Şirvan şəhərində Yeni Azərbaycan Partiyasının yerli fəalları ilə görüş keçirilib

Bakı:

22 °C

60 %

6 m/s

Əlaqə

AZ RU EN

Ana səhifə / YAP xəbərləri / Şirvan şəhərində Yeni Azərbaycan Partiyasının yerli fəalları ilə görüş keçirilib

Şirvan şəhərində Yeni Azərbaycan Partiyasının yerli fəalları ilə görüş keçirilib

23.07.2013 [10:47]

İyulun 20-də Şirvan şəhər mədəniyyət evində Yeni Azərbaycan Partiyasının şəhər təşkilatının fəalları ilə görüş keçirilib. Görüşdə YAP Sədrinin müavini-İcra katibi Əli Əhmədov iştirak edib.
AzərTAc xəbər verir ki, ölkəmizdə keçiriləcək növbəti prezident seçkiləri ilə əlaqədar partiya üzvləri qarşısında duran vəzifələrə həsr olunmuş görüşü giriş sözü ilə YAP Şirvan şəhər təşkilatının sədri Əbülhəsən İbrahimov açıb. Bildirilib ki, partiyanın şəhərdəki 4991 üzvü 96 ərazi təşkilatında birləşib. Onların 2327 nəfərini qadınlar, 2169 nəfərini isə gənclər təşkil edir.
Qarşıdan gələn prezident seçkilərinə hazırlıqla bağlı görülən işlər barədə danışan təşkilatın sədri məlumat verib ki, partiyanın 150 fəal üzvünün iştirakı ilə şəhər üzrə seçici siyahıları dəqiqləşdirilərək YAP-ın məlumat bazasına yerləşdirilib. Son məlumata görə, 46 saylı Şirvan seçki dairəsi üzrə 30 məntəqədə 38694 seçici qeydiyyatdadır. Seçki məntəqələrinin maddi-texniki bazası qanunvericiliyin tələbləri səviyyəsindədir. Şəhər təşkilatında 13 nəfərlik seçki qərargahı yaradılıb, dairə seçki komissiyası və seçki məntəqələri üzrə məşvərətçi hüquqa malik üzvlərin, müşahidəçilərin siyahısı hazırlanıb.
YAP-ın İcra katibi Əli Əhmədov görüşün məqsədini açıqlayaraq bildirib ki, növbəti prezident seçkiləri ərəfəsində qarşıda duran vəzifələri müəyyənləşdirib əməli işə keçməyin vaxtıdır və partiya olaraq bu sahədə fəallığımızı artırmalıyıq. YAP-ın namizədi Prezident İlham Əliyevin ölkəyə rəhbərlik etdiyi 10 ildə Azərbaycanda möhtəşəm inkişaf dövrü yaşanıb. Bu illər ərzində iqtisadiyyatımız 3 dəfə artıb ki, bu, dünya praktikasında nadir hallarda təsadüf olunan artım tempidir.
İcra katibi vurğulayıb ki, Prezident İlham Əliyevin yürütdüyü siyasətin kökündə insanların rifah halının, güzəranının daha da yaxşılaşdırılması dayanır. Ötən 10 ildə insanların həyat səviyyəsi əsaslı şəkildə dəyişib. Bu dəyişikliyin davamlı olmasını xalqımız İlham Əliyevin növbəti müddətə prezident seçilməsində görür.
Əldə olunan uğurların ölkədə hökm sürən dayanıqlı sabitliyin, əmin-amanlığın nəticəsi olduğunu vurğulayan Ə.Əhmədov sözünə davam edərək deyib: “Sabitlik olmayan yerdə inkişaf da olmaz, sabaha inam da. Son illərdə dövlət siyasətinin prioritetlərindən biri bölgələrimizin inkişafına nail olmaqdır. Bölgələrimizin gözəlləşməsi, abadlaşması insanlarımızın rahat yaşamasına zəmin yaradır. Yaşadığınız Şirvan şəhəri buna əyani sübutdur. Şəhərinizdə 4-5 il əvvəl olan insan bu gün Şirvana gəlsə, tamamilə yeni bir şəhərlə qarşılaşacaq. Ona görə də YAP üzvlərinin geniş təbliğat aparması üçün əldə kifayət qədər əsasları, deməyə sözləri vardır və bundan maksimum istifadə edilməlidir”.
İcra katibi daha sonra siyasi həmfikirlərinə seçkilərə hazırlıqla bağlı partiyanın tapşırıq və tövsiyələrini çatdırıb.
Görüşdə partiyanın qadın üzvlərinin nümayəndəsi Səadət Quliyeva, gənclər adından Emil Məmmədov çıxış edərək seçkilərdə YAP-ın vahid namizədinin qələbə qazanması üçün var qüvvə ilə çalışacaqlarını, qeyd olunan təbliğat imkanlarından yetərincə istifadə edəcəklərini bildiriblər.
Şirvan şəhər İcra Hakimiyyəti başçısının müavini Elman Abbasov görüşdə çıxış edərək Şirvan şəhərinin 10 ildə keçdiyi inkişaf yolundan danışıb.

Paylaş:

Baxılıb: 1431 dəfə