Zamanın səsi, dövlətin mövqeyi

Bakı:

19 °C

50 %

2 m/s

Əlaqə

AZ RU EN

Ana səhifə / YAP xəbərləri / Zamanın səsi, dövlətin mövqeyi

Zamanın səsi, dövlətin mövqeyi

07.01.2026 [14:15]

Yeni ilin ilk günlərində dövlət başçısının xalqla birbaşa ünsiyyəti artıq Azərbaycanda formalaşmış mühüm siyasi ənənəyə çevrilib.

05 yanvar 2026-cı il tarixində Prezident İlham Əliyevin yerli televiziya kanallarına verdiyi müsahibə də məhz bu ənənənin davamı olmaqla yanaşı, ölkənin keçdiyi yolun, qazandığı təcrübənin və qarşıda duran strateji hədəflərin dolğun siyasi-fəlsəfi təqdimatı kimi yadda qaldı. Bu müsahibə təkcə ötən ilin xronikası deyil, həm də gələcəyin konturlarını cızan dövlət mövqeyi, milli iradənin ifadəsi, zamanın çağırışlarına verilən qətiyyətli cavab idi.

Prezident İlham Əliyev müsahibəsində 2025-ci ilin nəticələrinə toxunaraq vurğuladı ki, Azərbaycan artıq postmünaqişə dövrünün yeni mərhələsindədir. Ölkə yalnız hərbi və siyasi qələbənin deyil, həm də strateji məsuliyyətin daşıyıcısına çevrilib. Dövlət başçısının fikirlərində bir əsas xətt açıq şəkildə sezilirdi: qazanılan uğurların qorunması və möhkəmləndirilməsi. Bu yanaşma Cənab Prezidentin siyasi fəlsəfəsinin mahiyyətini əks etdirir - Azərbaycan üçün qələbə son deyil, başlanğıcdır. Dövlətin gücü təkcə nəticələrdə yox, həmin nəticələri uzunmüddətli sabitliyə çevirmək bacarığındadır.

Müsahibədə sülh mövzusu xüsusi yer tuturdu. Prezident İlham Əliyev aydın şəkildə bəyan etdi ki, Azərbaycan sülh tərəfdarıdır, lakin bu sülh ədalətli, real və milli maraqlara əsaslanan sülh olmalıdır. Onun fikirlərində romantik illüziyalar yox, sərt beynəlxalq reallıqların düzgün oxunuşu vardı. Dövlət başçısı bir daha göstərdi ki, Azərbaycan öz taleyini kənar mərkəzlərə həvalə edən ölkə deyil. Burada sülh də, təhlükəsizlik də, inkişaf da Azərbaycanın öz siyasi iradəsinin məhsuludur.

Prezident İlham Əliyevin müsahibəsində xarici siyasətə dair səsləndirdiyi fikirlər Azərbaycan diplomatiyasının əsas fəlsəfəsini bir daha ortaya qoydu. Balanslaşdırılmış siyasət, qarşılıqlı hörmət və bərabərhüquqlu əməkdaşlıq - bu üç sütun Azərbaycanın beynəlxalq mövqeyinin əsasını təşkil edir.Dövlət başçısı açıq şəkildə mesaj verdi: Azərbaycan heç bir blokun aləti deyil, regional və qlobal proseslərdə müstəqil aktordur. Bu mövqe ölkənin artan nüfuzunun, sözünün çəkisinin əsas səbəbidir.

Müsahibədə Prezidentin iqtisadi məsələlərə yanaşması xüsusi diqqət çəkirdi. Qeyri-neft sektorunun inkişafı, enerji təhlükəsizliyi, alternativ və “yaşıl enerji” strategiyası Azərbaycanın gələcək onilliklər üçün seçdiyi yolun əsas göstəriciləridir.

Prezident İlham Əliyev müsahibəsində kadr siyasəti, dövlət idarəçiliyində məsuliyyət və intizam məsələlərinə də toxundu. Bu fikirlər cəmiyyətə açıq mesaj idi: dövlət qulluqçusu status deyil, xidmətdir. Səmərəsizlik, məsuliyyətsizlik və laqeydlik heç bir halda qəbul edilə bilməz.Bu yanaşma Prezidentin idarəçilik üslubunun əsas cizgisini göstərir - tələbkarlıq və ədalət.

Müsahibənin ən mühüm cəhətlərindən biri Prezidentlə xalq arasında mövcud olan etimad mühitinin aydın hiss olunması idi. Dövlət başçısının suallara açıq, qətiyyətli və inamlı cavabları göstərdi ki, bu liderlə xalq arasında sözlə yox, əməli nəticələrlə qurulmuş münasibətdir.

Prezident İlham Əliyevin 05 yanvar 2026-cı il tarixli müsahibəsi Azərbaycan dövlətçiliyinin bu gününü və sabahını birləşdirən siyasi manifest kimi dəyərləndirilə bilər. Bu müsahibədə emosional şüarlar yox, dərin düşüncə; təsadüfi vədlər yox, strateji baxış vardı.Bu, gücün nümayişi deyil, məsuliyyətli gücün bəyanatı idi. Azərbaycan artıq təkcə regionun yox, bütövlükdə beynəlxalq siyasi müstəvinin diqqətlə dinlədiyi, mövqeyini nəzərə aldığı bir dövlətdir.

Bu reallığın arxasında isə Prezident İlham Əliyevin ardıcıl, prinsipial və milli maraqlara söykənən siyasəti dayanır.

Gündüz Alıkişiyev

YAP Tərtər rayon təşkilatının məsləhətçisi

Paylaş:

Baxılıb: 485 dəfə