Qəhrəmanlığın, zəfərin, sülhün rəmzinə çevrilən Şuşa dirçəliş yolunda

Bakı:

24 °C

63 %

4 m/s

Əlaqə

AZ RU EN

Ana səhifə / YAP xəbərləri / Qəhrəmanlığın, zəfərin, sülhün rəmzinə çevrilən Şuşa dirçəliş yolunda

Qəhrəmanlığın, zəfərin, sülhün rəmzinə çevrilən Şuşa dirçəliş yolunda

14.05.2024 [17:52]

Muxtar Nağıyev

YAP Səbail rayon təşkilatının sədri

Azərbaycanın mədəniyyət paytaxtı, Qarabağın incisi Şuşa 2020-ci il noyabrın 8-də Azərbaycan Respublikasının Prezidenti, Ali Baş Komandan İlham Əliyevin “Dəmir yumruq” siyasəti ilə Müzəffər Ordumuzun rəşadətli əsgər və zabitlərimizin qəhrəmalığı ilə işğaldan azad oldu. Və Qalib Prezidenti İlham Əliyev Şəhidlər xiyabanında Azərbaycan xalqına Şuşanın azad edilməsi müjdəsini verərkən demişdim: “Böyük fəxarət və qürur hissi ilə bəyan edirəm ki, Şuşa şəhəri işğaldan azad edildi! Şuşa bizimdir! Qarabağ bizimdir!”

Qalib Lider, Prezident İlham Əliyevin 2020-ci il noyabrın 8-də Şuşanın işğaldan azad edilməsi münasibətilə xalqımızı təbrik müraciətində dediyi “Əziz Şuşa, biz səni dirçəldəcəyik!” sözlərinin gerçəkləşəcəyi heç kimdə şübhə doğurmur. Dövlətimizin başçısının qətiyyəti, prinsipiallığı, verdiyi vədə hər zaman sadiq olmağı bu əminliyi yaradır. Ali Baş Komandanımız Prezident İlham Əliyev çıxışlarında ərazi bütövlüyümüz bərpa ediləndən sonra Bülbülün, Natəvanın, Üzeyir Hacıbəylinin büstləri yenə də Şuşada qoyulacağını demişdi. Və bu sözlər də artıq reallığa çevrilib və həmin dahi şəxsiyyətlərin büstləri Şuşada yenidən əvvəlki yerlərinə qoyulub. Şuşanın düşməndən azad edilməsinin və qələbəmizin simvolu olan “Zəfər yolu” dövlət başçımızın verdiyi sözün reallığıdır. Bütün bu görülən işlərlə yanaşı, üç aeroportun tikilməsi və növbəti ardıcıl olaraq görülən işlər bir daha onu göstərir ki, Qalib liderimizin sözü ilə əməli üst-üstə düşür. Çünki dövlət başçımızın dediyi bütün vədlər hər gün reallığı çevrilməkdədir.

Mayın 10-da Füzuli və Laçın rayonlarına, Şuşa şəhərinə səfər edən Prezident İlham Əliyev və birinci xanım Mehriban Əliyevanın Şuşada ilk yaşayış kompleksinin açılışında iştirak edərək şəhərə köçmüş sakinlərlə görüşləri oldu. Onlara bu tarixi hadisə ilə bağlı xoş arzularını diləyən dövlətimizin başçısı işğaldan azad edilən torpaqlarımızda aparılan genişmiqyaslı yenidənqurma və quruculuq işləri haqqında danışaraq bildirdi ki, Qarabağ və Şərqi Zəngəzur iqtisadi rayonlarında aparılan tikinti-quruculuq işləri miqyasına və sürətinə görə dünyanı heyrətləndirir. Bir yanda yollar çəkilir, körpülər salınır, hava limanları tikilib istifadəyə verilir. Bir yanda da müasir yaşayış məskənləri salınır, qayıdış karvanları ilə yurdlarına dönən keçmiş məcburi köçkünlərimiz isti od-ocaqlarına qovuşdurulur. Bütün bunlar isə Azərbaycan xalqının, dövlətinin dahi xilaskarı Ulu Öndər Heydər Əliyevin vaxtilə dilə gətirdiyi Qarabağ, Şərqi Zəngəzur arzularının çin olduğu tarixi və müqəddəs dövrdür. Həmçinin, reallıq budur ki, Azərbaycan 30 il dünyadan ədalət gözlədi, amma sonda ədalət özü bərpa etməli oldu. Üçrəngli Bayrağımızın işğaldan azad edilmiş torpaqlarımızda dalğalanması tarixi Zəfərimizin rəmzidir. Bu Zəfərə Vətən oğullarının canı, qanı bahasına nail olmuşuq. Dövlətimizin başçısı çıxışında onu da bildirdi ki, Azərbaycan xalqı elə bir qəhrəmanlıq, fədakarlıq göstərdi ki, bu gün bütün dünyada Azərbaycan oğulları haqqında danışırlar və xalqımıza hörmət edirlər. Ən əsası isə bütün Azərbaycan xalqı 44 gün ərzində bir yumruq kimi birləşdi.

Dövlətimizin başçısı, həmçinin görüş zamanı həm də Qarabağın Şuşa zirvəsindən bütün dünyaya mühüm mesajlar çatdırdı, vacib ismarıclar göndərdi, sərt xəbərdarlıqlar etdi. Və qətiyyətlə bildirdi ki, Azərbaycan Cənubi Qafqazın lider ölkəsidir və Bakının rəyi öyrənilmədən, maraqları nəzərə alınmadan bölgədə hər hansı addımın atılması mümkünsüzdür: “Bu gün də baxın bizə qarşı, kimlər, necə deyərlər əsas rol oynayırlar - Fransa və Amerika. Bunu açıq demək lazımdır, daha çox Fransa. Onlar da bilməlidirlər ki, bizim iradəmizdən kənar bu bölgədə heç bir məsələ həll olunası deyil. Hansısa səfirin Şuşaya gəlməsi bizə minnət kimi təqdim edilməməlidir. Gəlir gəlsin, gəlmir, heç lazım da deyil. Guya onların gəlib-gəlməməsi ilə nəsə dəyişir, heç nə dəyişmir”.

Prezident İlham Əliyev onu da bir daha söyləyib ki, burada, bu torpaqda söz sahibi bizik və bizim siyasətimiz beynəlxalq hüquqa və ədalətə əsaslanır: “Əgər bu gün yenə də görsək ki, Ermənistanda revanşistlər baş qaldırır, Fransa Ermənistana öldürücü silahlar verir, o silahların kritik həddə çatmasını görsək, onda bizdən heç kim inciməsin. Hər halda hər kəs bilir ki, biz nəyə qadirik, Ordumuz nəyə qadirdir və iradəmiz nə qədər möhkəmdir. Heç kim bizim qabağımızda dura bilməz. Heç kim bizə heç nə diktə edə bilməz və bizim daxili işlərimizə müdaxilə edə bilməz. Nəyi lazım biliriksə, onu da edəcəyik”.

Həmçinin, mayın 11-də Azərbaycan Respublikasının Prezidenti İlham Əliyev və birinci xanım Mehriban Əliyeva Şuşanın Cıdır düzündə VII “Xarıbülbül” Beynəlxalq Musiqi Festivalının və “Şuşa – İslam dünyasının mədəniyyət paytaxtı 2024” ilinin açılış mərasimində iştirak ediblər. Keçirilən görüşdə dövlətimizin başçısı Şuşa şəhərinin İslam dünyasının mədəniyyət paytaxtı elan olunmasını İslam dünyasının Azərbaycana növbəti dəstəyinin, hörmətinin əlaməti kimi dəyərləndirildiyini söyləyib: “Şuşa bu şərəfli ada layiq görülüb və biz bunu İslam dünyasının Azərbaycana növbəti dəstəyinin, hörmətinin əlaməti kimi qəbul edirik”.

Dövlətimizin başçısı Şuşa şəhərin görülən işlərlə bağlı tədbir iştirakçılarına məlumat verərək bildirib ki, Şuşanın tarixi simasının bərpası istiqamətində fəal işlər gedir, sözün əsl mənasında, dirçəlir. Prezident İlham Əliyev, eyni zamanda vurğulayıb ki, Şuşa mədəniyyət ocağı kimi tanınsa da, hazırda, eyni zamanda, qəhrəmanlıq rəmzidir, zəfər rəmzidir və sülhün rəmzidir.

Bir sözlə, bu mühüm addım İslam dünyasının həmrəyliyinin yeni rəmzinə çevrilməklə qarşılıqlı əməkdaşlıq münasibətlərinin daha da genişləndirilməsində özünəməxsus rol oynayacaq. Cənab İlham Əliyevin qeyd etdiyi kimi, Şuşa şəhərinin İslam dünyasının mədəniyyət paytaxtı olması bizə əlavə imkan verəcək ki, öz mədəniyyətimizi həm müsəlman ölkələrinin ictimaiyyətinə, həm də dünya ictimaiyyətinə çatdıraq.

Beləliklə, bütün bunlar bir daha onu deməyə əsas verir ki, hər gün yeniləşən, gözəlləşən Şuşanın “İslam dünyasının mədəniyyət paytaxtı” elan edilməsi şəhərimizi mədəniyyətin, incəsənətin beşiyi kimi dünyaya tanıdacaq.

Paylaş:

Baxılıb: 666 dəfə