Azərbaycan elminin inkişafına strateji baxış

Bakı:

25 °C

73 %

6 m/s

Əlaqə

AZ RU EN

Ana səhifə / YAP xəbərləri / Azərbaycan elminin inkişafına strateji baxış

Azərbaycan elminin inkişafına strateji baxış

05.11.2025 [16:51]

İlqar İlyasov

YAP Laçın rayon təşkilatının sədri

XI əsrdə dahi Azərbaycan şairi Nizami Gəncəvi deyirdi: “Bir elmi öyrənmək istədikdə sən, Çalış ki, hər şeyi kamil biləsən”. Bu baxımdan 2025-ci il noyabrın 3-də Azərbaycan Milli Elmlər Akademiyasının (AMEA) 80 illik yubileyi münasibətilə keçirilən təntənəli mərasimdə Prezident İlham Əliyevin çıxışı ölkənin elm siyasəti baxımından mühüm hadisə kimi qiymətləndirilməklə yanaşı bir çox aktual məsələlərə işıq saldı. Dövlət başçısının nitqi həm keçmişə ümumi baxış, həm də gələcək üçün elmin prioritet istiqamətlərinin müəyyənləşdirilməsi baxımından xüsusi əhəmiyyət daşıyır. Prezident İlham Əliyev çıxışında vurğulayıb ki, AMEA 80 il ərzində Azərbaycan elminin mərkəzi dayağı kimi formalaşıb, elmi ənənələrin qorunmasında və intellektual potensialın inkişafında mühüm rol oynayıb. Akademiyanın fəaliyyətində müxtəlif mərhələlərdən keçdiyini xatırladan dövlət başçısı qeyd edib ki, elmin inkişafına hər zaman dövlət səviyyəsində diqqət göstərilib. Ulu Öndər Heydər Əliyevin dövründə elmi müəssisələrin gücləndirilməsi, yeni tədqiqat institutlarının yaradılması və alimlərin sosial rifahının yaxşılaşdırılması istiqamətində atılan addımlar bu sahənin inkişafında dönüş nöqtəsi olub. İlham Əliyev bildirib ki, müasir dövrdə elmin inkişafı ölkənin iqtisadi, sosial və texnoloji tərəqqisi ilə birbaşa bağlıdır. “Təbii sərvətlər tükənə bilər, amma intellektual potensial tükənməz sərvətdir” – deyən Prezident, bilik və elmin Azərbaycanın gələcək uğurlarında əsas resursa çevrildiyini vurğulayıb. Dövlət başçısı qeyd edib ki, elmi nəticələr yalnız nəzəri araşdırmalarla məhdudlaşmamalı, real həyatın müxtəlif sahələrində tətbiq olunmalıdır. Prezidentin çıxışında xüsusi olaraq elmin innovasiya və texnologiyalarla inteqrasiyası, tətbiqi elmin və startap fəaliyyətinin dəstəklənməsi, elmi nəticələrin iqtisadiyyata gətirilməsi kimi istiqamətlər ön plana çəkilib. Bununla yanaşı, Azərbaycan elminin beynəlxalq aləmdə tanıdılması, xarici elmi mərkəzlərlə əməkdaşlığın genişləndirilməsi və gənc alimlərin beynəlxalq layihələrdə fəal iştirakı vacib vəzifə kimi göstərilib. İlham Əliyev həmçinin milli-mənəvi dəyərlər və dil məsələlərinə də toxunaraq bildirib ki, Azərbaycan elmi milli kimliyimizin ayrılmaz hissəsidir. O, Azərbaycan dilində elmi tədqiqatların aparılmasının, tarix, ədəbiyyat və mədəniyyət sahələrinin elmi əsaslarla öyrənilməsinin vacibliyini vurğulayıb. Prezidentin fikrincə, bu, həm milli kimliyin qorunması, həm də gələcək nəsillərin milli dəyərlərə bağlı şəkildə yetişməsi üçün mühüm amildir. Gənclərin elmə cəlb edilməsi məsələsi də çıxışın diqqət mərkəzində olub. Dövlət başçısı qeyd edib ki, Azərbaycan gənclərinin elmi sahədə fəallığının artırılması, onların xaricdə təhsil alıb vətənə dönərək burada fəaliyyət göstərməsi mühüm prioritetlərdəndir. Prezident vurğulayıb ki, dövlət bu istiqamətdə müxtəlif proqramlar həyata keçirir, gənc alimlərin inkişafı və elmi fəaliyyətə dəstəyi davam etdirəcək. Eyni zamanda, elmi müəssisələrin maddi-texniki bazasının yenilənməsi, müasir laboratoriyaların və tədqiqat mərkəzlərinin yaradılması, alimlərin iş şəraitinin yaxşılaşdırılması məsələlərinə də xüsusi diqqət yetirilib. İlham Əliyev bildirib ki, bu sahələrdə islahatlar davam etdiriləcək və AMEA-nın potensialı daha da gücləndiriləcək. AMEA-nın 80 illik yubileyi yalnız keçmişin qeyd olunması deyil, həm də yeni mərhələnin başlanğıcıdır. Bu mərhələdə Azərbaycan elmi həm beynəlxalq arenada rəqabətqabiliyyətli olmalı, həm də milli maraqlara xidmət edən strateji sahə kimi inkişaf etməlidir. Azərbaycan dövləti elmin inkişafını milli gücün əsas dayaqlarından biri hesab edir. Elmin dövlət siyasətində prioritet yer tutması, innovasiyaların təşviqi, gənc alimlərin dəstəklənməsi və milli dəyərlərin elmi müstəvidə qorunması ölkəmizin gələcək inkişafına yönəlmiş strateji yanaşmanın təzahürüdür.

Paylaş:

Baxılıb: 692 dəfə