Strateji əməkdaşlıq, regional təhlükəsizlik və iqtisadi inkişaf perspektivləri

Bakı:

26 °C

65 %

2 m/s

Əlaqə

AZ RU EN

Ana səhifə / YAP xəbərləri / Strateji əməkdaşlıq, regional təhlükəsizlik və iqtisadi inkişaf perspektivləri

Strateji əməkdaşlıq, regional təhlükəsizlik və iqtisadi inkişaf perspektivləri

08.04.2026 [11:33]

Meydanəli Yolçiyev

YAP Daşkəsən rayon təşkilatının sədri

Prezident İlham Əliyevin aprelin 6-da Gürcüstana səfəri çərçivəsində mətbuata verdiyi bəyanat iki qonşu dövlət arasında münasibətlərin yüksək səviyyədə olduğunu bir daha nümayiş etdirdi. Səfər zamanı səsləndirilən fikirlər göstərdi ki, tərəflər arasında formalaşmış əməkdaşlıq modeli regional sabitlik, iqtisadi inkişaf və enerji təhlükəsizliyi baxımından mühüm əhəmiyyət kəsb edir.

Dövlətimizin başçısının çıxışında vurğuladığı kimi, əsrlər boyu gürcü və Azərbaycan xalqları dostluq, qardaşlıq şəraitində yaşamışlar və bu gün bu ənənələr davam etdirilir. Müasir dövrdə bu münasibətlər qarşılıqlı hörmət və etimad üzərində inkişaf edərək strateji tərəfdaşlıq səviyyəsinə yüksəlib. Hər iki tərəf beynəlxalq təşkilatlar çərçivəsində bir-birinin suverenliyini və ərazi bütövlüyünü daim dəstəkləyir ki, bu da siyasi həmrəyliyin bariz göstəricisidir.

İkitərəfli münasibətlərin mühüm istiqamətlərindən biri iqtisadi əməkdaşlıqdır. Son illərdə ticarət dövriyyəsinin artması, qarşılıqlı sərmayə qoyuluşlarının genişlənməsi bu sahədə müsbət dinamikanı təsdiqləyir. Gürcüstanda formalaşmış əlverişli investisiya mühiti Azərbaycan investorlarının marağını artırır və artıq milyardlarla dollar həcmində sərmayə qoyuluşu həyata keçirilib. Tərəflər yalnız mövcud layihələrlə kifayətlənmir, eyni zamanda yeni investisiya təşəbbüsləri üzərində də işləyirlər. Gələcəkdə üçüncü ölkələrdə birgə layihələrin icrası perspektivi isə əməkdaşlığın genişlənəcəyindən xəbər verir.

Prezident İlham Əliyev vurğulayıb ki, bu gün Cənubi Qafqaz artıq sülh, əmin-amanlıq, təhlükəsizlik, əməkdaşlıq məkanına çevrilir. Bu yeni reallıq region dövlətləri arasında qarşılıqlı etimadın möhkəmlənməsinə və uzunmüddətli sabitliyin təmin olunmasına zəmin yaradır. Eyni zamanda, formalaşan mühit iqtisadi layihələrin genişlənməsinə, nəqliyyat və enerji təşəbbüslərinin daha sürətli icrasına imkan verir. Bütün bu faktorlar regionun beynəlxalq əhəmiyyətini artırmaqla yanaşı, qlobal əməkdaşlıq platformalarından birinə çevirir.

Energetika sahəsi iki dövlət arasında əməkdaşlığın əsas istiqamətlərindən biri olaraq qalır. Azərbaycan qazının Avropa və digər bazarlara çıxarılmasında Gürcüstanın rolu əvəzsizdir. Xüsusilə Bakı-Tbilisi-Ceyhan neft kəməri və Cənub Qaz Dəhlizi kimi nəhəng layihələr regionun enerji xəritəsini dəyişdirən əsas amillər sırasındadır. Bu layihələr təkcə enerji ixracı ilə məhdudlaşmır, həm də geniş coğrafiyada enerji təhlükəsizliyinin təmin olunmasına xidmət edir. Eyni zamanda, Xəzər hövzəsindən çıxarılan resursların dünya bazarlarına çatdırılması baxımından Gürcüstan tranzit ölkə kimi strateji əhəmiyyətə malikdir.

Enerji layihələri ilə yanaşı, nəqliyyat infrastrukturunun inkişafı da diqqət mərkəzindədir. Orta Dəhliz layihəsi Azərbaycan və Gürcüstandan keçərək Avropa ilə Asiyanı birləşdirən əsas marşrutlardan birinə çevrilib. Bu dəhliz regionun logistika imkanlarını artırmaqla yanaşı, iqtisadi inteqrasiyanı da sürətləndirir. Hazırda dəhlizin genişləndirilməsi və yükdaşıma qabiliyyətinin artırılması istiqamətində mühüm addımlar atılır. Bu isə regionun qlobal ticarət sistemində rolunun daha da güclənməsinə şərait yaradır.

Beləliklə, Azərbaycan-Gürcüstan münasibətləri yalnız qonşuluq çərçivəsində deyil, strateji tərəfdaşlıq səviyyəsində inkişaf edir. Qarşılıqlı etimad, ortaq maraqlar və uzunmüddətli əməkdaşlıq bu münasibətlərin əsasını təşkil edir. Bu model regionda digər dövlətlər üçün də nümunədir. Çünki burada əməkdaşlıq, qarşılıqlı fayda prinsipi üstünlük təşkil edir. Mövcud dinamika göstərir ki, tərəflər gələcəkdə də birgə səylərlə yeni layihələr həyata keçirəcək və regionda sabitlik, təhlükəsizlik və rifahın möhkəmlənməsinə töhfə verəcəklər.

Paylaş:

Baxılıb: 709 dəfə