Azərbaycan və Avropa Şurası: əməkdaşlıqdan yeni siyasi mərhələyə

Bakı:

30 °C

42 %

5 m/s

Əlaqə

AZ RU EN

Ana səhifə / YAP xəbərləri / Azərbaycan və Avropa Şurası: əməkdaşlıqdan yeni siyasi mərhələyə

Azərbaycan və Avropa Şurası: əməkdaşlıqdan yeni siyasi mərhələyə

16.03.2026 [14:44]

2001-ci ildə Azərbaycanın Avropanın ən nüfuzlu siyasi-hüquqi təşkilatlarından biri olan Avropa Şurasına üzv olması ölkənin Avropa məkanına inteqrasiyasının mühüm mərhələsi kimi qiymətləndirildi. Bu üzvlük Azərbaycan üçün həm beynəlxalq nüfuzun artması, həm də demokratik institutların inkişafı baxımından yeni imkanlar açdı.

Avropa Şurasına qoşulduqdan sonra Azərbaycan insan hüquqları, hüququn aliliyi və demokratik idarəçilik sahəsində bir sıra beynəlxalq öhdəliklər götürdü. Ölkə bir çox konvensiyalara qoşuldu və vətəndaşlara Avropa İnsan Hüquqları Məhkəməsinə müraciət etmək hüququ verildi. Bu isə Azərbaycan vətəndaşları üçün beynəlxalq hüquqi müdafiə mexanizmlərindən istifadə imkanları yaratdı. Həmin dövrdə rəsmi Bakı Avropa strukturları ilə əməkdaşlığı ölkənin siyasi və hüquqi sisteminin modernləşdirilməsi baxımından vacib hesab edirdi.

Son illərdə regionda baş verən siyasi və hərbi proseslər bu münasibətlərə də təsir göstərib. Xüsusilə Qarabağ münaqişəsinin yeni mərhələyə keçməsi və regionda yaranan geosiyasi dəyişikliklər Avropa institutlarının mövqeyi ilə bağlı müzakirələri daha da gücləndirib. Azərbaycan rəsmiləri hesab edirlər ki, beynəlxalq təşkilatlar regiondakı prosesləri qiymətləndirərkən daha balanslı və obyektiv yanaşma nümayiş etdirməlidirlər.

Azərbaycan Respublikasının Prezidenti İlham Əliyev ilə Avropa Şurasının rəhbərliyi arasında keçirilən görüş də tərəflər arasında dialoqun davam etdiyini göstərən mühüm hadisələrdən biri kimi qiymətləndirilir. Görüş zamanı Azərbaycan ilə Avropa Şurası arasında mövcud münasibətlər, insan hüquqları və hüquqi əməkdaşlıq sahəsində perspektivlər müzakirə olunub. Prezident İlham Əliyev Azərbaycanın beynəlxalq təşkilatlarla konstruktiv dialoqa hazır olduğunu vurğulayaraq qarşılıqlı hörmət prinsiplərinin vacibliyini qeyd edib. Avropa Şurası tərəfi isə təşkilat ilə Azərbaycan arasında əməkdaşlığın davam etdirilməsinin əhəmiyyətini bildirib.

Görüşdə həmçinin regionda baş verən siyasi proseslər, Cənubi Qafqazda sabitliyin möhkəmləndirilməsi və gələcək əməkdaşlıq imkanları barədə fikir mübadiləsi aparılıb. Tərəflər dialoqun davam etdirilməsinin qarşılıqlı anlaşma və əməkdaşlıq üçün vacib olduğunu qeyd ediblər. Ekspertlərin fikrincə, bu görüş tərəflər arasında mövcud fikir ayrılıqlarına baxmayaraq, əlaqələrin tam dayanmadığını və diplomatik kanalların açıq qaldığını göstərir.

Azərbaycan–Avropa Şurası münasibətləri mürəkkəb və çoxşaxəli xarakter daşıyır. Bu əlaqələr təkcə diplomatik münasibətlərlə məhdudlaşmır, həm də ölkənin Avropa siyasi və hüquqi məkanı ilə münasibətlərinin mühüm göstəricisidir. Qarşıdakı illərdə bu münasibətlərin hansı istiqamətdə inkişaf edəcəyi isə həm regional siyasi proseslərdən, həm də tərəflərin qarşılıqlı əməkdaşlıq iradəsindən asılı olacaq.

Vüqar Həsənli
YAP Şahbuz rayon təşkilatının məsləhətçisi

Paylaş:

Baxılıb: 565 dəfə