Ağstafa seçiciləri sabitliyə, inkişafa, gələcəyimizin təminatçısı cənab İlham Əliyevə səs verəcəklər

Bakı:

15 °C

88 %

0 m/s

AZ RU EN

Ana səhifə / YAP xəbərləri / Ağstafa seçiciləri sabitliyə, inkişafa, gələcəyimizin təminatçısı cənab İlham Əliyevə səs verəcəklər

Ağstafa seçiciləri sabitliyə, inkişafa, gələcəyimizin təminatçısı cənab İlham Əliyevə səs verəcəklər

20.09.2013 [10:40]

Rayonun Muğanlı və Xətai kəndlərində təbliğat-təşviqat kampaniyası çərçivəsində seçicilərlə görüş keçirilib
9 oktyabrda keçiriləcək prezident seçkilərində Yeni Azərbaycan Partiyası (YAP) tərəfindən namizədliyi irəli sürülmüş Azərbaycan Respublikasının Prezidenti cənab İlham Əliyevin Ağstafa rayonu üzrə seçki qərargahı təbliğat-təşviqat kampaniyasını uğurla davam etdirir. Rayonun Muğanlı və Xətai kəndlərində keçirilən görüşlərdə çıxış edən YAP Ağstafa rayon təşkilatının sədri Ramiz Tatarov qarşıdan gələn prezident seçkiləri ilə bağlı məlumat verib. YAP rayon təşkilatının sədri bildirib ki, ölkə Prezidenti İlham Əliyevin apardığı dolğun və qətiyyətli siyasi kurs nəticəsində ölkəmiz regionun ən inkişaf etmiş ölkəsinə çevrilib. R.Tatarov qeyd edib ki, ölkəmizdə kənd təsərrüfatının inkişafı məsələsi hər zaman prioritet sayılıb. Prezident İlham Əliyev fermerlərin, sahibkarların işini asanlaşdırmaq üçün bir sıra subsidiyaların verilməsi, əkin işi ilə məşğul olan insanlara yardım edilməsi ilə bağlı göstərişlər verib: “Məhz bu tədbirlərin nəticəsidir ki, ölkəmiz ərzaq məhsulları ilə özünü təmin edir. Həm daxili, həm də xarici siyasətdə əldə olunan nailiyyətlər xalq tərəfindən bəyənilir və dəstəklənir. Cənab İlham Əliyevin gələcək üçün daha böyükmiqyaslı proqramları var. Bu proqramlar vətəndaşlarımızı xoş güzərana, sabit yaşama aparır. İnanıram ki, oktyabrın 9-da Ağstafa seçiciləri sabitliyə, inkişafa, gələcəyimizin təminatçısı cənab İlham Əliyevə səs verəcəklər. İLHAMLA İRƏLİ!”
Çıxış edən millət vəkili Nizami Cəfərov Ağstafa rayonunun hər bir kəndində prezidentliyə namizəd cənab İlham Əliyevin təbliğat kampaniyası ilə əlaqədar bir bayram sevincinin yaşandığını deyib: “Xalqımızı inkişafa aparan Prezident İlham Əliyev Azərbaycana rəhbərlik etdiyi 10 ildə əməlləri ilə hər dəqiqə, hər saat gördüyü işlərlə, verdiyi qərarlarla xalqın dəstəyini qazanıb. İnanıram ki, xalqımız, Ağstafa seçiciləri bu dəstəyi oktyabrın 9-da növbəti dəfə nümayiş etdirəcəklər”.
Çıxış edən Gəncə Dövlət Universitetinin professorları Mahal Qurbanov və Telman Quliyev son illər Azərbaycanda aparılan abadlıq işlərindən danışıblar. Bildirilib ki, Prezident İlham Əliyev 2003-cü ildə dövlət başçısı seçilərkən verdiyi vədlərin hamısını yerinə yetirib.
Çıxış edən kənd sakinləri də Prezident İlham Əliyevin yürütdüyü siyasəti dəstəklədiklərini ifadə ediblər. Onlar bir daha əminliklə bəyan ediblər ki, xalqımızın dəstəyi ilə Prezident İlham Əliyev növbəti 5 ildə də ölkəmizin Prezidenti olacaq.
Pərviz SADAYOĞLU

Paylaş:

Baxılıb: 1461 dəfə