Qlobal çağırışlar fonunda Azərbaycanın mövqeyi

Bakı:

16 °C

88 %

6 m/s

Əlaqə

AZ RU EN

Ana səhifə / YAP xəbərləri / Qlobal çağırışlar fonunda Azərbaycanın mövqeyi

Qlobal çağırışlar fonunda Azərbaycanın mövqeyi

16.03.2026 [13:57]

Müasir dünya mürəkkəb geosiyasi dəyişikliklər mərhələsindən keçir. Münaqişələr, siyasi qarşıdurmalar və beynəlxalq münasibətlər sistemində yaranan yeni gərginliklər qlobal təhlükəsizlik arxitekturasını ciddi sınaq qarşısında qoyur. Belə bir dövrdə İlham Əliyevin Bakıda keçirilən XIII Qlobal Bakı Forumu çərçivəsində “Keçid dövründə olan dünyada fikir ayrılıqlarının aradan qaldırılması” mövzusunda çıxışı həm regional, həm də qlobal miqyasda mühüm siyasi mesajlarla yadda qaldı.

Nizami Gəncəvi Beynəlxalq Mərkəzi tərəfindən təşkil olunan bu mötəbər forum artıq dünyanın aparıcı siyasətçilərini, diplomatlarını və ekspertlərini bir araya gətirən nüfuzlu beynəlxalq platformaya çevrilib. Prezident İlham Əliyevin çıxışı isə Azərbaycanın müasir beynəlxalq münasibətlər sistemində formalaşdırdığı strateji baxışın aydın ifadəsi oldu.

Prezident İlham Əliyev çıxışında bir daha diqqətə çatdırdı ki, Azərbaycan uzun illər ərzində işğal olunmuş ərazilərinin azad edilməsi məsələsində diplomatik yolları üstün tutub. Lakin beynəlxalq vasitəçilik mexanizmlərinin nəticəsiz qalması və bəzi dairələrin qeyri-obyektiv mövqeyi münaqişənin həllini uzadan əsas amillərdən biri oldu. Belə bir şəraitdə Azərbaycan xalqı və dövləti öz hüquqlarını təmin etmək üçün qətiyyətli mövqe nümayiş etdirdi. Dövlət başçısının vurğuladığı kimi, Azərbaycan işğal altındakı torpaqlarını hərbi-siyasi gücü hesabına azad etdi, lakin bununla yanaşı regionda sülhün bərqərar olması üçün siyasi dialoqa üstünlük verdi. Bu, Azərbaycanın yalnız güclü dövlət deyil, eyni zamanda məsuliyyətli regional aktor olduğunu nümayiş etdirən mühüm yanaşmadır.

Prezident İlham Əliyevin çıxışında xüsusi vurğulanan məqamlardan biri də Azərbaycanın müharibədən sonra sülh təşəbbüsləri ilə çıxış etməsi idi. Azərbaycan regionda uzunmüddətli sabitliyin təmin olunması üçün sülh sazişinin imzalanmasını vacib hesab edir və bu istiqamətdə ardıcıl diplomatik fəaliyyət aparır. Azərbaycanın mövqeyi sadə və aydındır: regionda davamlı sülh yalnız qarşılıqlı hörmət, suverenliyin tanınması və beynəlxalq hüququn norma və prinsiplərinə əməl olunması ilə mümkündür. Bu yanaşma həm də Azərbaycanın regional əməkdaşlıq modelinə verdiyi önəmi göstərir.

Dövlət başçısı forumdakı çıxışında beynəlxalq vasitəçilik mexanizmlərinin səmərəsizliyinə də toxunaraq açıq şəkildə bildirdi ki, uzun illər davam edən danışıqlar prosesində bəzi vasitəçilər problemi həll etməkdən daha çox onu dondurulmuş vəziyyətdə saxlamağa çalışırdı. Məhz buna görə Azərbaycan “qırnaqarası vasitəçilik” modelindən imtina edərək ikitərəfli dialoq formatına üstünlük verdi. Bu yanaşma tərəflərin birbaşa təmaslar qurmasına və real nəticələr əldə etməsinə imkan yaratdı. Prezidentin vurğuladığı kimi, üçüncü tərəflərin təsirindən kənar, birbaşa aparılan danışıqlar sülh prosesinin irəliləməsi üçün daha effektiv platforma oldu.

XIII Qlobal Bakı Forumunda səslənən fikirlər Azərbaycanın beynəlxalq münasibətlər sistemində artan rolunun göstəricisidir. Azərbaycan bu gün yalnız regionun enerji və nəqliyyat mərkəzi deyil, həm də dialoq və əməkdaşlıq üçün mühüm platforma rolunu oynayır. Prezident İlham Əliyevin çıxışı dünya ictimaiyyətinə mühüm bir mesaj verdi: münaqişələrin həlli üçün siyasi iradə, ədalət və real dialoq əsas şərtdir.

XIII Qlobal Bakı Forumunda Prezident İlham Əliyevin çıxışı Azərbaycanın müasir dünya siyasətində tutduğu mövqenin aydın ifadəsi kimi qiymətləndirilə bilər. Azərbaycanın təcrübəsi göstərir ki, dövlətlərin gücü yalnız hərbi və iqtisadi potensialla ölçülmür. Əsas güc milli iradə, prinsipial mövqe və ədalətli siyasət yürütmək bacarığıdır. Məhz bu yanaşma sayəsində Azərbaycan bu gün həm regionda, həm də qlobal miqyasda sülh və əməkdaşlıq ideyalarının fəal təşviqçisi kimi çıxış edir.

Sevinc Xəlilova

YAP Samux rayon təşkilatının sədr müavini

Paylaş:

Baxılıb: 309 dəfə