Türk Dövlətləri Təşkilatı beynəlxalq münasibətlərdə sülh, sabitlik və həmrəyliyi təcəssüm etdirir

Bakı:

11 °C

71 %

8 m/s

AZ RU EN

Ana səhifə / YAP xəbərləri / Türk Dövlətləri Təşkilatı beynəlxalq münasibətlərdə sülh, sabitlik və həmrəyliyi təcəssüm etdirir

Türk Dövlətləri Təşkilatı beynəlxalq münasibətlərdə sülh, sabitlik və həmrəyliyi təcəssüm etdirir

09.10.2025 [15:57]

Oktyabrın 7-də Azərbaycan Respublikasının Qəbələ şəhərində Türk Dövlətləri Təşkilatının (TDT) Dövlət Başçıları Şurasının XII Zirvə Görüşü keçirilib. Tədbirdə Türk dünyasında əməkdaşlığın yeni mərhələsi, siyasi, iqtisadi və humanitar sahələrdə inteqrasiyanın dərinləşdirilməsi, regional və beynəlxalq gündəmdə olan məsələlər geniş müzakirə olunub.

Dövlətimizin başçısı çıxışında qeyd edib ki, Türk Dövlətləri Təşkilatı bu gün regionda və beynəlxalq miqyasda əhəmiyyətli siyasi və iqtisadi mərkəzə çevrilib. Dövlət başçısı vurğulayıb ki, təşkilatın məqsədi yalnız ortaq tarixi və mədəni dəyərləri qorumaq deyil, həm də bu birliyi gələcək nəsillər üçün sabitlik, təhlükəsizlik və inkişaf mənbəyinə çevirməkdir.

Prezident İlham Əliyev bildirib ki, Azərbaycan hər zaman Türk Dövlətləri Təşkilatının güclənməsi, üzv ölkələr arasında qarşılıqlı etimadın və əməkdaşlığın möhkəmləndirilməsi istiqamətində səylərini davam etdirəcək: “Türk Dövlətləri Təşkilatı bu gün qardaş xalqların həmrəyliyinin, qarşılıqlı hörmət və etimadın nümunəsinə çevrilib. Azərbaycan bundan sonra da təşkilatın çərçivəsində birliyin və əməkdaşlığın dərinləşməsinə öz töhfəsini verəcək”.

Çıxışında Prezident İlham Əliyev Türk Dövlətləri Təşkilatının gələcək fəaliyyəti üçün bir sıra prioritet istiqamətləri diqqətə çatdırıb. Bunlara enerji təhlükəsizliyi, nəqliyyat-kommunikasiya infrastrukturlarının birləşdirilməsi, ticarət əlaqələrinin genişləndirilməsi və elmi-texnoloji sahədə əməkdaşlığın inkişafı daxildir.

Azərbaycan Prezidenti həmçinin qeyd edib ki, Orta Dəhliz layihəsinin inkişafı üzv dövlətlər arasında iqtisadi inteqrasiyanın möhkəmlənməsinə, regionun logistika mərkəzinə çevrilməsinə xidmət edəcək: “Biz Türk dünyasının birliyi ideyasını praktik müstəviyə keçiririk. Əməkdaşlığımız enerji, nəqliyyat, humanitar və müdafiə sahələrini əhatə edən geniş strateji çərçivəyə çevrilir”.

Qəbələ Zirvə Görüşü çərçivəsində Türk Dövlətləri Təşkilatının fəaliyyətinə dair bir sıra sənədlər imzalanıb. Həmçinin TDT-nin növbəti mərhələdə institusional inkişafı, regional və beynəlxalq əməkdaşlıq mexanizmlərinin gücləndirilməsi barədə razılıqlar əldə olunub.

Təşkilata üzv dövlətlər Azərbaycan Respublikasının sülh təşəbbüslərini və regionda sabitliyin bərqərar olunması istiqamətində atdığı addımları yüksək qiymətləndiriblər. Zirvə iştirakçıları bir daha qeyd ediblər ki, Türk dövlətlərinin birliyi regional sabitliyin və iqtisadi tərəqqinin mühüm təminatçısıdır.

Beləliklə, Qəbələdə keçirilən Türk Dövlətləri Təşkilatının XII Zirvə Görüşü Türk dünyasının siyasi, iqtisadi və mədəni həmrəyliyinin güclənməsi baxımından mühüm hadisə kimi tarixə düşüb. Prezident İlham Əliyevin çıxışı bu birliyin gələcək istiqamətlərini müəyyənləşdirən strateji sənəd xarakteri daşıyır.

Fidan Hüseynova

YAP Quba rayon təşkilatının sədri

Paylaş:

Baxılıb: 576 dəfə