Qərbin dominantlığı sona çatdı

Bakı:

8 °C

81 %

4 m/s

Əlaqə

AZ RU EN

Ana səhifə / Xarici siyasət / Qərbin dominantlığı sona çatdı

Qərbin dominantlığı sona çatdı

13.02.2024 [11:15]

Viktor Orban: Aİ getdikcə imperializmə doğru irəliləyir

Son vaxtlar Macarıstanın Avropa İttifaqı ilə münasibətlərində problemlərin yaranması fonunda baş verən çatlar bəzi məsələləri gün üzünə çıxarır. Avropa İttifaqı (Aİ) Ukraynaya uzunmüddətli yardım barədə razılığa gəlsə də, Macarıstana vəsait ayırmamaq qərarına gəlib. Qeyd edilib ki, Macarıstan vəsaitlərin açılması ilə bağlı Aİ qarşısında götürdüyü öhdəlikləri yerinə yetirmir. Halbuki, Aİ sammitində Ukraynaya 50 milyard avro məbləğində yardımın ayrılması təsdiqlənib.

Macarıstanın Baş naziri Viktor Orban isə deyib ki, Avropa İttifaqı son bir neçə ildə Budapeştə qarşı ideoloji müharibə aparır: “Aİ son illərdə Macarıstana qarşı ideoloji müharibə aparıb və daim bizi şantaj etməyə çalışıb”. Onun sözlərinə görə, Aİ getdikcə imperializmə doğru irəliləyir. Baş nazir qeyd edib ki, Avropa İttifaqı getdikcə daha az suveren dövlətlər birliyinə oxşayır: “Siyasi birləşmə, müqavilə hüquqlarına və arqumentlərə baxmayaraq, ölkələri istəmədikləri bir şeydə iştiraka məcbur etməyə çalışır”. O qeyd edib ki, Macarıstan uzun illərdir ki, oxşar şəraitdə yaşayır.

Viktor Orban Avstriyanın keçmiş kansleri Volfqanq Şussellə görüşündə isə bildirib ki, Qərb ölkələrinin qlobal iqtisadiyyatda dominantlıq dövrü başa çatdı, onun ağırlıq mərkəzi Qərbdən Asiya-Sakit Okean regionuna keçir: “Biz qlobal iqtisadiyyatda dövrü dəyişiklik yaşayırıq, bu, hər 500 ildən bir baş verə biləcək hadisədir. Qərbin dominantlığı sona çatdı. Biz etiraf etdik ki, qlobal ticarət sistemimizdə bizdən daha böyük və güclü ölkələr var. Qlobal iqtisadiyyatın ağırlıq mərkəzi - pul və mənfəət mərkəzi Qərbdən Asiyaya doğru dəyişir. Qlobal iqtisadiyyatın özəyi artıq transatlantik deyil, Trans-Sakit Okean regionundadır”.

Ölkəsinin iqtisadi durumuna gəlincə, Macarıstanın Baş naziri deyib ki, inflyasiyanın artım riski göründüyü kimi o qədər də yüksək deyil, lakin bununla belə, iqtisadi artımın bərpası daha ciddi problemdir. V.Orban perspektivlərlə bağlı Beynəlxalq Valyuta Fondu və Avropa Mərkəzi Bankının nümayəndələri ilə arabir məsləhətləşmələr apardığını, həmçinin Macarıstan Milli Bankının (MNB) rəhbəri Dörd Matolçi ilə danışdığını bildirib: “Görürəm ki, Macarıstanda inflyasiyanın artım riski o qədər də yüksək deyil. İqtisadi göstəriciləri planlaşdırdığımız templərlə artırmaq imkanı və Mərkəzi Bankın nəzərdə tutulan səviyyədə faiz dərəcələrini azalda biləcəyi məni daha çox narahat edir. Mən iqtisadi artımın önündəki maneələri inflyasiya riskindən daha böyük təhlükə hesab edirəm. İstər Mərkəzi Bank, istərsə də hökumət və onun pul-kredit, fiskal siyasəti üçün ortaq məqsədimiz ondan ibarət olmalıdır ki, sakit və soyuqqanlı şəkildə, tədricən müəssisələrə sərmayə qoyulsun, inkişaf təmin edilsin, iş yerləri açılsın, texnoloji planda irəliləyişə və iqtisadi artımın yüksəlməsinin dəstəklənməsinə köməklik göstərilsin. Bu, həmçinin faiz dərəcələrinin azaldılmasını tələb edir və forintin müdafiəsini nəzərə alaraq, mərkəzi bank bu faiz dərəcələrini bu il təmin edə biləcək”, - deyə o əlavə edib.

Orban yüksək faiz dərəcələrinə baxmayaraq, biznesi sərmayə qoymağa sövq etmək məqsədilə hökumətin subsidiyalaşdırılmış kredit sxemləri kimi tədbirlərini qeyd edib.

Nardar

Paylaş:

Baxılıb: 959 dəfə