaşlığın institusional əsaslarını gücləndirir. İmzalanan razılaşmalar arasında ticarət dövriyyəsinin artırılması, qarşılıqlı investisiyaların təşviqi, kənd təsərrüfatı sahəsində əməkdaşlıq, sənaye və texnologiya transferi kimi istiqamətlər xüsusi yer tutur.

Hərbi və təhlükəsizlik sahəsində əməkdaşlıq da səfərin əsas istiqamətlərindən biri olmuşdur. Prezident İlham Əliyev bu sahədə qarşılıqlı təcrübə mübadiləsinin və birgə təşəbbüslərin əhəmiyyətini qeyd etmişdir.

Humanitar sahədə əməkdaşlıq məsələləri də səfər çərçivəsində geniş müzakirə olunmuşdur. Təhsil, elm, mədəniyyət və turizm sahələrində əlaqələrin genişləndirilməsi barədə razılaşmalar əldə edilmişdir. Nəticə olaraq qeyd etmək olar ki, Ukrayna Prezidenti Zelenskinin Azərbaycana səfəri iki ölkə arasında münasibətlərin inkişafında mühüm mərhələ təşkil edir. İmzalanan sənədlər və aparılan müzakirələr Azərbaycan və Ukrayna arasında gələcək əməkdaşlığın, ikitərəfli münasibətlərin yeni hərtərəfli inkişafına töhfə verəcəkdir.

Vəli Sərxanlı

YAP Culfa rayon təşkilatının fəalı

Paylaş:

Baxılıb: 541 dəfə