Tez qocalmaq istəmirsinizsə...

Bakı:

29 °C

42 %

5 m/s

Əlaqə

AZ RU EN

Ana səhifə / Sosial / Tez qocalmaq istəmirsinizsə...

Tez qocalmaq istəmirsinizsə...

15.06.2023 [11:00]

Bu qidalardan uzaq durun!

Yeganə BAYRAMOVA

Heç birimiz yaşlı görünmək istəmirik. Genetikamızla bərabər yaşadığımız coğrafiya da qocalma prosesinə təsir edir. Xüsusilə qadınların ən çox qorxduğu amillərdən biridir qocalıq... Bu baxımdan daha çox qadınlar gözəllik prosedurları, kosmetoloji və plastik cərrahi xidmətlərə üz tuturlar. Ancaq bizi qocaldan və yaşlı göstərən yalnız dərimiz deyil. Sağlam və düzgün qidalanmanın da əhəmiyyəti böyükdür. Məsələn, bəzi qidalar həm daxilən, həm də zahirən sürətlə qocalmağımızın səbəbidir.

Elə məqamlar var ki, onları nəzarətdə saxlamaqla qocalmanı ləngidə bilərik. Sağlam qidalanma üzrə mütəxəssis Natəvan Musayeva bu məqamlar və qocalmaya səbəb olan qidalarla bağlı “Yeni Azərbaycan”a danışıb.

Mədənin düşməni qəhvə

N.Musayeva qeyd edib ki, hazır satılan qarışıq qəhvənin tərkibində orqanizm üçün ziyan olan maddələr mövcuddur. Bu qəhvələr, eyni zamanda, orqanizmin qocalmasına da şərait yaradır.

Şəkərdən uzaq durun

Mütəxəssisin sözlərinə görə, şəkərin həddindən artıq istehlakı da təhlükəlidir. Şirniyyatlar, istənilən qazlı içkilər və qablaşdırılmış şirələr dəriyə mənfi təsir göstərə bilər: “Bu məhsulları məsələn, təbii şokoladla, içkiləri isə bitki çayları və giləmeyvə içkiləri ilə əvəz etmək olar”.

Xəmir xörəkləri

N.Musayeva xəmir xörəklərinin orqanizmi qocaldan ilkin vasitə olduğunu bildirib: “Xəmir xörəklərinin tərkibində karbohidratlar var ki, bu da orqanizmə ziyandır”.

Marqarin yağları

Ekspert qeyd edib ki, marqarin yağlarının tərkibində təbii maddələr olmadığı üçün həzm olunmur: “Bu da orqanizmdə yağın yığılmasına gətirib çıxarır. Orqanizmdə yağların yığılması isə təbii olaraq qocalmaya təsir edən əsas amillər sırasındadır”.

5 qramdan çox istehlak edilsə...

N.Musayeva duzlu və duzlu qidaların qəbulunun da vaxtından əvvəl qocalmağa səbəb olduğunu diqqətə çatdırıb: “Duz və duzlu qidalar hüceyrələrarası boşluqlarda yığılan mayeni saxlayır. Buna görə də gün ərzində 5 qramdan çox duz istehlak etmək tövsiyə edilmir.

Kolbasaların tərkibində çoxlu miqdarda duz olur. Bundan əlavə, onlara bədən üçün zərərli olan stabilizatorlar, ləzzət artırıcılar və nitritlər əlavə olunur. Ona görə də kolbasalardan imtina etməyi, onları təbii zülal və amin turşuları mənbəyi olan ətlə əvəz etməyi tövsiyə edirəm. Məsələn, qaynadılmış və ya bişmiş formada toyuq və ya mal əti istehlak etmək sağlamlıq üçün də faydalıdır”.

Mütəxəssisin fikrincə, erkən qocalmağa səbəb olan qidalar arasında əsasən yalnız sadə karbohidratlardan ibarət olan təmizlənmiş dənli bitkilər də var. Onlar bədən tərəfindən qlükozaya çevrilir, qocalmanı həddindən artıq sürətləndirir.

Paylaş:

Baxılıb: 664 dəfə