İkitərəfli münasibətlərdə yeni strateji mərhələ

Bakı:

14 °C

94 %

0 m/s

Əlaqə

AZ RU EN

Ana səhifə / YAP xəbərləri / İkitərəfli münasibətlərdə yeni strateji mərhələ

İkitərəfli münasibətlərdə yeni strateji mərhələ

08.04.2026 [15:02]

2026-cı il aprelin 6-da Azərbaycan Respublikasının Prezidenti İlham Əliyevin Gürcüstana həyata keçirdiyi dövlət səfəri ölkələrimiz arasındakı strateji tərəfdaşlıq münasibətlərində yeni bir mərhələnin başlanğıcını qoyub. Səfər çərçivəsində Gürcüstanın Baş naziri İrakli Kobaxidze ilə keçirilən geniş tərkibli görüşlərdən sonra mətbuata verilən bəyanatda dövlət başçısı ikitərəfli əməkdaşlığın perspektivləri, regional təhlükəsizlik və enerji-nəqliyyat layihələri haqqında strateji mesajlar verib.

Prezident İlham Əliyev öz çıxışına iki xalq arasındakı tarixi dostluq və qardaşlıq əlaqələrinin sarsılmazlığını vurğulamaqla başlayıb. O qeyd edib ki, Azərbaycan və Gürcüstanı bir-birinə bağlayan çoxsaylı tellər var və bu münasibətlər regional sabitliyin əsas dayağıdır. Dövlət başçısı Gürcüstanın dövlət müstəqilliyinə və ərazi bütövlüyünə Azərbaycanın həmişə dəstək verdiyini və bu mövqeyin dəyişməz olduğunu bir daha təsdiqləyib.

İqtisadi əməkdaşlıq mətbuata verilən bəyanatın mərkəzi mövzularından biri olub. Prezident İlham Əliyev ticarət dövriyyəsinin artım dinamikasını müsbət qiymətləndirərək, yaxın perspektivdə bu rəqəmin 1 milyard dollara çatdırılmasının strateji hədəf olduğunu bəyan edib. İxrac-idxal əməliyyatlarının genişləndirilməsi, birgə biznes forumlarının təşkili və investisiya layihələrinin sayının artırılması hər iki tərəfin maraqlarına uyğun olan prioritetlər kimi qeyd olunub.

Regional təhlükəsizlik kontekstində Prezident İlham Əliyev Cənubi Qafqazda sülh və sabitliyin bərqərar olunmasında Azərbaycanın qətiyyətli mövqeyini izah edib. O, Gürcüstanın Azərbaycan və Ermənistan arasında dialoq üçün yaratdığı şəraitin və vasitəçilik səylərinin böyük əhəmiyyət daşıdığını xüsusi vurğulayıb. Dövlət başçısı sülhə gedən yolun ticarət əlaqələrinin və iqtisadi layihələrin həyata keçirilməsindən keçdiyini qeyd edərək, regionun logistik imkanlarının hər iki tərəf üçün yeni üfüqlər açdığını bildirib.

Enerji və nəqliyyat sahəsindəki əməkdaşlıq bəyanatın digər əsas hissəsini təşkil edib. Prezident İlham Əliyev Azərbaycanın Avropanın enerji təhlükəsizliyində oynadığı rolu və bu prosesdə Gürcüstanın etibarlı tranzit tərəfdaş kimi çıxış etdiyini qeyd edib. Bakı-Tbilisi-Qars dəmir yolu xətti və Orta Dəhlizin (Transxəzər Beynəlxalq Nəqliyyat Marşrutu) genişləndirilməsi istiqamətində görülən işlər, eləcə də "Yaşıl Enerji" dəhlizinin reallaşdırılması dövlət başçısı tərəfindən Azərbaycan-Gürcüstan strateji müttəfiqliyinin ən uğurlu nümunələri kimi dəyərləndirilib.

Sonda Prezident İlham Əliyev bu səfərin iki ölkə arasında olan etimadı daha da möhkəmləndirdiyini, qarşıda duran vəzifələrin icrası üçün tərəflərin birgə səylərini davam etdirəcəklərini bəyan edib. O, Gürcüstan rəhbərliyinə və dost gürcü xalqına rifah və tərəqqi arzulayaraq, göstərilən qonaqpərvərliyə görə təşəkkürünü bildirib.

Bu səfər bir daha nümayiş etdirdi ki, Azərbaycan və Gürcüstan təkcə coğrafi baxımdan deyil, həm də siyasi və iqtisadi maraqlar baxımından bir-birinə çox yaxın olan iki strateji tərəfdaşdır. Prezident İlham Əliyevin bəyanatları regionun gələcək inkişaf modelinin məhz qarşılıqlı hörmət, faydalı əməkdaşlıq və sülh prinsipləri üzərində qurulduğunu bütün dünyaya bəyan etdi.

Əli Paşayev

YAP Tərtər rayon təşkilatının məsləhətçisi

Paylaş:

Baxılıb: 465 dəfə