“Vətənə, xalqa həsr edilən ömür”

Bakı:

26 °C

73 %

6 m/s

Əlaqə

AZ RU EN

Ana səhifə / YAP xəbərləri / “Vətənə, xalqa həsr edilən ömür”

“Vətənə, xalqa həsr edilən ömür”

02.05.2024 [11:07]

Yeni Azərbaycan Partiyası (YAP) Zəngilan rayon təşkilatında Ulu Öndər Heydər Əliyevin anadan olmasının 101-ci ildönümü münasibətilə “Vətənə, xalqa həsr edilən ömür” mövzusunda dəyirmi masa keçirildi.

Tədbirdə YAP Zəngilan rayon təşkilatının sədri Natiq Quluzadə, Zəngilan rayon İcra hakimiyyətinin başçısının müavini Nizami Mönsümov və bir sıra rayon ziyalıları iştirak etdilər.

İlk öncə Ümummilli lider Heydər Əliyevin və torpaqlarımızın ərazi bütövlüyü uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edildi.

Tədbiri giriş sözü ilə açan YAP Zəngilan rayon təşkilatının sədri Natiq Quluzadə ulu öndər Heydər Əliyevin dövlətimiz və xalqımız qarşısındakı xidmətlərindən geniş bəhs edərək bildirdi ki, bügünkü qüdrətli və güclü Azərbaycan xalqımızın əvəzolunmaz övladı, adını hər zaman qürurla çəkdiyimiz Heydər Əliyevin bizə miras qoyduğu xoşbəxt bir ölkədir. Ulu Öndərin xatirəsi vətənini sevən hər bir azərbaycanlı üçün əziz və müqəddəsdir. Çünki Azərbaycanın müasir tarixi, intibahı, dirçəlişi milli dövlətçiliyimiz bu dahi şəxsiyyətin adı ilə bağlıdır. Bugün haqqında fəxrlə, qürurla danışdığımız və ölkəmizin beynəlxalq aləmdə nüfuzunu artıran yeniliklərin, islahatların təməli məhz Heydər Əliyəv tərəfindən qoyulub.

Natiq Quluzadə vurğuladı ki, nə qədər ki, Azərbaycan var, Ulu Öndərin adı, əməlləri və siyasi kursu yaşayacaq, Azərbaycanın inkişafına yeni-yeni çalarlar bəxş edəcəkdir.

Daha sonra dəyirmi masa ətrafında çıxış edən natiqlər də Ulu öndər Heydər Əliyevin dövlət, millət qarşısında tarixi xidmətlərindən bəhs etdilər. Bildirdilər ki, əbədiyaşar Liderin ən böyük arzusu tarixi torpaqlarımızın işğaldan azad edilməsi, bütün ömrü boyu sədaqətlə xidmət etdiyi doğma Azərbaycanımızın ərazi bütövlüyünün bərpası idi. Ümummilli Lider illər öncə böyük uzaqgörənliklə deyirdi: “Qarabağ məsələsini həll edəcəyik. Zaman lazımdır, vaxt lazımdır. Azərbaycan torpaqları heç vaxt onun əlindən gedə bilməz. Bizim işğal olunmuş torpaqlarımız mütləq qaytarılacaqdır. Nəyin bahasına olur-olsun”.

Bəli, belə də oldu. Tarixi zaman baxımından çox qısa dövr keçdi, işğal altındakı torpaqlarımız azad olundu. Dahi şəxsiyyətin bu arzusunu, vəsiyyətini onun layiqli siyasi varisi, Azərbaycan Prezidenti, Silahlı Qüvvələrimizin Müzəffər Ali Baş Komandanı, qüdrətli sərkərdə cənab İlham Əliyevin rəhbərliyi və müdrikliyi ilə rəşadətli Azərbaycan Ordusu yerinə yetirdi.

Daha sonra Ümummilli lider Heydər Əliyevin həyat və fəaliyyətindən bəhs edən “Vətənə, xalqa həsr edilən ömür” adlı videoçarx nümayiş etdirilib.

Sonda rayon təşkilatının fəal üzvlərindən olan 20 saylı ƏPT-nın sədri Nazim Dünyamalıyevin və “Qızıl Zəngilan” Jurnalının redaktoru rayon ziyalısı Möhübbət Qurbanovun 65 illik yubileyləri münasibətilə onlara Fəxri Fərman və hədiyyə təqdim olunmuşdur.

Paylaş:

Baxılıb: 721 dəfə