Qarşılıqlı etimad, birgə maraqlar

Bakı:

24 °C

83 %

0 m/s

Əlaqə

AZ RU EN

Ana səhifə / YAP xəbərləri / Qarşılıqlı etimad, birgə maraqlar

Qarşılıqlı etimad, birgə maraqlar

12.05.2025 [23:14]

Fidan Hüseynova,

YAP Quba rayon təşkilatının sədri

Mayın 6-da Prezident İlham Əliyev Vyetnamın nüfuzlu “Vietnam News Agency” agentliyinə verdiyi müsahibədə Azərbaycan ilə Vyetnam arasında ikitərəfli əlaqələrin mövcud vəziyyəti və perspektivləri, regional və qlobal təhlükəsizlik çağırışları, eləcə də ölkəmizin uğurlu inkişaf strategiyası barədə dolğun məlumatları təqdim edib. Dövlətimizin başçısının geosiyasi təhlilləri və beynəlxalq münasibətlərə dair müdrik yanaşmaları müsahibədə öz əksini tapıb.

Prezident İlham Əliyev iki ölkə arasında dostluq və əməkdaşlıq münasibətlərinin təməlini Azərbaycanın Ümummilli Lideri Heydər Əliyev və Vyetnam Demokratik Respublikasının Prezidenti Ho Şi Minin qoyduğunu vurğulayaraq son illərdə bu əlaqələrin yüksələn xətlə inkişaf etdiyini qeyd edib. Dövlətimizin başçısı 2014-cü ildə Vyetnama rəsmi səfəri zamanı göstərilən qonaqpərvərliyi xüsusilə xatırladıb.

Azərbaycan Cənub-Şərqi Asiya regionu ilə münasibətlərin dərinləşdirilməsinə böyük önəm verir və Vyetnamla əməkdaşlıq bu strategiyanın əsas tərkib hissəsidir. Dövlət başçısı qeyd edib ki, Azərbaycanın təşəbbüsü ilə həyata keçirilən iri infrastruktur layihələri, enerji təhlükəsizliyi istiqamətində atılan addımlar və nəqliyyat-logistika imkanlarının genişləndirilməsi ölkəmizi regional və qlobal miqyasda mühüm tərəfdaş kimi təqdim edir. Bu kontekstdə Vyetnam şirkətlərinin Azərbaycanda investisiya imkanları, eləcə də ölkəmiz vasitəsilə Asiya və Avropa bazarlarına çıxış potensialı xüsusi vurğulanmışdır.

Azərbaycan ilə Vyetnam arasında münasibətlər dostluq, qarşılıqlı hörmət və əməkdaşlıq prinsiplərinə əsaslanır. Zamanla bu münasibətlər siyasi, iqtisadi və mədəni sahələrdə inkişaf edib, müxtəlif səviyyələrdə qarşılıqlı təmaslar güclənib. Hər iki tərəf beynəlxalq təşkilatlar çərçivəsində bir-birini dəstəkləyir və ortaq maraqlara əsaslanan əməkdaşlığı təşviq edir. Mövcud potensial gələcəkdə daha sıx tərəfdaşlıq üçün geniş imkanlar açır və bu münasibətlərin davamlı inkişafına zəmin yaradır. Mədəniyyətlərarası dialoq, BMT və Qoşulmama Hərəkatı çərçivəsində əməkdaşlıq məsələləri də müsahibədə əhatə olunub. Dövlətimizin başçısı Azərbaycanın bu platformalarda fəal iştirak etdiyini və inkişaf etməkdə olan ölkələrin maraqlarını müdafiə etdiyini vurğulayıb.

Prezident İlham Əliyevin “Vietnam News Agency” agentliyinə verdiyi müsahibə Azərbaycan-Vyetnam münasibətlərinin mövcud vəziyyətini və gələcək inkişaf perspektivlərini əhatə edir. Bu müsahibə iki ölkə arasında siyasi, iqtisadi və humanitar sahələrdə əməkdaşlığın daha da dərinləşdirilməsi üçün bir yol xəritəsidir və qarşılıqlı etimadın möhkəmləndirilməsinə töhfə verir.

Paylaş:

Baxılıb: 719 dəfə