Azərbaycan Avropa Parlamentinin qərəzli tənqidlərinə artıq reaksiya vermir: Cənab Prezident İlham Əliyevin Davos mesajları

Bakı:

20 °C

52 %

6 m/s

AZ RU EN

Ana səhifə / YAP xəbərləri / Azərbaycan Avropa Parlamentinin qərəzli tənqidlərinə artıq reaksiya vermir: Cənab Prezident İlham Əliyevin Davos mesajları

Azərbaycan Avropa Parlamentinin qərəzli tənqidlərinə artıq reaksiya vermir: Cənab Prezident İlham Əliyevin Davos mesajları

22.01.2026 [19:23]

Cənab Prezident İlham Əliyev 20 yanvar 2026-cı ildə Davosda “Euronews” televiziya kanalına verdiyi müsahibədə Azərbaycanın Avropa Parlamentinin ünvanına səsləndirdiyi daimi və sistemli tənqidlərə münasibətini aydın şəkildə ifadə etmişdir. Cənab Prezident vurğulamışdır ki, Azərbaycan dövləti artıq Avropa Parlamentinin qəbul etdiyi qərəzli və reallıqdan uzaq qətnamələrə və bəyanatlara reaksiya vermir. Dövlət başçısının fikrincə, bu tənqidlər konstruktiv dialoq və əməkdaşlıq məqsədi daşımır, əksinə, müəyyən siyasi dairələrin və lobbi qruplarının sifarişi əsasında formalaşdırılır.

Cənab Prezident İlham Əliyev qeyd etmişdir ki, əvvəllər Azərbaycan bu cür ittihamlara cavab verməyə, öz mövqeyini izah etməyə çalışırdı. Lakin zaman keçdikcə aydın oldu ki, Avropa Parlamentində Azərbaycana qarşı formalaşmış yanaşma obyektivlikdən uzaqdır və dəyişməz xarakter daşıyır. Məhz bu səbəbdən Azərbaycan artıq enerji və resurslarını nəticəsiz polemikalara sərf etmir və bu qurumun mövqeyini ciddi siyasi amil kimi qiymətləndirmir.

Cənab Prezident xüsusi olaraq vurğulamışdır ki, Avropa Parlamentinin bəzi üzvləri Azərbaycanın suverenliyini, ərazi bütövlüyünü və müstəqil xarici siyasət yürütmək hüququnu qəbul edə bilmirlər. Onların tənqidlərinin kökündə Azərbaycanın milli maraqlara əsaslanan müstəqil siyasəti dayanır. Dövlət başçısının sözlərinə görə, bu cür yanaşma nə ədalətlidir, nə də Avropanın iddia etdiyi dəyərlərlə uzlaşır.

Prezident İlham Əliyev müsahibədə onu da bildirmişdir ki, Azərbaycan Avropa ilə münasibətlərini tamamilə dayandırmayıb, sadəcə olaraq etibarsız və qərəzli platformalarla əməkdaşlığı məhdudlaşdırıb. Azərbaycan Avropa İttifaqının icraedici strukturları, xüsusilə Avropa Komissiyası ilə qarşılıqlı hörmətə əsaslanan praktiki əməkdaşlığı davam etdirir və bu əməkdaşlıq konkret nəticələr verdiyi üçün kifayət hesab olunur. Bu, Azərbaycanın praqmatik və nəticəyönümlü xarici siyasət xəttinin göstəricisidir.

Dövlət başçısı həmçinin qeyd etmişdir ki, Avropa Parlamentinin Azərbaycana dair irəli sürdüyü ittihamlar, xüsusilə Ermənistan-Azərbaycan münasibətləri ilə bağlı mövqeyi tamamilə ziddiyyətlidir. Çünki Ermənistanın rəsmi dairələri Azərbaycanla normallaşma prosesini və mövcud reallıqları qəbul etdiyi halda, Avropa Parlamentinin fərqli və təxribatçı mövqe nümayiş etdirməsi siyasi məsuliyyətsizlikdir.

Prezident İlham Əliyev vurğulamışdır ki, Azərbaycan güclü dövlətdir, öz daxili və xarici siyasətini müstəqil şəkildə müəyyən edir və heç bir beynəlxalq qurumun qərəzli yanaşması bu kursa təsir göstərə bilməz. Azərbaycanın prioriteti milli maraqlar, regional sabitlik və beynəlxalq hüquqa əsaslanan münasibətlərdir. Bu baxımdan, Avropa Parlamentinin əsassız tənqidlərinə reaksiya verməmək Azərbaycanın şüurlu və strateji seçimidir.

Nəticə etibarilə, Davosda “Euronews”a verilən müsahibədə cənab Prezident açıq şəkildə bəyan etmişdir ki, Azərbaycan emosional reaksiyalar dövrünü geridə qoymuş, siyasi yetkinlik və dövlətçilik mövqeyindən çıxış edərək qərəzli tənqidlərə deyil, real tərəfdaşlığa və qarşılıqlı faydaya əsaslanan əməkdaşlığa üstünlük verir.

Rəhman Ağabalayev

YAP Qusar rayon təşkilatının fəal üzvü

Paylaş:

Baxılıb: 305 dəfə