“Fəxr edə bilərik ki, bizim zəngin, böyük söz ehtiyatına malik olan Azərbaycan dilimiz var”

Bakı:

16 °C

88 %

6 m/s

AZ RU EN

Ana səhifə / YAP xəbərləri / “Fəxr edə bilərik ki, bizim zəngin, böyük söz ehtiyatına malik olan Azərbaycan dilimiz var”

“Fəxr edə bilərik ki, bizim zəngin, böyük söz ehtiyatına malik olan Azərbaycan dilimiz var”

31.07.2025 [16:53]

Mansur Quliyev,

YAP Ağdam rayon təşkilatının sədri

“Fəxr edə bilərik ki, bizim zəngin, böyük söz ehtiyatına malik olan Azərbaycan dilimiz var” – bu dəyərli fikir ümummilli lider Heydər Əliyevin Azərbaycan dilinə olan sonsuz sevgisinin və milli kimliyimizin əsasında dayanan ana dilimizə verdiyi yüksək qiymətin bariz ifadəsidir. Azərbaycan dili təkcə ünsiyyət vasitəsi deyil, xalqımızın tarixini, mədəniyyətini, mənəviyyatını və milli yaddaşını özündə yaşadan müqəddəs varlıqdır.

Heydər Əliyev dilin xalqın varlığını, birliyini və gələcəyini müəyyən edən başlıca amillərdən biri olduğunu hər zaman vurğulamış, onun qorunması və inkişafı istiqamətində mühüm addımlar atmışdır. O, Azərbaycan dilinin dövlət dili kimi qəbul olunması, tədris və rəsmi idarəçilik dilinə çevrilməsi uğrunda böyük əzmkarlıq göstərmişdir. Ümummilli liderin təşəbbüsü ilə 1978-ci il Konstitusiyasında Azərbaycan dili rəsmi dil kimi təsbit olundu. Müstəqillik dövründə isə bu xətt daha da möhkəmləndi və Azərbaycan dili dövlət müstəqilliyimizin başlıca rəmzlərindən birinə çevrildi.

Azərbaycan dilinin zəngin söz ehtiyatı, incəlikləri və ifadə imkanları onun bədii və elmi düşüncəyə verdiyi töhfələrdə, klassik ədəbiyyatımızda və müasir yazılı ədəbiyyatda özünü aydın şəkildə göstərir. Nizami, Füzuli, Nəsimi kimi dahilərin söz qüdrəti bu dildə əbədiləşib. Bu dil elə bir gücə malikdir ki, istənilən hissi, düşüncəni və fikri ən zərif və dolğun şəkildə ifadə edə bilir.

Heydər Əliyevin Azərbaycan dilinə verdiyi dəyər onun milli ideologiyasının təməl sütunlarından biri idi. O, deyirdi: “Azərbaycan dili bizim milli sərvətimizdir. Onun saflığını qorumaq, zənginliyindən bəhrələnmək hər bir vətəndaşın borcudur.”

Bu gün müstəqil Azərbaycanın dövlət dili kimi Azərbaycan dili inkişaf etməkdə, dünya azərbaycanlılarını birləşdirən mədəni körpü rolunu oynamaqdadır. Prezident İlham Əliyev və Birinci vitse-prezident Mehriban Əliyeva tərəfindən də dil siyasətinə xüsusi diqqət yetirilir, dilin tədrisi və təbliği istiqamətində ardıcıl işlər görülür.

Nəticə etibarilə, Ulu Öndər Heydər Əliyevin qeyd etdiyi kimi, doğrudan da fəxr edə bilərik ki, biz ana dilimizi qoruyub saxlamış, onu dövlət dili səviyyəsinə qaldırmış və dünya azərbaycanlılarının qürur mənbəyinə çevrilmişik. Bu dil bizim kimliyimiz, keçmişimiz və gələcəyimizdir.

Paylaş:

Baxılıb: 488 dəfə